പ്രഫ. കെ. ആലിക്കുട്ടി മുസ്‌ലിയാര്‍ (ജനറല്‍ സെക്രട്ടറി, സമസ്ത കേരള ജംഇയ്യത്തുല്‍ ഉലമാ)

ആത്മീയ കേരളത്തിന്റെ അനിഷേധ്യ അമരക്കാരന്‍ പാണക്കാട് സയ്യിദ് ഹൈദരലി ശിഹാബ് തങ്ങള്‍ നമ്മെ വിട്ടുപിരിഞ്ഞു. അറിവും ആത്മീയ ഉല്‍ക്കര്‍ഷവും കൊണ്ട് സമുദായ നേതൃനിരയില്‍ ജ്വലിച്ചുനിന്ന നക്ഷത്രമാണ് കണ്ണടച്ചത്. ആറു പതിറ്റാണ്ടിലേറെ കാലമായി കേരളത്തിലെ ദീനീ രംഗത്തും നമ്മുടെ മഹത്തായ സ്ഥാപനങ്ങളുടെ നേതൃനിരയിലും സാമൂഹിക രാഷ്ട്രീയ രംഗത്തും എല്ലാവരും ആദരിക്കപ്പെടുന്ന, അംഗീകരിക്കപ്പെടുന്ന വ്യക്തിത്വമായും നേതൃത്വമായും ശോഭിക്കാന്‍ അല്ലാഹു പ്രത്യേകം തൗഫീഖ് നല്‍കിയ സയ്യിദാണ് നമ്മളോട് വിട പറഞ്ഞിരിക്കുന്നത്. വന്ദ്യരായ തങ്ങളുടെ വേര്‍പാട് ഉമ്മത്തിന് തീരാനഷ്ടമാണ്. അത്രമേല്‍ മഹത്വമേറിയ സേവനങ്ങളാണ് മഹാനായ തങ്ങള്‍ പതിറ്റാണ്ടുകളായി കേരളത്തില്‍ നിര്‍വഹിച്ചുകൊണ്ടിരിക്കുന്നത്.

വ്യക്തിപരമായി നീണ്ട പതിറ്റാണ്ടുകളുടെ ബന്ധം സയ്യിദ് ഹൈദരലി ശിഹാബ് തങ്ങളുമായി എനിക്കുണ്ട്. നിരവധി സ്ഥാപനങ്ങളിലും സംഘടനാ നേതൃത്വങ്ങളിലും തങ്ങളോട് കൂടെ സേവനം ചെയ്യാന്‍ ഭാഗ്യം ലഭിച്ചിട്ടുണ്ട്. ജാമിഅ നൂരിയ്യ അറബിയ്യയുടെ സ്ഥാപിത കാലം മുതല്‍ക്കുതന്നെ പാണക്കാട് കുടുംബം ഈ സ്ഥാപനവുമായി അഭേദ്യമായ ബന്ധം പുലര്‍ത്തിയിരുന്നു. മഹാനായ പി.എം.എസ്.എ പൂക്കോയ തങ്ങള്‍ ഈ സ്ഥാപനത്തിന്റെ എല്ലാമെല്ലാം ആയിരുന്നു. തുടര്‍ന്ന് മുഹമ്മദലി ശിഹാബ് തങ്ങളും ജാമിഅയെ അളവറ്റ് സ്‌നേഹിക്കുകയും പരിപാലിക്കുകയും ചെയ്യുന്നതില്‍ നേതൃപരമായ പങ്കുവഹിച്ചിരുന്നു. ജാമിഅ സ്ഥാപിച്ച കാലഘട്ടത്തില്‍ തന്നെയാണ് സയ്യിദ് ഉമറലി ശിഹാബ് തങ്ങള്‍ ജാമിഅയില്‍ ഉപരിപഠനത്തിനായി ചേര്‍ന്നത്.

ഉമറലി ശിഹാബ് തങ്ങള്‍ ജാമിഅയില്‍ നിന്ന് ബിരുദമെടുത്ത പുറത്തിറങ്ങി അധികം താമസിയാതെതന്നെ പ്രിയപ്പെട്ട ഹൈദരലി ശിഹാബ് തങ്ങളും ജാമിഅയിലെ ഒരു വിദ്യാര്‍ഥിയായി പ്രവേശനം നേടിയിരുന്നു. ജാമിഅയുടെ ആ സുവര്‍ണ കാലഘട്ടത്തില്‍ ശൈഖുന ശംസുല്‍ ഉലമയുടെയും കോട്ടുമല ഉസ്താദിന്റെയും മറ്റു പ്രഗല്‍ഭരായ നമ്മുടെ ഉലമാക്കളുടെയും ശിഷ്യത്വം സ്വീകരിക്കാന്‍ ബഹുമാനപ്പെട്ട തങ്ങള്‍ക്ക് സൗഭാഗ്യം ലഭിച്ചുവെന്നുമാത്രമല്ല വിദ്യാര്‍ഥിയായിരിക്കെ തന്നെ മഹാന്മാരായ ഉസ്താദുമാരുടെ ആദരവ് നേടാനും തങ്ങള്‍ക്ക് തൗഫീഖുണ്ടായി. ശംസുല്‍ ഉലമ (ന: മ ) പല വേദികളിലും സയ്യിദ് ഹൈദരലി ശിഹാബ് തങ്ങളെ കൊണ്ട് ദുആ ചെയ്യിപ്പിച്ചിരുന്നു. ഒരു പതിറ്റാണ്ടിലധികമായി ജാമിഅ നൂരിയ്യ അറബിയ്യയുടെ പ്രസിഡന്റ് പദവിയിലിരുന്ന് ജാമിഅക്ക് നേതൃത്വം നല്‍കിയ മഹാനവര്‍കളുടെ കരങ്ങളില്‍ നിന്ന് നൂറുകണക്കിന് ഫൈസിമാരാണ് സനദ് സ്വീകരിച്ച് പ്രബോധന വീഥിയില്‍ സഞ്ചരിക്കുന്നത്. അതുപോലെ സുന്നി യുവജന സംഘത്തിന്റെ പ്രസിഡന്റായി തങ്ങള്‍ സേവനം ചെയ്തു കൊണ്ടിരിക്കെ തങ്ങളോടൊപ്പം ജനറല്‍ സെക്രട്ടറിയായി ധാരാളം വര്‍ഷം സേവനം ചെയ്യാനുള്ള സൗഭാഗ്യവുമുണ്ടായി. സ്ഥാപനങ്ങളുടെയും സംഘടനയുടെയും അധ്യക്ഷ പദവികള്‍ കേവലമായി അലങ്കരിക്കുക എന്നതായിരുന്നില്ല തങ്ങളുടെ രീതി, ഓരോ കാര്യങ്ങളിലും സൂക്ഷ്മമായി ഇടപെടുകയും യോഗങ്ങളിലും നയപരമായ തീരുമാനങ്ങളിലും കൃത്യമായി നിലപാടെടുക്കുകയും ഒരുതരത്തിലുമുള്ള വിട്ടുവീഴ്ചകള്‍ക്ക് തയ്യാറാകാതെ സജീവമായി കാര്യങ്ങളുമായി ബന്ധപ്പെടുകയും ചെയ്തിരുന്ന ശൈലിയാണ് തങ്ങള്‍ക്ക് ഉണ്ടായിരുന്നത്. അതുകൊണ്ടുതന്നെ യോഗങ്ങളിലും മറ്റും തങ്ങളുടെ തീരുമാനമാണ് അന്തിമമായി പരിഗണിക്കപ്പെടുക. അത് എല്ലാവര്‍ക്കും സ്വീകാര്യമായ നീതിയുക്തമായ തീരുമാനം ആയിരിക്കും.ഭൗതിക ലോകത്ത് നിന്ന് വിടപറഞ്ഞാലും ഈ നാട്ടിലെ ലക്ഷോപലക്ഷം ജനങ്ങളുടെ മനസ്സില്‍ സ്‌നേഹത്തിന്റെയും വാത്സല്യത്തിന്റെയും നീതിയുടെയും പ്രതീകമായി ബഹുമാനപ്പെട്ട തങ്ങള്‍ എന്നും ഓര്‍മിക്കപ്പെടും. അല്ലാഹു അവിടുത്തെ പദവി ഉയര്‍ത്തി കൊടുക്കട്ടെ. ജന്നാത്തുല്‍ ഫിര്‍ദൗസില്‍ ഒരുമിച്ചു കൂടാന്‍ അല്ലാഹു തൗഫീഖ് നല്‍കട്ടെ… ആമീന്‍.

ടി.എച്ച് ദാരിമി

മത സംഹിത എന്ന നിലക്ക് ലോകത്തെ അല്‍ഭുതപ്പെടുത്തുന്ന വളര്‍ച്ചയാണ് ഇസ്‌ലാം അടയാളപ്പെടുത്തിയിട്ടുള്ളത് എന്നത് ഒരു വാദമല്ല, വസ്തുതയാണ്. ഇക്കാര്യത്തില്‍ മറ്റു മതങ്ങളൊന്നും ഇസ്‌ലാമോളം വിജയിച്ചതായി കാണുന്നില്ല. നബി തിരുമേനി വരുന്നതിനു പത്തു നൂറ്റാണ്ട്മുമ്പ് ബി.സി ആറാം നൂറ്റാണ്ടില്‍ വന്ന രണ്ട് മതസംഹിതകളെ നാം ഭാരതീയര്‍ക്കറിയാം. ബുദ്ധ മതവും ജൈനമതവും. ഇനി പ്രത്യയശാസ്ത്രങ്ങള്‍ക്കാവട്ടെ കൊമ്പു കുലുക്കിയും മോഹന സ്വപ്‌നങ്ങള്‍ വാരിയെറിഞ്ഞും കഴിഞ്ഞ നൂറ്റാണ്ടില്‍ വന്ന കമ്യൂണിസം ഉദാഹരണമായി ഉണ്ട്. ഇതൊക്കെ അതിന്റെ ആചാര്യന്‍മാര്‍ നന്നായി പ്രബോധനം ചെയ്‌തെങ്കിലും ഇസ്‌ലാമിനോളം വളര്‍ച്ച ഇതുവരെ അടയാളപ്പെടുത്തിയിട്ടില്ല. ഞെട്ടിക്കുന്ന വളര്‍ച്ചയാണ് ഇസ്‌ലാമിന്റേത്. ഇപ്പോള്‍ ലോക ജനസംഖ്യയുടെ 24.1 ശതമാനം പേര്‍ മുസ്‌ലിംകളാണ്. അഥവാ നാലു പേരെയെടുത്താല്‍ അതിലൊന്ന് മുസ്‌ലിമാണ്. ഇത്രയും വലിയ വളര്‍ച്ചയുടെ തുടക്കമറിയാന്‍ അംറ് ബിന്‍ അബസ(റ) എന്ന സ്വഹാബി തുടക്കത്തില്‍ നബിയോട് ചോദിക്കുന്ന ഒരു ചോദ്യം ഓര്‍ത്താല്‍ മതി. ഈ മതത്തില്‍ താങ്കളോടൊപ്പം ആരൊക്കെയുണ്ട് എന്ന ചോദ്യത്തിന് നബി(സ) പറഞ്ഞു. ഒരു സ്വതന്ത്രനും ഒരു അടിമയുംമാത്രം എന്ന്. അവിടെ നിന്നാണ് ഈ വളര്‍ച്ചയുടെ ഗ്രാഫ് തുടങ്ങുന്നത്.

ഏറ്റവും അവസാനത്തെ സ്ഥിതിവിവരക്കണക്കുകള്‍ അനുസരിച്ച് ഐക്യരാഷ്ട്ര സഭ അംഗീകരിച്ച 193 രാജ്യങ്ങളില്‍ 51 എണ്ണം മുസ്‌ലിംകളാണ് ഭരിക്കുന്നത്. അഫ്ഗാനിസ്ഥാന്‍ മുതല്‍ യമന്‍ വരെ അവരുടെ മണ്ണ് നീണ്ടുകിടക്കുന്നു. ബാക്കിയുള്ളതില്‍ പത്തോളം രാജ്യങ്ങളില്‍ മുസ്‌ലിംകള്‍ 50 ശതമാനത്തിലധികം വരും. അറേബ്യക്ക് ചുറ്റും ഏതാനും രാജ്യങ്ങളാണ് അവരുടെ മണ്ണെന്ന് കരുതിയവര്‍ക്ക് തെറ്റി. ഏഷ്യയുടെ 31 ശതമാനം, മധ്യേഷ്യയുടെ 89 ശതമാനം എന്നിങ്ങനെ ഏഷ്യ കടന്ന് ഉത്തരാഫ്രിക്ക വരെ അവരുടെ 91 ശതമാനം അധിവസിക്കുന്നു. യൂറോപ്പിലാകട്ടെ ആറ് ശതമാനമാണ് അവരുടെ സാന്നിധ്യം. അമേരിക്കന്‍ ഐക്യനാടുകളില്‍ പോലും അവര്‍ ദശാംശം കടന്ന് ഒന്നിനു മുകളിലെത്തിയിരിക്കുന്നു.

ലബനാനിലേതിനേക്കാളും മുസ്‌ലിംകള്‍ ഇപ്പോള്‍ ജര്‍മ്മനിയിലുണ്ടെന്നാണ്. അപ്രകാരം തന്നെ സിറിയയിലുള്ളതിനേക്കാള്‍ അധികം കമ്യൂണിസ്റ്റ് ചൈനയിലും. ഏറ്റവും അധികം മുസ്‌ലിംകള്‍ ഉള്ളത് ഇന്തോനേഷ്യയിലാണെങ്കില്‍ തൊട്ടുപിന്നില്‍ ഇന്ത്യയാണ്. ആരെയും ഞെട്ടിക്കുന്ന ഈ കണക്കുകള്‍ക്കൊപ്പം ചില പ്രവചനങ്ങള്‍ കൂടിയുണ്ട്. അവ ഈ വളര്‍ച്ച സ്ഥിരപ്രതിഭാസമായി നില്‍ക്കുകയും വളരുകയും ചെയ്യുന്നു എന്നാണ്. ഉദാഹരണമായി വാഷിംഗ്ടണിലെ പ്യൂ റിസര്‍ച്ച് ഇന്‍സ്റ്റിറ്യൂട്ടിലെ മിഖായില്‍ ലിപ്കയുടെയും കോണ്‍ട്രാഡ് ഹാക്കെറ്റിന്റെയും സൂക്ഷ്മമായ പഠനം എടുക്കാം. 2017 ലായിരുന്നു ഇവരുടെ പഠനം. 2050 ല്‍ ഇസ്‌ലാം ജനസംഖ്യയുടെ കാര്യത്തില്‍ ഇപ്പോള്‍ 31.5 ശതമാനം വരുന്ന ക്രിസ്ത്യാനിറ്റിക്ക് ഒപ്പമെത്തും എന്നവര്‍ തെളിയിക്കുന്നു. മാത്രമല്ല, 2070 ല്‍ മുസ്‌ലിംകള്‍ ക്രിസ്ത്യാനികളെ മറികടക്കും എന്നും ലോകത്തെ ഏറ്റവും വലിയ മതമായി തീരുമെന്നും അവര്‍ പറയുന്നു. വെറുതെ പറയുകയല്ല. തെളിവുകള്‍ ഉണ്ട്. ഇനി ഈ വളര്‍ച്ച തന്നെ കേവല കാനേഷുമാരിയിലേതല്ല. സാമ്പത്തിക രംഗത്ത് അവരുടെ ജി.ഡി.പി 5.7 ട്രില്യണ്‍ (2016) ആണ്. മാത്രമല്ല എണ്ണ സമ്പന്ന രാജ്യങ്ങളാണ് അവരുടേത്. എണ്ണ കയറ്റുമതി ചെയ്യുന്ന രാജ്യങ്ങളുടെ കൂട്ടായ്മയായ ഒപെകിലെ 13 രാജ്യങ്ങളില്‍ 8 രാജ്യങ്ങള്‍ അവരുടെ അധികാരത്തിലാണ്.

ഇത്രയും വലിയ വളര്‍ച്ചയിലേക്ക് അവര്‍ നീങ്ങിയത് നിരന്തര വൈതരണികള്‍ പിന്നിട്ടാണ്. നാടുവിട്ട് മറ്റൊരിടത്ത് കൂടുകൂട്ടിയാലും അതിനനുവദിക്കില്ല എന്ന് ആക്രോശിച്ച ബദര്‍ മുതല്‍ മുസ്‌ലിമാണെങ്കില്‍ അതിര്‍ത്തി കടന്നെത്തിയവരെ പൊറുപ്പിക്കില്ല എന്നു പറയുന്ന മോദിസം വരെ. കുരിശു യുദ്ധങ്ങള്‍ മുതല്‍ ഒന്നാം ലോക യുദ്ധം വരെ. താടിയുള്ളവന് വിമാനത്തില്‍ വരെ കുത്തു കണ്ണ് കാണേണ്ടിവരുന്നു. അവര്‍ അപരിഷ്‌കൃതരാണ് എന്നതു മുതല്‍ കള്ള് വിളമ്പി മതത്തില്‍ ചേര്‍ക്കുന്നവരാണ് എന്നതുവരെ ആക്ഷേപങ്ങള്‍ കേള്‍ക്കേണ്ടിവരുന്നു. ഇതിനെല്ലാം ഇടയില്‍ അവര്‍ നിരവധി സാമ്രാജ്യങ്ങള്‍ തന്നെ സ്ഥാപിച്ചു. റാഷിദീ, അമവീ, അബ്ബാസീ, ഫാത്വിമീ, സല്‍ജൂഖി, ഉസ്മാനീ ഖിലാഫത്തുകള്‍. കേവല ജനസംഖ്യാരാഷ്ട്രീയ വളര്‍ച്ചകള്‍ മാത്രമല്ല വൈജ്ഞാനിക വളര്‍ച്ചകളും അവര്‍ നേടി. അല്‍ജിബ്രയും ക്യാമറയും ഗ്ലോബുമെല്ലാം ഉണ്ടാക്കിക്കൊടുത്തവരും അല്‍ ജാബിറിനെയും അവിസന്നയെയും റാസിയെയും ഗസ്സാലിയെയുമെല്ലാം അവര്‍ ലോകത്തിനു സമ്മാനിക്കുകയും ചെയ്തു.

ഇതൊക്കെയുണ്ടായിട്ടെന്താ എന്ന ചോദ്യമുണ്ട് എന്ന് സമ്മതിക്കുന്നു. അതു വേറെ ചര്‍ച്ചയാണ്. ഇവിടെ ഇവ്വിധം ഒരു പ്രബോധനം വിജയിച്ചതിനുപിന്നിലെ രഹസ്യമാണ് ചികയുന്നത്. അത് കേവല പ്രബോധനമായിരിക്കാന്‍ വഴിയില്ല. ആണെങ്കില്‍ മറ്റു മതങ്ങളും പ്രത്യയശാസ്ത്രങ്ങളും എന്തുകൊണ്ട് ഇത്ര വിജയിച്ചില്ല എന്ന ചോദ്യം ഉയരും. അത് പ്രബോധനത്തിന്റെ വേറിട്ട രസതന്ത്രം തന്നെയാണ്. അതാണ് നാം പഠിക്കേണ്ടത്. അത് പഠിക്കുമ്പോള്‍ മുഹമ്മദ് നബി (സ) എങ്ങനെ ലോകത്തിന്റെ ജേതാവായി എന്നു കണ്ടെത്താം. അത് ചുരുക്കത്തില്‍ ഇപ്രകാരമാണ്. ഒന്നാമതായി നബി(സ) പരമമായ സത്യത്തെ സ്വാംശീകരിച്ചു എന്നതാണ്. സത്യം നബി (സ)യുടെ ജീവിതത്തിന്റെ ഉണ്‍മ തന്നെയായിരുന്നു. സത്യസന്ധത ഓരോരുത്തരുടെയും വെറും അര്‍ഥമില്ലാത്ത അവകാശവാദങ്ങളായി മാറിയിരുന്ന ഒരു കാലത്ത് ഈ പ്രവാചകന്റെ സത്യത്തോടുള്ള അഭിവാജ്ഞ ആദ്യം അംഗീകരിച്ചത് ശത്രുക്കളായ ഇരുട്ടിന്റെ ശക്തികള്‍ തന്നെയായിരുന്നു. അതുകൊണ്ടായിരുന്നുവല്ലോ അവര്‍ ആ വ്യക്തിത്വത്തെ അല്‍അമീന്‍ എന്നു വിളിച്ചത്. പില്‍ക്കാലത്ത് റോമിലെ ഹിരാക്ലിയസ് ചക്രവര്‍ത്തി ഈ പ്രവാചകനെ നിരൂപണം ചെയ്യാന്‍ അബൂസുഫ്‌യാനിലൂടെ ചോദ്യങ്ങളില്‍ തൂങ്ങിപ്പിടിച്ച് ആഴ്ന്നിറങ്ങാന്‍ ശ്രമിക്കുമ്പോള്‍ അദ്ദേഹം ചോദിക്കുന്നുണ്ട്. നിങ്ങള്‍ അദ്ദേഹം കളവു പറയും എന്ന് സന്ദേഹിക്കുന്നുണ്ടോ?. അതിന് അപ്പോള്‍ ശത്രുവായിരുന്ന അബൂസുഫ്‌യാന്‍ ഒന്നാലോചിക്കുക പോലും ചെയ്യാതെ ഇല്ല എന്ന് മറുപടി നല്‍കുന്നുണ്ട്. അടുത്ത ചോദ്യം അദ്ദേഹം ചതിക്കുമോ എന്നായിരുന്നു. അതിനും ഇല്ല എന്നായിരുന്നു അബൂസുഫ്‌യാന്റെ മറുപടി. അപ്പോള്‍ ശത്രു പക്ഷത്തായിരുന്ന ഒരാള്‍ ഇങ്ങനെ സാക്ഷ്യപ്പെടുത്തുമ്പോള്‍ പിന്നെ നബി സത്യത്തെ അവര്‍ ചേര്‍ത്തുപിടിച്ചതിന് മറ്റു തെളിവുകള്‍ തെരയേണ്ടിവരില്ല.

തന്റെ ജീവിതംകൊണ്ട് സ്വാംശീകരിച്ചെടുത്ത ഇതേ സത്യത്തെ മറ്റുള്ളവര്‍ക്ക് സ്‌നേഹത്തോടെ കൈമാറുകയായിരുന്നു രണ്ടാമത്തെ ചുവട്. സ്‌നേഹം ഒരു വികാരമാണ്. രണ്ടെണ്ണത്തിനിടയിലേ അതു രൂപപ്പെടൂ. ഏകപക്ഷീയമായ സ്‌നേഹം വെറുമൊരു ബലപ്രയോഗമായിരിക്കും. അതിനാല്‍ കൊടുക്കുന്നവനും വാങ്ങുന്നവനും സ്വാശീകരിക്കുന്നവനും കൈമാറുന്നവനുമെല്ലാം ഈ മധുരം ഉണ്ടായിരിക്കണം. എവിടെയെങ്കിലും ഒരിടത്ത് അതു മുറിഞ്ഞുപോയാല്‍ അവിടന്നങ്ങോട്ട് മധുരമാണെങ്കിലും സ്‌നേഹം കയ്പ്പായിരിക്കും. ഈ അര്‍ഥങ്ങളെല്ലാം സമ്മേളിച്ച സ്‌നേഹമാണ് നബി(സ) സ്വീകരിച്ചതും അവലംബിച്ചതും പഠിപ്പിച്ചതുമെല്ലാം. അതിനാല്‍ നബി തിരുമേനി(സ) പ്രപഞ്ചത്തിലുള്ള തന്റെ ദൗത്യം നിര്‍വഹിക്കാന്‍ ഉപയോഗപ്പെടുത്തിയ ഒറ്റമൂലി ഈ സ്‌നേഹമായിരുന്നു എന്ന് ഒറ്റവാക്കില്‍ പറയാം. സ്‌നേഹത്തിന്റെ സ്പര്‍ശമില്ലാത്ത ഒന്നും ആ ജീവിതത്തിലുണ്ടായിരുന്നില്ല. സ്‌നേഹം എന്ന വ്യാഖ്യാനത്തിന്റെ പരിധിയില്‍ വരാത്ത ഒന്നും ഉണ്ടായിരുന്നേയില്ല.

വിശ്വാസം, സ്വഭാവം, സമീപനങ്ങള്‍, കടമകള്‍, കടപ്പാടുകള്‍, ബന്ധങ്ങള്‍, ബാധ്യതകള്‍ തുടങ്ങി ഇസ്‌ലാം ഉദ്‌ഘോഷിക്കുന്ന എല്ലാ കാര്യങ്ങളുടെയും അടിത്തറ സ്‌നേഹമാണ്. സ്‌നേഹത്തിന്റെ രൂപത്തിലാണ് ഇസ്‌ലാം മനസ്സുകളിലേക്കും ബന്ധങ്ങളിലേക്കും വീടുകളിലേക്കും കുടുംബങ്ങളിലേക്കും അയല്‍പക്കങ്ങളിലേക്കും അന്യ മതസ്ഥരിലേക്കും ജന്തുജാലങ്ങളിലേക്കും പ്രകൃതിയിലേക്കുപോലും ഇറങ്ങിയത്. സത്യം, സ്‌നേഹം എന്നീ മഹദ് ഗുണങ്ങളെയെല്ലാം ഒരു സദ് വിചാരമായി പരിവര്‍ത്തിപ്പിച്ചെടുത്ത് അത് മൊത്തം മാനുഷ്യകത്തിന്റെ സ്വഭാവമാക്കി പരിവര്‍ത്തിപ്പിച്ചെടുത്തിടത്ത് നബി(സ) യുടെ ദൗത്യം മൂന്നാം ഘടത്തിലെത്തി വിജയം അയാളപ്പെടുത്തുന്നു. ഇതാണ് ആ പ്രബോധന രഹസ്യത്തിന്റെ മൂന്നാം രഹസ്യം. അറിവ്, ഓര്‍മ്മ തുടങ്ങിയവ സദാ പിന്തുടരുന്ന ഒരു തിരിച്ചറിവായി മാറുമ്പോള്‍ അത് വിചാരമായി മാറുന്നു. ഇസ്‌ലാം ഈ വിചാരങ്ങളുടെ സമാഹാരമാണ്. ആശയങ്ങള്‍ മനുഷ്യമനസ്സുകളില്‍ പകര്‍ന്ന്‌കൊടുത്ത് അതിനെ ജീവിതത്തിന്റെ അടിസ്ഥാന വിചാരമാക്കി പരിവര്‍ത്തിപ്പിച്ചെടുത്തതോടെയാണ് കൂട്ടം കൂട്ടമായി ഒഴുകിയെത്തി നിറയുന്ന ഒരു സംഹിതയായി ഇസ്‌ലാം മാറിയത്.

ഷംസീര്‍ കേളോത്ത്

നജീബ് അഹമദ് തിരോധാനത്തിന് അര പതിറ്റാണ്ട് തികഞ്ഞത് കഴിഞ്ഞയാഴ്ചയാണ്. ഡല്‍ഹിയിലെ ക്യാമ്പസുകളിലൊന്നില്‍നിന്ന് ഒരു വിദ്യാര്‍ത്ഥിയുടെ തിരോധാനമുണ്ടാവുകയും പ്രധാന ഏജന്‍സികളൊക്കെ അന്വേഷിച്ചിട്ടും യാതൊരു തുമ്പും കണ്ടെത്താന്‍ കഴിയാതെ കേസന്വേഷണം പാതിവഴിയില്‍ നിലച്ച്‌പോവുകയും ചെയ്തു. നജീബ് അഹമദിന്റേത് വെറും തിരോധാനമായിരുന്നില്ല, നിര്‍ബന്ധിത തിരോധാനമായിരുന്നു. ഒരു മുസ്‌ലിം വിദ്യാര്‍ത്ഥി ശരീരത്തിന്റെ അദൃശ്യവത്കരണമായിരുന്നു. വര്‍ഷാവര്‍ഷം ഒക്ടോബര്‍ പതിനഞ്ചിന് വഴിപാട് പോലെ ഓര്‍ത്തെടുക്കുന്ന സംഭവം മാത്രമായി ഒരു വിദ്യാര്‍ത്ഥിയുടെ തിരോധാനം മാറിയിരിക്കുന്നു. നജീബിനും കുടുംബത്തിനും നീതി ലഭ്യമാക്കുന്നതില്‍ രാജ്യത്തെ അന്വേഷണ ഏജന്‍സികളും നീതിന്യായ സംവിധാനങ്ങളും പൗരസമൂഹവും പരാജയപ്പെട്ടിരിക്കുന്നു. മുസ്‌ലിം ജീവിതങ്ങളെ പൈശാചികവത്കരിച്ച് പൊതുജീവിതം നിഷേധിച്ച് അദൃശ്യവത്കരിക്കുന്ന രീതിയുടെ ഏറ്റവും വേദനിപ്പിക്കുന്ന ഉദാഹരണങ്ങളില്‍ ഒന്നാണ് നജീബ് അഹമദ്. ഒരു വിദ്യാര്‍ത്ഥിയെ സംശയാസ്പദമായ രീതിയില്‍ കാണാതായിട്ട് അഞ്ച് വര്‍ഷം തികഞ്ഞിട്ടും രാഷ്ട്രത്തിന്റെ പൊതുമനസ്സാക്ഷിയെ അത് അസ്വസ്ഥമാക്കുന്നില്ല എന്നിടത്താണ് പ്രശ്‌നത്തിന്റെ കാതല്‍.

വിദ്യാഭ്യാസമെന്ന സ്വപ്‌നം

ഉത്തര്‍പ്രദേശിലെ ബദയൂന്‍ ജില്ലയിലാണ് നജീബിന്റെ വീട്. മുഗള്‍ ഭരണകാലത്ത് ആ സാമ്രാജ്യത്തിന്റെ സൈനിക താവളങ്ങളിലൊന്നായിരുന്നു ബദയൂന്‍. മധ്യകാല പട്ടണത്തിന്റെ ശേഷിപ്പുകള്‍ ഇന്നും അവിടെ കാണാം. ഉപ്പയും ഉമ്മയും മൂന്ന് ആണ്‍മക്കളും ഒരു മകളുമടങ്ങുന്ന ചെറിയ കുടുംബമായിരുന്നു അവന്റേത്. മൂത്ത മകനായിരുന്നു നജീബ് അഹമദ്. പഠിക്കാന്‍ മിടുക്കന്‍. രാജ്യത്തെതന്നെ ഉന്നത സര്‍വ്വകലാശാലകളില്‍ പ്രവേശനം നേടാന്‍ അവന്‍ കൊതിച്ചു. അവന്റെ കൂടെ ആ ചെറിയ കുടുംബവും സ്വപ്‌നങ്ങള്‍ നെയ്ത്കൂട്ടി. ബയോടെക്‌നോളജിയില്‍ മികച്ച പഠനം ഓഫര്‍ ചെയ്യുന്ന നിലവിലുള്ള സ്ഥാപനങ്ങളില്‍ മുന്‍പന്തിയിലാണ് ജെ.എന്‍. യു. പ്രത്യേക പ്രവേശന പരീക്ഷ പാസായ നജീബും ജെ.എന്‍.യുവില്‍ പ്രവേശനം നേടി. ജെ. എന്‍.യുവിന് പുറമേ അലീഗഡ്, ജാമിഅ മില്ലിയ തുടങ്ങി സര്‍വ്വകലാശാല പ്രവേശന പരീക്ഷകളിലും നജീബ് വിജയം നേടിയിരുന്നു. എന്നാല്‍ അവന്‍ പഠനത്തിനായി തെരഞ്ഞെടുത്തത് ജെ. എന്‍.യുവിനെയാണ്. നാടിന് തന്നെ അഭിമാനമായ നേട്ടമായാണ് എല്ലാവരും നജീബിന്റെ ജെ.എന്‍.യു അഡ്മിഷന്‍ കണ്ടതെന്ന് ഒരിക്കല്‍ ബദയൂനിലെ നജീബിന്റെ വീട് സന്ദര്‍ശിച്ചപ്പോള്‍ അവിടുത്തുകാര്‍ നേരിട്ട് പറഞ്ഞിട്ടുണ്ട്. രോഗിയായ ഉപ്പയുടെ പിന്തുണയുണ്ടെങ്കിലും ഉമ്മ ഫാത്തിമ നഫീസയായിരുന്നു നജീബിന്റെ പ്രധാന ചാലകശക്തി. മകന്റെ നേട്ടത്തില്‍ അവരും ഏറെ സന്തോഷിച്ചു. ഉന്നത വിദ്യാഭ്യാസമെന്ന ആ കുടുംബത്തിന്റെ സ്വപ്‌നവും പേറിയാണ് നജീബ് ജെ.എന്‍.യുവിലെത്തിയത്.

അക്രമവും തിരോധാനവും

ആയിരത്തിലേറെ ഏക്കറില്‍ വ്യാപിച്ചു കിടക്കുന്ന ക്യാംപസില്‍ പതിനേഴിലധികം ഹോസ്റ്റലുകളുണ്ട്. മാഹിമാണ്ഡവി ഹോസ്റ്റലിലാണ് നജീബിന് താമസം ശരിയായത്. സംഘ്പരിവാര്‍ വിദ്യാര്‍ത്ഥി സംഘടനയ്ക്ക് സ്വാധീനമുള്ള ജെ. എന്‍.യുവിലെ ഹോസ്റ്റലാണിത്. ഒക്ടോബര്‍ പതിനാലിന് രാത്രി സംഘ്പരിവാര്‍ ബന്ധമുള്ള ചില വിദ്യാര്‍ത്ഥികള്‍ നജീബ് അഹമദിന്റെ റൂമിലെത്തുകയും നജീബുമായി വാക്കുതര്‍ക്കത്തിലേര്‍പ്പെടുകയും ചെയ്തു. നജീബ് തങ്ങളെ ആക്രമിച്ചുവെന്ന വാദമുയര്‍ത്തിയ സംഘം തുടര്‍ന്ന് മാരകമായി നജീബിനെ മര്‍ദ്ദിച്ചു. ആദ്യ വര്‍ഷ വിദ്യാര്‍ത്ഥിയായിരുന്ന നജീബിന് നിസ്സഹായമായി അതൊക്കെ ഏറ്റുവാങ്ങേണ്ടിവന്നു. സഹായത്തിന് പരിചയക്കാരുമുണ്ടായിരുന്നില്ല. ഹോസ്റ്റല്‍ അഡ്മിനിസ്‌ട്രേഷനും ഇടത് വിദ്യാര്‍ത്ഥിയൂനിയന്‍ പ്രതിനിധിയും അക്രമികള്‍ക്ക് പക്ഷംപിടിച്ച് നജീബിനെ കുറ്റക്കാരനാക്കിയാണ് അന്ന് രാത്രി തീരുമാനങ്ങളെടുത്തത്. ഒന്നാംവര്‍ഷ വിദ്യാര്‍ത്ഥിയുടെ മുറിയില്‍ അതിക്രമിച്ച് കയറിയവര്‍ക്കെതിരെയല്ല സ്വന്തം മുറിയില്‍ അക്രമിക്കപ്പെട്ടവനാണ് കുറ്റക്കാരനാക്കപ്പെട്ടത്. നജീബിനൊപ്പം നില്‍ക്കാന്‍ ആരുമില്ലെന്ന് കണ്ട ആക്രമികള്‍ വീണ്ടും കൂടുതല്‍ പേരുമായെത്തി നജീബിനെ മാരകമായി തല്ലി പരിക്കേല്‍പ്പിച്ചു. മറ്റ് വിദ്യാര്‍ത്ഥികളെത്തി നജീബിനെ അക്രമികളില്‍നിന്ന് രക്ഷിക്കുമ്പോഴേക്ക് നജീബ് ക്രൂര ആള്‍ക്കൂട്ട അക്രമണത്തിന് വിധേയമായിക്കഴിഞ്ഞിരുന്നു. അന്ന് രാത്രി നജീബ് ഉമ്മ ഫാത്തിമ നഫീസിനെ വിളിച്ചു കരഞ്ഞിരുന്നു. ഉമ്മാനെ കാണണം, എനിക്കിവിടെ നില്‍ക്കാനാവില്ല, നാട്ടിലേക്ക് തിരികെപോകണമെന്ന് സങ്കടപ്പെട്ടിരുന്നു. മകന്റെ കരച്ചില്‍ കേട്ട് തകര്‍ന്നുപോയ ആ മാതാവ് ഡല്‍ഹിയില്‍ നിന്ന് കിലോമീറ്ററുകളോളം ദൂരത്തുള്ള ബദയൂനില്‍ നിന്ന് ബസ് കയറി ഡല്‍ഹിയിലെ സര്‍വ്വകലാശാലയില്‍ എത്തുമ്പോഴേക്ക് ആ വിദ്യാര്‍ത്ഥി അപ്രത്യക്ഷമായിരുന്നു. പിന്നീടവനെ ആരും കണ്ടിട്ടില്ല. ആ ഉമ്മയുടെ നിലവിളികള്‍ക്ക് ആരും ഉത്തരം നല്‍കിയിട്ടില്ല.

നീതിനിഷേധം

നജീബ് സ്വയം ഇറങ്ങിപ്പോകില്ലെന്നും അവന് ഒരു ദിവസം പോലും തന്നോട് സംസാരിക്കാതിരിക്കാന്‍ കഴിയില്ലെന്നും ഫാത്തിമ നഫീസ് ആവര്‍ത്തിച്ച് പറഞ്ഞുകൊണ്ടിരുന്നു. അധികൃതരാരും അത് ചെവിക്കൊണ്ടില്ല. വിദ്യാര്‍ത്ഥികളുടെ സുരക്ഷ ഉറപ്പാക്കേണ്ട സര്‍വ്വകലാശാല കൃത്യസമയത്ത് പൊലീസില്‍ പരാതി പോലും നല്‍കിയില്ല. ഫാത്തിമ നഫീസാണ് പൊലീസ് സ്റ്റേഷനിലെത്തി പരാതി നല്‍കിയത്. തികഞ്ഞ കൃത്യവിലോപമാണ് കേസന്വേഷിച്ച ഡല്‍ഹി പൊലീസിന്റെ ഭാഗത്ത് നിന്നുണ്ടായത്. അപ്രത്യക്ഷനാക്കപ്പെടുന്നതിന്മുമ്പ് നജീബ് അക്രമിക്കപ്പെട്ടിരുന്നു എന്നതിന് നിരവധി സാക്ഷികളുണ്ടായിട്ടും അക്രമികളെ പ്രതികളാക്കാനോ ശരിയാംവണ്ണം ചോദ്യംചെയ്യാനോ ഏജന്‍സികള്‍ തയ്യാറായില്ല. ക്യാംപസിനെ പിടിച്ചുലയ്ക്കുന്ന തരത്തിലേക്ക് വിദ്യാര്‍ത്ഥി സമരം വളര്‍ന്നിട്ടും നജീബിനെ കണ്ടെത്താനുള്ള ആത്മാര്‍ത്ഥമായുള്ള ശ്രമങ്ങളുണ്ടായില്ല. നജീബിന്റെ കുടുംബത്തേയും നജീബിനെയും കുറ്റക്കാരാക്കാനുള്ള ശ്രമങ്ങളാണ് പിന്നീടുണ്ടായത്. പുലര്‍ച്ചെ നജീബിന്റെ വീട് റെയ്ഡ് ചെയ്തും മറ്റും നജീബിനെ വീട്ടുകാര്‍ തന്നെ ഒളിപ്പിച്ചുവെക്കുകയാണെന്ന് പ്രചരിപ്പിക്കാനുള്ള ശ്രമങ്ങളുണ്ടായി. ഫാത്തിമ നഫീസിന് പല സമരങ്ങള്‍ക്കിടയിലും മര്‍ദ്ദനമേറ്റുവാങ്ങേണ്ടിവന്നു. നജീബ് അഹമദ് ഐസിസില്‍ ചേര്‍ന്നെന്ന് വരെ ചില മാധ്യമങ്ങള്‍ പ്രചരിപ്പിച്ചു. മുസ്‌ലിംലീഗ് എം.പി ഇ.ടി മുഹമ്മദ് ബഷീറടക്കമുള്ളവര്‍ പാര്‍ലമെന്റിലടക്കം വിഷയമുയര്‍ത്തി. സി.ബി.ഐ അന്വേഷണം വേണമെന്ന് ഇ.ടി അടക്കമുള്ളവര്‍ ആവശ്യപ്പെട്ടു. സി.ബി.ഐ കേസന്വേഷണം ഏറ്റടുത്തു. കാര്യമായ ഫലങ്ങളൊന്നുമുണ്ടായില്ല. തെളിവില്ലെന്ന് കാരണം പറഞ്ഞ് അവരും കേസന്വേഷണം അവസാനിപ്പിച്ചു. ഫാത്തിമ നഫീസിന്റെ ചോദ്യത്തിന് ഇനിയും ഉത്തരമില്ല, നജീബ് എന്റെ മകന്‍ എവിടെ?

സര്‍സയ്യിദും നജീബും

ഇന്ത്യാ ഉപഭൂഖണ്ഡത്തിലെ വിദ്യാഭ്യാസരാഷ്ട്രീയ നവോത്ഥാനത്തിന്റെ ജ്വലിക്കുന്ന പ്രതീകമായ സര്‍സയ്യിദ് അഹമദ് ഖാന്റെ ജന്മദിനമായിരുന്നു ഇന്നലെ. ഒന്നാം സ്വാതനന്ത്ര്യ സമരത്തെ തുടര്‍ന്ന് ഭരണകൂട വേട്ടക്ക് വിധേയമായ സമുദായത്തെ ഉയര്‍ത്തെഴുനേല്‍ക്കാനുള്ള ഇന്ധനം നല്‍കി ആധുനിക ലോകക്രമത്തിന്റെ പുതിയ സാധ്യതകളെ പരിചയപ്പെടുത്തിയത് അദ്ദേഹമായിരുന്നു. അലീഗഢ് വിദ്യാഭ്യാസ പ്രസ്ഥാനത്തിലൂടെ ഒരു സമുദായത്തെ ശാക്തീകരിച്ചവന്റെ ഓര്‍മ്മകള്‍ക്കൊപ്പമാണ് നജീബെന്ന വിദ്യാര്‍ത്ഥിയുടെ തിരോധാനത്തിന്റെ ഓര്‍മ്മകളും വര്‍ഷാവര്‍ഷം നമുക്ക് മുന്നിലെത്തുന്നത്. പഠിക്കാന്‍ പറഞ്ഞവന്റെ ഓര്‍മ്മകള്‍ക്ക് മുകളില്‍ പഠിക്കാനിറങ്ങി പാതിവഴിയില്‍ വീണുപോയ ഒരു വിദ്യാര്‍ത്ഥിയുടെ നൊമ്പരങ്ങള്‍ നമ്മെ വരിഞ്ഞുമുറുക്കുന്നു. വിദ്യാഭ്യാസ ജിഹാദെന്ന് അലറിവിളിക്കുന്ന അധ്യാപകര്‍ക്കിടയില്‍ അക്ഷരാഭ്യാസം നടത്തേണ്ട പുതുതലമുറയിലെ വിദ്യാര്‍ത്ഥികള്‍ക്ക് നജീബിന്റെ ഉമ്മ ഫാത്തിമ നഫീസിന്റെ വാക്കുകളാണ് കരുത്താവേണ്ടത്. നിരത്തുകളില്‍ തന്റെ മകന് വേണ്ടി സമരത്തിനിറങ്ങുമ്പോഴും അവര്‍ പറഞ്ഞുകൊണ്ടിരിക്കുന്നത് പിന്നാക്ക ന്യൂനപക്ഷങ്ങളോട് പഠിക്കാനാണ്. വിദ്യാഭ്യാസം നേടാന്‍ ശ്രമിച്ചതിനാലാണ് തന്റെ മകനെയവര്‍ അപ്രത്യക്ഷനാക്കിയതെന്നും അത് കണ്ട് ഭയപ്പെടരുതെന്നും അവര്‍ പറയുന്നു. ധൈര്യമായി പഠിക്കാനും വിദ്യകൊണ്ട് കരുത്തരാവാനുമാണ്് അവര്‍ നല്‍കുന്ന സന്ദേശം. സാഹചര്യങ്ങളൊക്കെ എതിരായിരുന്നിട്ടും സമുദായത്തോട് സര്‍ സയ്യിദ് അഹമദ് ഖാന്‍ ആഹ്വാനം ചെയ്തതും അതായിരുന്നുവല്ലോ.