സി.പി സദക്കത്തുള്ള

ബംഗളൂരു: രണ്ട് നിയമസഭാ മണ്ഡലങ്ങകളിലേക്കും മൂന്നു പാര്‍ലമെന്റ് സീറ്റുകളിലേക്കുമുള്ള ഉപതിരഞ്ഞെടുപ്പ് പ്രചാരണത്തിന് ചൂടും ചൂരുമേറി. മുന്‍ മുഖ്യമന്ത്രി സിദ്ധരാമയ്യ മുഖ്യമന്ത്രി കുമാരസ്വാമിയുമായി തോളോട് തോള്‍ ചേര്‍ന്ന് പ്രചാരണ രംഗത്ത് സജീവമായത് പ്രവര്‍ത്തകരെ ആവേശത്തിലാഴ്ത്തി. പതിറ്റാണ്ടുകള്‍ക്ക് ശേഷം ആദ്യമായി സിദ്ധരാമയ്യയും മന്ത്രി ഡി.കെ.ശിവകുമാറും ദള്‍ നേതാവ് ദേവഗൗഡയും കോര്‍ കമ്മിറ്റി യോഗത്തില്‍ പങ്കെടുത്തു.

നിയമസഭാ മണ്ഡലമായ രാമ നഗരയില്‍ കുമാരസ്വാമിയുടെ ഭാര്യ അനിതയും ജംക്കണ്ടിയില്‍ കോണ്‍ഗ്രസ് സ്ഥാനാര്‍ഥി ആനന്ദ് ന്യമ ഗൗഡയുമാണ് കോണ്‍ഗ്രസ്-ദള്‍ സഖ്യസ്ഥാനാര്‍ത്ഥികള്‍. ബെല്ലാരി ഷീമോഗ, മണ്ടിയ എന്നീ പാര്‍ലമെന്റ് മണ്ഡലങ്ങളിലും പ്രചരണം കൊഴുത്തു.
ഖനി പ്രമാണിമാരായ റെഡ്ഢി സഹോദരങ്ങളുടെ ശക്തി കേന്ദ്രമായ ബെല്ലാരിയില്‍ മുന്‍ എം.പി.യും കര്‍ണാടക ബി.ജെ.പി യുടെ കിംഗ് മേക്കറുമായി മാറിയ ഖനി വ്യവസായി ശ്രീരാമുലുവിന്റെ സഹോദരി ജെ.ശാന്തയാണ് ബി.ജെ.പി സ്ഥാനാര്‍ത്ഥി. മുന്‍ മുഖ്യ മന്ത്രിയും സഖ്യകക്ഷി കോര്‍ഡിനേഷന്‍ ചെയര്‍മാനുമായ സിദ്ധാരാമയ്യയുടെ അടുത്തയാളുമായ വി.എസ്.ഉഗ്രപ്പയെയാണ് ബെല്ലാരി പിടിക്കാന്‍ കോണ്‍ഗ്രസ്സ് രംഗത്തിറക്കിയിരിക്കുന്നത്.

ഒട്ടേറെ ചരിത്ര പ്രാധാന്യമുള്ള മണ്ഡലമാണ് ബെല്ലാരി. 1999 ല്‍ സോണിയ ഗാന്ധി രണ്ടാം മണ്ഡലമായി മത്സരിച്ചു 56100 വോട്ടിനു വിജയിച്ച മണ്ഡലം പിന്നീട് ബിജെപിയുടെ കയ്യിലമരുകയായിരുന്നു. അന്ന് സുഷമ സ്വരാജിനെയാണ് സോണിയയ്‌ക്കെതിരെ ബിജെപി കളത്തിലിറക്കിയത്.
മൂന്നു മുന്‍ മുഖ്യമന്ത്രിമാരുടെ മക്കള്‍ മത്സര രംഗത്തുള്ള ഷീമോഗയില്‍ മത്സരം കടുത്തതായി മാറിക്കഴിഞ്ഞു. ബിജെപി ക്കു വേണ്ടി യദിയൂരപ്പയുടെ മകന്‍ രാഘവേന്ദ്ര മത്സരിക്കുമ്പോള്‍ ദള്‍ കോണ്‍ഗ്രസ് സഖ്യസ്ഥാനാര്‍ഥിയായി ദള്‍ ചിഹ്നത്തില്‍ മുന്‍ മുഖ്യമന്ത്രി ബങ്കാരപ്പയുടെ പുത്രന്‍ മധു ബങ്കാരപ്പ കനത്ത വെല്ലുവിളിയാണ് ബിജെപി ക്ക് ഉയര്‍ത്തുന്നത്. മറ്റൊരു മുന്‍മുഖ്യ മന്ത്രി ജെ.എഛ്.പാട്ടീലിന്റെ മകന്‍ മഹിമ പാട്ടീല്‍ ജനതദള്‍ യു സ്ഥാനാര്‍ത്ഥിയായി രംഗത്തുണ്ട് . മാണ്ട്യയില്‍ ദള്‍ കോണ്‍ഗ്രസ് സ്ഥാനാര്‍ത്ഥിയായി ജനത ദളിലെ എല്‍.ആര്‍.ശിവരാമ ഗൗഡ ബിജെപി സ്ഥാനാര്‍ഥി എല്‍.ചന്ദ്രശേഖറേ ക്കാള്‍ പ്രചാരണത്തില്‍ ഏറെ മുന്നേറി കഴിഞ്ഞു. കന്നഡ സിനിമ താരം അംബരീഷ് കോണ്‍ഗ്രസിനായി നിരവധി തവണ വിജയിച്ച ഇവിടെ സീറ്റ് ജനത ദളിന്ന് വിട്ടുകൊടുക്കുകയാണുണ്ടായത് .

വരാനിരിക്കുന്ന പൊതു തിരഞ്ഞെടുപ്പിന്റെ സെമിഫൈനലായാണ് ഇരു വിഭാഗവും ഉപതിരഞ്ഞെടുപ്പുകളെ നോക്കി കാണുന്നത്. ഒപ്പം സംസ്ഥാനം ഭരിക്കുന്ന കോണ്‍ഗ്രസ്-ദള്‍ സര്‍ക്കാരിന്റെ കെട്ടുറപ്പും തിരഞ്ഞെടുപ്പില്‍ പ്രതിഫലിക്കുന്നതിനാല്‍ ശക്തമായ പ്രചാരമാണ് മണ്ഡലങ്ങളില്‍ നടക്കുന്നത് .എഐസിസി ജനറല്‍ സെക്രട്ടറി കെ.സി.വേണുഗോപാലിന്റെ ശക്തമായ നിരീക്ഷണത്തിലാണ് കോണ്‍ഗ്രസ് പ്രവര്‍ത്തനങ്ങള്‍ ഏകോപിപ്പിക്കുന്നത് . മുന്‍ പ്രധാന മന്ത്രി ദേവ ഗൗഡ, മകനും മുഖ്യമന്ത്രിയുമായ കുമാരസ്വാമി, മുതിര്‍ന്ന നേതാക്കളായ മുന്‍ മുഖ്യ മന്ത്രി സിദ്ധരാമയ്യ കെ.പി.സി.സി അധ്യക്ഷന്‍ കൃഷ്ണ ഭൈരഗൗഡ, പ്രിയങ്ക് കാര്‍ഗെ, ഉപമുഖ്യമന്ത്രി ജി.പരമേശ്വര മന്ത്രി ഡി.കെ.ശിവകുമാര്‍ എന്നിവരാണ് സഖ്യമുന്നണി പ്രചാരണത്തിന് ചുക്കാന്‍ പിടിക്കുന്നത്.

വരും ദിവസങ്ങളില്‍ കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയടക്കമുള്ള ദേശീയ നേതാക്കളും കര്‍ണാടകയില്‍ എത്തിച്ചേരും. മുന്‍ മുഖ്യമന്ത്രി യെദിയൂരപ്പ. ശ്രീരാമുലു,ശോഭ കരന്തലജെ ,സ്.ടി. രവി ,വി.സോമണ്ണ എന്നിവരാണ് ബിജെപിക്കായി പ്രചാരണം നയിക്കുന്നത് .
മുന്‍ തിരഞ്ഞെടുപ്പുകളില്‍ വലിയതോതില്‍ കള്ളപ്പണം പിടിച്ചെടുത്ത സാഹചര്യത്തില്‍ പഴുതടച്ചുള്ള നിരീക്ഷണമാണ് തിരഞ്ഞെടുപ്പ് കമ്മീഷന്‍ ഒരുക്കിയിരിക്കുന്നത്. ബസ് യാത്രക്കാരനില്‍ നിന്നും കണക്കില്‍ പെടാത്ത പതിനൊന്നു ലക്ഷം കഴിഞ്ഞ ദിവസം തിരഞ്ഞെടുപ്പ് ഫ്‌ളയിങ് സ്‌കോട് ബെല്ലാരി മേഖലയില്‍ നിന്നും പിടിച്ചെടുത്തിരുന്നു .