columns
പരിഹാരം കാണേണ്ട അക്കാദമിക പ്രശ്നങ്ങള്
പഠന വിടവ് എങ്ങിനെ പരിഹരിക്കാമെന്നത് ഗൗരവമായി ചര്ച്ച ചെയ്തു തീരുമാനിക്കേണ്ടതാണ്. സ്കൂള് തുറന്ന ഉടനെ പാഠഭാഗങ്ങള് തീര്ക്കുക എന്ന പതിവ് രീതിയാണ് പിന്തുടരുന്നതെങ്കില് അതിന് ഭാവിയില് വലിയ വിലനല്കേണ്ടിവരും. ഓരോ ക്ലാസിലും ഓണ്ലൈന് പഠനം ഇപ്പോള് എത്തിയ ഇടത്തുനിന്ന് സ്വാഭാവിക പഠനം തുടരുകയാണെങ്കില് കുട്ടികളില് വലിയ മാനസിക സംഘര്ഷം അതുണ്ടാക്കും. ഒരേ ക്ലാസില്തന്നെ പൂര്ണ്ണമായും ഓണ്ലൈന് പഠനം കിട്ടിയവരും ഭാഗികമായി കിട്ടിയവരും തീരെ കിട്ടാത്തവരുമുണ്ടാകും. ഇത്തരം സാഹചര്യത്തെ നേരിടാന് ശരിയായ ആസൂത്രണവും പ്രവര്ത്തനങ്ങളും അനിവാര്യമാണ്.
ചരിത്രത്തിലെ ഏറ്റവും വലിയ വിദ്യാഭ്യാസ തകര്ച്ചയാണ് കോവിഡ് മഹാമാരിമൂലം ഉണ്ടായതെന്നാണ് യുനെസ്കോ നടത്തിയ പഠനത്തില് കണ്ടെത്തിയത്. 190 രാജ്യങ്ങളിലെ 1.6 ബില്യണ് കുട്ടികള് ഈ കാലയളവില് സ്കൂളിന് പുറത്താണ്. ലോകമൊട്ടാകെ ഭാഗികമായോ പൂര്ണ്ണമായോ ഉള്ള അടച്ചിടല് 800 മില്യണ് കുട്ടികളെ ബാധിച്ചതായും യുനെസ്കോ പറയുന്നു. 2019-20 യു ഡയസ് കണക്ക്പ്രകാരം 15.1 ലക്ഷം വിദ്യാലയങ്ങളാണ് ഇന്ത്യയിലുള്ളത്. ഈ വിദ്യാലയങ്ങളിലെ 2.64 കോടി വിദ്യാര്ത്ഥികളെ മഹാമാരി സ്കൂളനുഭവങ്ങളില്നിന്നും മാറ്റിനിര്ത്തപ്പെട്ടു എന്നും 32 കോടി പഠിതാക്കളെ അടച്ചുപൂട്ടല് കാര്യമായി ബാധിച്ചിട്ടുണ്ടെന്നും മാനവ വിഭവ വകുപ്പിന്റെ പഠനങ്ങളില് കാണുന്നു. കേരളത്തില് മൊത്തം കുട്ടികളില് 41.8 ശതമാനം പേര്ക്ക് ശരിയായ ഓണ്ലൈന് പഠനം പോലും ലഭിച്ചില്ല എന്ന റിപ്പോര്ട്ടും മുമ്പിലുണ്ട്. ഈ സാഹചര്യത്തിലാണ് ഒന്നര വര്ഷത്തെ ഇടവേളക്ക് ശേഷം സംസ്ഥാനത്തെ വിദ്യാലയങ്ങള് നവംബര് ഒന്നിന് തുറക്കുന്നത്. 2020 മാര്ച്ചിലെ പൊതുപരീക്ഷകള് പകുതിയിലധികം പിന്നിട്ടപ്പോഴാണ് സ്കൂളുകള് പൂര്ണ്ണമായ അടച്ചിടലിലേക്ക് നീങ്ങിയത്. തുടര്ന്നിങ്ങോട്ട് അധ്യയനം നടന്നത് ഓണ്ലൈന് രീതിയിലാണ്. മുന്കൂട്ടി റെക്കോര്ഡ്ചെയ്ത പാഠഭാഗങ്ങള് വിക്ടേഴ്സ് ചാനല് അടക്കമുള്ള സങ്കേതങ്ങള്വഴി സംപ്രേഷണം ചെയ്യുന്ന രീതിയാണ് അവലംബിച്ചത്. ഈ പഠനം കുട്ടികള്ക്കിടയില് വലിയൊരു ഡിജിറ്റല് ഡിവൈഡ് തീര്ത്തു എന്നത് യാഥാര്ഥ്യമാണ്. തുടക്കത്തില് ആവേശപൂര്വ്വം ഈ പഠന രീതിയെ സ്വീകരിച്ച വിദ്യാര്ത്ഥികള്ക്ക് പിന്നീട് മുരടിപ്പും വിരസതയുമാണ് സമ്മാനിച്ചത്.
ജൈവികമായ പഠനത്തിന്റെ നീണ്ട ഇടവേള കുട്ടികളില് നിരവധി മാനസിക ആരോഗ്യ സാമൂഹിക പഠന പ്രശ്നങ്ങള് സൃഷ്ടിച്ചിട്ടുണ്ട്. കോഴിക്കോട് ഇംഹാന്സ് ശാസ്ത്ര സാഹിത്യ പരിഷത്തുമായി ചേര്ന്ന് നടത്തിയ പഠനത്തില് കോവിഡ് കുട്ടികളില് 45 ശതമാനം പേര്ക്ക് പൊണ്ണത്തടി കോവിബിസിറ്റി ബാധിച്ചെന്നാണ് കണ്ടത്. യാതൊരു വിനോദവുമില്ലാതെ ടെലിവിഷന്റെയും മൊബൈല് ഫോണിന്റെയും കമ്പ്യൂട്ടറിന്റെയും മുമ്പിലെ തുടര്ച്ചയായുള്ള ഇരുത്തം കുട്ടികളിലെ ശരീര ഭാരം വര്ധിപ്പിച്ചു എന്നാണ് പഠനം പറയുന്നത്. നീണ്ട കാലം വിദ്യാലയങ്ങളില് നിന്ന് വിട്ട്നിന്നത് കുട്ടികളില് ഒട്ടേറെ മാനസിക പ്രശ്നങ്ങള് സൃഷ്ടിച്ചിട്ടുണ്ട്. പഠന പ്രശ്നങ്ങളുള്ള കുട്ടികളുടെ എണ്ണത്തില് വലിയ വര്ധനയുണ്ടായിട്ടുണ്ട്. കൂട്ടുകാരുമായി സമ്പര്ക്കമില്ലാതെ ഒറ്റയ്ക്ക് വീട്ടിലിരിക്കല്, അധ്യാപകരുമായുള്ള സ്വാഭാവിക ആശയവിനിമയം ഇല്ലാതെയായത്, സമപ്രായക്കാരുമൊത്തുള്ള കളികളില് ഏര്പ്പെടാതെയായത്, പഠന പ്രവര്ത്തനങ്ങളുടെ ഭാഗമായുള്ള സംഘപഠനം, സഹവര്ത്തിത പഠനം, പങ്കുവെച്ചുള്ള പഠനം ഇവയൊക്കെ നഷ്ടപ്പെട്ടത് കൂടുതല് കുട്ടികളില് ഒരുതരം മുരടിപ്പുണ്ടാക്കി. ഇതവരെ പഠനത്തില്നിന്നും പിന്നോട്ട് വലിച്ചിട്ടുണ്ടെന്നതും വസ്തുതയാണ്. കോവിഡ് തീര്ത്ത പഠന വിടവ് വിദ്യാഭ്യാസ മേഖല അഭിമുഖീകരിക്കുന്ന വലിയൊരു അക്കാദമിക പ്രതിസന്ധിയാണ്. ആശയ തലത്തിലും നൈപുണീ തലത്തിലും ഈ വിടവ് പ്രകടമാണ്. വായന, എഴുത്ത്, ഗണിതാശയങ്ങളുടെ വികാസം, ഭാഷാവികസനം, പ്രശ്നപരിഹരണശേഷി തുടങ്ങി ആശയ പ്രായോഗിക തല നൈപുണീ ശോഷണം പഠന വികാസത്തില് വലിയ ഇടിവാണുണ്ടാക്കിയിരിക്കുന്നത്. സാമൂഹിക തലത്തില് കുട്ടികള് ആര്ജ്ജിക്കേണ്ട നൈപുണികളായ മറ്റുള്ളവരുമായി കൂട്ടുകൂടല്, പങ്കുവെക്കല്, എംപതി, ഊഴം കാത്തുനില്ക്കല്, ആശയവിനിമയ മര്യാദകള്, സഹകരണ ചിന്ത തുടങ്ങിയവ കുട്ടികള്ക്ക് അന്യമായി. യു.എന് പറയുന്നത് സ്കൂള് അടച്ചുപൂട്ടല്മൂലം 188 രാജ്യങ്ങളിലെ 150 കോടി പഠിതാക്കള്ക്ക് ഏറിയോ കുറഞ്ഞോ പഠന നഷ്ടം സംഭവിച്ചുവെന്നാണ്. പല വിദേശരാജ്യങ്ങളും ഇത് പഠനവിധേയമാക്കിയിട്ടുണ്ട്. ഉദാഹരണത്തിന് നെതര്ലാന്ഡ്സില് ഏതാനും ആഴ്ചകള് മാത്രമേ സ്കൂളുകള് പൂര്ണ്ണമായും അടച്ചിട്ടിട്ടുള്ളു. എന്നിട്ടും കുട്ടികള്ക്ക് ഉണ്ടാകേണ്ട പഠന നേട്ടത്തില് അഞ്ചില് ഒന്ന് കുറവ് വന്നു. ഇന്റര്നെറ്റ് കണക്റ്റിവിറ്റിയില് വളരെയേറെ മുന്നില്നില്ക്കുന്ന ഇവിടെ പോലും ഇത്രയേറെ പഠനശോഷണം സംഭവിച്ചുവെങ്കില് ഇന്ത്യയിലെയും കേരളത്തിലെയും അവസ്ഥ ഊഹിക്കാവുന്നതേയുള്ളൂ. കോവിഡ് ദുരന്തം ഏറ്റവുമധികം ബാധിച്ച രാജ്യങ്ങളില് ഒന്നാണ് ഉക്രൈന്. ആ രാജ്യം പഠനനഷ്ടം പരിഹരിക്കാനായുള്ള പ്രവര്ത്തനങ്ങള്ക്കായി വിദ്യാഭ്യാസ ബജറ്റ് പാസ്സാക്കിയെടുക്കുകയുണ്ടായി. അവര് പഠനം വീണ്ടെടുക്കല് പരിപാടി ആവിഷ്കരിച്ചു നടപ്പാക്കിവരുന്നു. നല്ല വിദ്യാഭ്യാസ പശ്ചാത്തലമുള്ള രക്ഷിതാക്കളുടെ കുട്ടികള്ക്കിടയില് പഠന നഷ്ടത്തിന്റെ തോത് കുറയുമായിരിക്കും. എന്നാല് കുറഞ്ഞ വിദ്യാഭ്യാസമുള്ള രക്ഷിതാക്കളുടെ മക്കള്, പ്രാന്തവത്കരിക്കപ്പെട്ട വിഭാഗങ്ങളിലെ കുട്ടികള്, ഓണ്ലൈന് പഠനത്തിന് ഇന്നുവരെ അവസരം കിട്ടാത്തവര്, പ്രത്യേക പരിഗണന അര്ഹിക്കുന്ന കുട്ടികള്, ഇവരുടെ ഇടയില് പഠന നഷ്ടം വലിയ അളവിലായിരിക്കും.
പഠന വിടവ് എങ്ങിനെ പരിഹരിക്കാമെന്നത് ഗൗരവമായി ചര്ച്ച ചെയ്തു തീരുമാനിക്കേണ്ടതാണ്. സ്കൂള് തുറന്ന ഉടനെ പാഠഭാഗങ്ങള് തീര്ക്കുക എന്ന പതിവ് രീതിയാണ് പിന്തുടരുന്നതെങ്കില് അതിന് ഭാവിയില് വലിയ വിലനല്കേണ്ടിവരും. ഓരോ ക്ലാസിലും ഓണ്ലൈന് പഠനം ഇപ്പോള് എത്തിയ ഇടത്തുനിന്ന് സ്വാഭാവിക പഠനം തുടരുകയാണെങ്കില് കുട്ടികളില് വലിയ മാനസിക സംഘര്ഷം അതുണ്ടാക്കും. ഒരേ ക്ലാസില്തന്നെ പൂര്ണ്ണമായും ഓണ്ലൈന് പഠനം കിട്ടിയവരും ഭാഗികമായി കിട്ടിയവരും തീരെ കിട്ടാത്തവരുമുണ്ടാകും. ഇത്തരം സാഹചര്യത്തെ നേരിടാന് ശരിയായ ആസൂത്രണവും പ്രവര്ത്തനങ്ങളും അനിവാര്യമാണ്. ഒന്നാം തരത്തില് ഈ വര്ഷം പ്രവേശനം നേടിയ കുട്ടി പ്രീ സ്കൂള് വിദ്യാഭ്യാസം കിട്ടാതെയാണ് വരുന്നത്. നേരത്തെ പ്രീ സ്കൂള് വിദ്യാഭ്യാസം നേടിയ കുട്ടി ഒന്നാം തരവും കഴിഞ്ഞു ഇപ്പോള് രണ്ടാംതരം പകുതി പിന്നിട്ടിരിക്കയാണ്. രണ്ട് വയസ്സ്മുതല് ഏഴു വയസ്സ് വരെയുള്ള കുട്ടിയുടെ വളര്ച്ചാഘട്ടത്തിലാണ് വൈജ്ഞാനിക വികാസം ഏറെ നടക്കുന്നത്. അതുകൊണ്ട്തന്നെ പ്രീ സ്കൂള് കഴിഞ്ഞു ഒന്നിലും രണ്ടിലും എത്തുന്ന കുട്ടി ആര്ജ്ജിക്കേണ്ട നിരവധി ശേഷികളിലാണ് ഈ ഒന്നര വര്ഷം വലിയ ശോഷണം വന്നിരിക്കുന്നത്. എഴുതാനും വായിക്കാനും ഗണിതക്രിയകള് ചെയ്യാനും ശാസ്ത്രാഭിരുചി നേടാനുമൊക്കെ കുട്ടിക്ക് അനായാസം കഴിയേണ്ട സാഹചര്യമാണ് നഷ്ടമായത്. കഴിഞ്ഞ വര്ഷം പ്ലസ്വണ് പ്രവേശനം നേടി ഒരു റഗുലര് ക്ലാസും ലഭിക്കാതെ പ്ലസ്ടുവില് ഇപ്പോള് പാതി പിന്നിട്ട കുട്ടി കോഴ്സ് പൂര്ത്തിയാക്കിയ സര്ട്ടിഫിക്കറ്റുമായി പുറത്ത്വരുന്നത് ഒന്നാലോചിച്ചു നോക്കൂ.
കുട്ടികള്ക്ക് വന്ന പഠന നഷ്ടം വീണ്ടെടുക്കാന് സമഗ്രപ്രവര്ത്തനങ്ങള് വകുപ്പ് തലത്തില് ആസൂത്രണം ചെയ്യേണ്ടതുണ്ട്. സ്കൂള് തുറക്കുന്നതിനായി മാര്ഗനിര്ദേശങ്ങള് സര്ക്കാര് പുറപ്പെടുവിച്ചിട്ടുണ്ട്. കുട്ടികളുടെ മാനസിക പിരിമുറുക്കം ലഘൂകരിക്കാനുള്ള കര്മ്മപദ്ധതിയും നല്കിയിട്ടുണ്ട്. എന്നാല് പഠന നഷ്ടം പോലെയുള്ള അക്കാദമിക വിഷയങ്ങളില് കാര്യമായ ശ്രദ്ധ ഇതുവരെ വന്നിട്ടില്ല. ഓണ്ലൈന് പഠനത്തില് ഓരോ കുട്ടിയും എത്രമാത്രം പങ്കാളിയായി, ഉദ്ദേശിച്ച പഠന നേട്ടം ഉറപ്പ്വരുത്താന് കുട്ടിക്കായോ തുടങ്ങിയ വിലയിരുത്തല് അനിവാര്യമാണ്. ഇതില് കണ്ടെത്തുന്ന പ്രശ്നങ്ങള് സ്കൂള് തലത്തില് പരിഹരിക്കാന് നീക്കംവേണം. ഓരോ ക്ലാസിലും വ്യത്യസ്ത നിലവാരത്തിലുള്ള കുട്ടികളുണ്ടാകും. ഇതില് പഠനശോഷണം കാര്യമായി ബാധിച്ചവരും ഒന്നര വര്ഷം മുമ്പുള്ള പഠനാവസ്ഥയിലുള്ളവരുമുണ്ടാകും. സ്കൂള് തുറന്ന് മൂന്ന് മാസമെങ്കിലും ഇത്തരം കുട്ടികളെ അഭിമുഖീകരിക്കാനുള്ള പദ്ധതികള് ഉണ്ടാകണം. കരിക്കുലവുമായി ബന്ധപ്പെട്ട കാര്യത്തില് തീരുമാനനെടുക്കേണ്ടത് കരിക്കുലം കമ്മിറ്റിയും എസ്.സി.ഇ.ആര്.ടിയുമാണ്. ഇപ്പോഴത്തെ സാഹചര്യം കണക്കിലെടുത്താല് നിലവിലെ കരിക്കുലം നേരിട്ട് വിനിമയംചെയ്യാതെ കുട്ടികള്ക്ക് വന്ന പഠന നഷ്ടം വീണ്ടെടുക്കാനുതകുന്ന രൂപത്തില് ആള്ട്ടര്നേറ്റീവ് കരിക്കുലം ഉണ്ടാക്കണം. കുട്ടികള്ക്ക് കിട്ടേണ്ട പഠന നേട്ടങ്ങള് ലിസ്റ്റ് ചെയ്ത് ബദല് കരിക്കുലം രൂപീകരിക്കണം. രണ്ട് മൂന്ന് മാസത്തിനുള്ളില് കുട്ടി ആര്ജ്ജിക്കേണ്ട ശേഷി നേടാനുതകുന്നതും പ്രാദേശിക വഴക്കമുള്ളതുമാകണം. ക്ലാസ് റൂം പഠന പ്രവര്ത്തനങ്ങള് ഇതനുസരിച്ചു ആസൂത്രണം ചെയ്യണം. പ്രൈമറി ക്ലാസുകളില് എസ്.എസ്.കെ പഠനം പ്രവര്ത്തനാധിഷ്ഠിതമാക്കാന് വര്ക്ഷീറ്റുകള് തയ്യാറാക്കി നല്കണം. പത്താംതരത്തിലും ഹയര്സെക്കണ്ടറി തലത്തിലും കഴിഞ്ഞ വര്ഷത്തെപോലെ ഫോക്കസ് ഏരിയ നിശ്ചയിക്കണം. പ്രധാന വിഷയങ്ങളില് കുട്ടികള്ക്ക് പഠനതുടര്ച്ച പ്രതിസന്ധിയുണ്ടോ എന്ന് തുടക്കത്തില്തന്നെ കണ്ടെത്തി ഉണ്ടെങ്കില് ആദ്യത്തെ ഒരു മാസം അത് നികത്താന് പഠന പ്രവര്ത്തനങ്ങള് ക്രമീകരിക്കണം. അഞ്ചു മുതല് ഒന്പത് വരെ ക്ലാസുകളില് ബദല് പാഠ്യപദ്ധതിയില് പറയുന്ന നേട്ടംകൈവരിക്കാനായി ബ്രിഡ്ജ് മെറ്റീരിയല് ഉണ്ടാക്കിനല്കണം. സ്വന്തം സാഹചര്യങ്ങള്ക്കനുസരിച്ചു ഓരോ വിദ്യാലയവും കുട്ടികള്ക്ക് നേരിട്ട പഠനനഷ്ടം നികത്തല് മുഖ്യ അക്കാദമിക വിഷയമായി എടുക്കണം.
അബ്ദുല്ല വാവൂര്
columns
ദേശീയത ചര്ച്ചയാകുമ്പോള്-പി.എ ജലീല് വയനാട്
‘ഭാരതമെന്നു കേട്ടാലഭിമാനപൂരിതമാകണമെന്നന്തരംഗം, കേരളമെന്നു കേട്ടാലോ തിളക്കണം ചോര നമുക്ക് ഞരമ്പുകളില്’ എന്ന വള്ളത്തോളിന്റെ വരികള് പോലും വിശാല അര്ഥത്തില് വിമര്ശന വിധേയമായ നാടാണ് നമ്മുടേത്. അങ്ങനെയെങ്കില് ജനിച്ച സ്ഥലത്തിന്റെ പേര് കേട്ടാല് മനുഷ്യന് നില്ക്കക്കള്ളി നഷ്ടപ്പെടില്ലേ എന്ന് ചോദിച്ച കേസരി ബാലകൃഷ്ണപിള്ളയെയും ഇപ്പോള് സ്മരിക്കേണ്ടതാണ്. കാരണം ദേശ രാഷ്ട്ര ചിന്തകള്കൊണ്ട് മനുഷ്യന് ഭ്രാന്ത് പിടിക്കുന്ന അവസ്ഥയിലേക്കാണ് പുതിയ മനുഷ്യന് നീങ്ങുന്നത്.
പ്രത്യേക ഭൂവിഭാഗത്തില് ജനങ്ങള് സ്ഥിരമായി, പരമാധികാരമുള്ള ഭരണത്തിന് കീഴില് ജീവിച്ചാല് അതൊരു രാജ്യമായി മാറുന്നു. എന്നാല് ആ പ്രത്യേക ഭൂവിഭാഗത്തിലെ ജനങ്ങളുടെ ഏകതാ ബോധവും പരസ്പര സ്നേഹവും സുഖദുഃഖങ്ങളുടെ മത വര്ഗ നിരപേക്ഷ സ്വീകാര്യതയും ചരിത്ര ബോധവുമാണ് ആ രാജ്യത്തെ ദേശ രാഷ്ട്രമാക്കുന്നത്. പാശ്ചാത്യ യൂറോപ്യന് രാജ്യങ്ങളെ ഏകോപിപ്പിച്ചതിനും ചരിത്രബോധം നല്കിയതിനും പിന്നില് മതത്തിനോ മതാധിഷ്ഠിത ഭരണകൂടങ്ങള്ക്കോ ഉള്ള പങ്ക് നിഷേധിക്കാന് കഴിയില്ല. അതുവഴിയാണവരുടെ ദേശീയത അടയാളപ്പെടുത്തുന്നതും. എന്നാല് ഇന്ത്യന് ദേശീയത രൂപപ്പെടുന്നതില് മതത്തിനോ മതാധിഷ്ഠിത ശക്തികള്ക്കോ ഒരു പങ്കുമില്ലെന്നതാണ് വിസ്മയം. നൂറ്റാണ്ടുകള് പിന്നിട്ട കോളനി വാഴ്ചയും അതേതുടര്ന്നുണ്ടായ ബ്രിട്ടീഷ് വിരുദ്ധതയുമാണ് ഇന്ത്യന് ദേശീയതക്കാധാരം. ഇന്ത്യന് ദേശീയത രൂപപ്പെടുത്തുന്നതില് ജാതി മത ഭേദമെന്യ ഉള്ളില് ഊറിക്കൂടി ഉറച്ച കോളനി വിരോധമുണ്ട്. ആ അര്ഥത്തിലാണ് നമ്മുടെ ചരിത്രത്തെ നോക്കി കാണേണ്ടത്. സ്വാതന്ത്ര്യ പ്രഖ്യാപനമുണ്ടാകുന്നതിനു മുന്പ്തന്നെ നമ്മുടെ ഭരണഘടന രൂപീകരണത്തെക്കുറിച്ച്ആലോചിച്ചിട്ടുണ്ട്.
മത, വര്ഗ വേര്തിരുവുകള്ക്കതീതമായ ഭരണഘടന ഉണ്ടാക്കാനുള്ള പരിശ്രമം രണ്ടു വര്ഷവും ഒന്പതു മാസവും 18 ദിവസവും നീണ്ടുനിന്നു. രാജ്യത്തിനു ഒരൗദ്യോഗിക മതമില്ലാത്ത രീതിയില്, മതേതരമായി ഭരണഘടന സങ്കല്പിക്കപ്പെട്ടു. എന്നാല് ഭൂരിപക്ഷ ന്യൂനപക്ഷ വിശ്വാസികളെ ഉള്ക്കൊണ്ട് പോകാനും അവരവരുടെ സംസ്കാരങ്ങളോട് കൂറുപുലര്ത്തി സമഭാവനയോടെ മുന്നോട്ടുപോകാനും ആഹ്വാനം ചെയ്യുന്നതായി ഭരണഘടനയുടെ സൂക്ഷ്മ വായന വ്യക്തമാക്കുന്നു. ഭരണഘടനയുടെ മുഖവുര തന്നെ സത്താപരമായി എന്താണ് ആ പ്രമാണത്തിന്റെ അവതരണ താത്പര്യമെന്ന് വ്യക്തമാക്കുന്നതാണ്. ജനങ്ങളാല് എഴുതപ്പെട്ട എന്ന തുടക്കം അതിന്റെ മാനവിക മുഖമാണ് തുറക്കപ്പെടുന്നത്.
ദൈവനാമത്തില് എന്ന് തുടങ്ങണമെന്ന് ശഠിച്ച എച്ച്.വി കമ്മത്തിന്റെ വാദമോ, പരമേശ്വര നാമത്തില് വേണമെന്ന് വാദിച്ച ഗോവിന്ദ മാളവ്യയുടെ താല്പര്യമോ അല്ല ഇന്ത്യയുടെ മത നിരപേക്ഷ ഭരണ ഘടനാനിര്മാണ സമിതി പരിഗണിച്ചത്. ഇന്ത്യ-പാക് വിഭജനത്തിന്റെ വേരുകള് ചെന്നെത്തുന്ന പരിസരം ഹിന്ദു-മുസ്ലിം വിദ്വേഷത്തിന്റേതാണ്. താല്പര്യമില്ലാതെ നാട് കടത്തപ്പെട്ടവര് ഇരു ഭാഗത്തുമുണ്ട്. മാനവിക ചിന്തകളെ രാഷ്ട്രീയ ലക്ഷ്യങ്ങള് ജയിച്ചടക്കിയതാണ് വിഭജനത്തിന്റെ കാതല്. ഇവിടെ നിരപരാധികളുടെ മനഃസാക്ഷി വായിക്കാന് ഭരണഘടനാ നിര്മാണ സഭക്ക് കഴിഞ്ഞിട്ടുണ്ട്. പാകിസ്ഥാനിലേക്കു പോയവര് തിരിച്ചുവന്നാല് ഇന്ത്യന് പൗരത്വം അവര്ക്കു നല്കിയേ തീരുവെന്ന് വാദിച്ച ബീഹാറുകാരന് ബ്രിജേഷ് മിശ്രയെ ഓര്ക്കുന്നത് അതുകൊണ്ടാണ്. പൗരാവകാശങ്ങളുടെ നീണ്ട വിശദീകരണം 5 മുതല് 11 വരെ അനുഛേദങ്ങള് പറയുന്നത്. പൗരനെ എങ്ങനെ നാടുകടത്താമെന്നല്ല അവനെ എങ്ങനെ ഉള്ക്കൊള്ളാമെന്നതിന്റെ വിവരണമാണത്. എന്നാല് ഭരണഘടനയുടെ പിറവിയില് തന്നെ അതില് അസഹിഷ്ണുത കാണിച്ചവരും ചോദ്യംചെയ്തവരുമുണ്ട്. രാഷ്ട്രത്തെ ഒറ്റക്കല്ലില് കൊത്തിയെടുക്കാനുള്ള അവരുടെ ശ്രമത്തിന് കോളനി വാഴ്ചയുടെ പഴക്കമുണ്ട്. അവരുടെ താല്പര്യത്തിന് എതിരുനിന്ന പ്രധാന ശക്തി രാഷ്ട്ര പിതാവായിരുന്നു. മഹാത്മജിയെ വകവരുത്തിയതിലൂടെയും ഇപ്പോഴും വീണ്ടും വീണ്ടും കൊന്നുകൊണ്ടിരിക്കുന്നതിലൂടെയും അവരുടെ ലക്ഷ്യത്തിലേക്കു അടുത്തുകൊണ്ടിരിക്കുന്നു.
ബഹുസ്വര സങ്കര സംസ്കാരങ്ങളുടെ നിലനില്പ്പും വളര്ച്ചയും അംഗീകരിക്കാന് കഴിയാത്തവര് ഒരു രാഷ്ട്രമെന്ന നിലക്ക് രാഷ്ട്രരൂപീകരണത്തിന്റെ ചരിത്രമറിയാത്തവരും ദേശീയ പൈതൃകത്തിന്റെ ഘടന അറിയാത്തവരുമാണ്. ദ്രാവിഡ അടിത്തറയിലേക്ക് പിന്നീട് ഉള്ച്ചേര്ക്കപ്പെട്ട സംസ്കാരങ്ങളാണ് ആര്യ, ബൗദ്ധ പൗരസ്ത്യ, പൗരസ്ത്യേതര അടരുകള്. ഈ കൂടിക്കലര്ന്ന ബഹുപാളികളെ വേര്തിരിച്ചെടുക്കാന് കഴിയാത്ത ഒരു ചരിത്ര പശ്ചാത്തലം ബോധപൂര്വം മറന്നുകൊണ്ട് വ്യക്തികളുടെ പ്രാഥമിക പരിഗണനയിലുള്ള ഐച്ഛിക വിഷയമായ വസ്ത്രത്തിലും ഭക്ഷണത്തില്പോലും ഇടപെടുന്ന അവസ്ഥ സാമൂഹ്യഘടനയെ തകര്ക്കുമെന്നതില് സംശയിക്കേണ്ടതില്ല. ഇന്ത്യയുടെ നാനാത്വത്തിലുള്ള ഏകത്വമെന്ന കാഴ്ചപ്പാട് അംഗീകരിക്കപ്പെടണം. ബഹുസ്വര സങ്കര സംസ്കാരം സംരക്ഷിക്കപ്പെട്ടുകൊണ്ടുള്ള ദേശീയ ബോധങ്ങളാണുണ്ടാകേണ്ടത്. മറിച്ചുള്ള വികാരങ്ങളെ ദേശീയതയെന്ന് വിളിക്കാന് കഴിയില്ല.
ഇന്ത്യയുടെ ദേശീയ കവിയാണ് രവീന്ദ്രനാഥ ടാഗോര്. ടാഗോര് ദേശീയതയെ നിര്വചിച്ചിട്ടുണ്ട്. അത് മാനവികതയില് അധിഷ്ഠിതമാണ്. മാനവികതയില്ലാത്ത ദേശീയത ശാപമാണെന്നാണ് അദ്ദേഹത്തിന്റെ പക്ഷം. അത് സകല തിന്മയുടെയും മൂലഹേതുവാകുമെന്ന അദ്ദേഹത്തിന്റെ വാക്കുകള് ഇന്ന് പുലര്ന്നിരിക്കുകയാണ്. മനുഷ്യത്വത്തിനപ്പുറമുള്ള രാജ്യ സ്നേഹത്തെപ്പോലും അദ്ദേഹം ശക്തിയായി അപലപിച്ചു. ശാന്തിനികേതനില് താന് നിര്മിച്ച സര്വകലാശാലയുടെ ആപ്തവാക്യം ‘യത്ര വിശ്വം ഭവത് ഏക നീഡം’ എന്നതായിരുന്നു. അഥവാ ഈ ലോകം മുഴുവന് ഒരു പക്ഷികൂടായിതീരുക വിവിധ വര്ണങ്ങളില്, വൈവിധ്യമേറിയ കൊഞ്ചലുകളുള്ള കിളിക്കൂടായി ലോകം മാറണമെന്നാഗ്രഹിച്ചു അദ്ദേഹം.
‘ഭാരതമെന്നു കേട്ടാലഭിമാനപൂരിതമാകണമെന്നന്തരംഗം, കേരളമെന്നു കേട്ടാലോ തിളക്കണം ചോര നമുക്ക് ഞരമ്പുകളില്’ എന്ന വള്ളത്തോളിന്റെ വരികള് പോലും വിശാല അര്ഥത്തില് വിമര്ശന വിധേയമായ നാടാണ് നമ്മുടേത്. അങ്ങനെയെങ്കില് ജനിച്ച സ്ഥലത്തിന്റെ പേര് കേട്ടാല് മനുഷ്യന് നില്ക്കക്കള്ളി നഷ്ടപ്പെടില്ലേ എന്ന് ചോദിച്ച കേസരി ബാലകൃഷ്ണപിള്ളയെയും ഇപ്പോള് സ്മരിക്കേണ്ടതാണ്. കാരണം ദേശ രാഷ്ട്ര ചിന്തകള്കൊണ്ട് മനുഷ്യന് ഭ്രാന്ത് പിടിക്കുന്ന അവസ്ഥയിലേക്കാണ് പുതിയ മനുഷ്യന് നീങ്ങുന്നത്.
columns
സത്യാന്വേഷി-പ്രതിഛായ
സോഫ്്റ്റ്വെയര് എഞ്ചിനീയറായി 10 വര്ഷത്തോളം നോക്കിയയില് പ്രവര്ത്തിച്ചശേഷമാണ് സമൂഹമാധ്യമങ്ങളിലെ കള്ളക്കഥകളെ പൊളിച്ചടുക്കാനുറച്ച്് പ്രതീക്സിന്ഹയുമായിചേര്ന്ന് 2017ല് 28-ാംവയസ്സില് സുബൈര് ‘ആള്ട്ട് ന്യൂസ്’ (ബദല് വാര്ത്ത) എന്ന പേരില് സമൂഹമാധ്യമ പോര്ട്ടല് ആരംഭിക്കുന്നത്.
‘അത് വക്കീലിനോട് ഇനി മുതല് വാദിക്കരുതെന്ന് ആവശ്യപ്പെടുന്നതുപോലെയാണ്. ഒരു മാധ്യമപ്രവര്ത്തകനോട് എങ്ങനെയാണ് എഴുതരുതെന്ന് ആവശ്യപ്പെടാനാകുക? നിയമവിരുദ്ധമായി എന്തെങ്കിലും ചെയ്തിട്ടുണ്ടെങ്കില് അദ്ദേഹമതിന് മറുപടി പറയാന് ബാധ്യസ്ഥനാണ്. പക്ഷേ ഒരാള് അഭിപ്രായം പറയുന്നതിനെ എങ്ങനെയാണ് മുന്കൂട്ടി എതിര്ക്കാന്കഴിയുക?’ സുപ്രീംകോടതിയിലെ പ്രമുഖന്യായാധിപന് ജസ്റ്റിസ് ഡി.വൈ ചന്ദ്രചൂഡിന്റേതാണ് ഈകുറിക്കുകൊള്ളുന്ന വാക്കുകള്. ‘ആള്ട്ട്ന്യൂസ് സ്ഥാപകനും മാധ്യമപ്രവര്ത്തകനുമായ മുഹമ്മദ്സുബൈറിനെ സമൂഹമാധ്യമമായ ട്വിറ്ററില് എഴുതുന്നതില്നിന്ന് തടയണമെന്ന ഉത്തര്പ്രദേശ് പൊലീസിന്റെ ആവശ്യത്തോട് പ്രതികരിക്കുകയായിരുന്നു രാജ്യത്തെ അത്യുന്നത നീതിപീഠം. സമൂഹമാധ്യമങ്ങളിലെ തെറ്റായവിവരങ്ങളുടെ വസ്തുതാന്വേഷകനായി പ്രസിദ്ധനായ സുബൈറിനെ തുടരെത്തുടരെ കേസുകളുമായി വരിഞ്ഞുമുറുക്കി കാലാകാലത്തേക്ക് തുറുങ്കിലടക്കാനും ബി.ജെ.പി സര്ക്കാരുകള്ക്കെതിരെ പ്രതികരിക്കാതിരിക്കാനുമായി ഇട്ട പദ്ധതിയെ പൊളിച്ചടുക്കുകയായിരുന്നു ജസ്റ്റിസ് ചന്ദ്രചൂഡ്. നാലരക്കൊല്ലംമുമ്പ് ട്വീറ്റ്ചെയ്ത ഒരു വിഷയത്തിന്റെ പേരിലായിരുന്നു യു.പി സര്ക്കാര് സുബൈറിനെ അറസ്റ്റ്ചെയ്ത് ജയിലിടച്ചത്. ജൂണ് 27ന് അറസ്റ്റുചെയ്ത സുബൈറിനെ സുപ്രീംകോടതിയുടെ ഇടക്കാല ജാമ്യത്തെതുടര്ന്ന് മോചിപ്പിച്ചത് ജൂലൈ 21നായിരുന്നു; കൃത്യം 23 ദിവസത്തിനുശേഷം. ഡല്ഹിക്കുപുറമെ യു.പിയില് ആറു കേസുകളാണ് സുബൈറിനെതിരെ ചുമത്തിയത്. ഓരോ കേസിലും ജാമ്യം നേടുമ്പോള് വൈകാതെ മറ്റൊരു കേസില് അറസ്റ്റുരേഖപ്പെടുത്തി യുവാവിന്റെ മോചനം വൈകിക്കലായിരുന്നു തന്ത്രം. എന്നാല് ഇത് തിരിച്ചറിഞ്ഞായിരുന്നു കോടതിയുടെ ഇടപെടല്. എഫ്.ഐ.ആറുകള് റദ്ദാക്കിയില്ലെങ്കിലും എല്ലാകേസുകളും ഡല്ഹി കോടതിയിലേക്ക് മാറ്റാനും സുബൈറിന് ഇടക്കാലം ജാമ്യം നല്കി വിട്ടയക്കാനുമായിരുന്നു 21ലെ വിധി.
ഇന്ത്യയുടെ പാരമ്പര്യമാണ് സത്യം. മുണ്ഡകോപനിഷത്തിലെ ‘സത്യമേവ ജയതേ’ ആണ് രാജ്യത്തിന്റെ ഔദ്യോഗികചിഹ്നത്തില് ആലേഖന ചെയ്തിരിക്കുന്നത്. അതുകൊണ്ടുതന്നെ സത്യം കണ്ടെത്തി അവതരിപ്പിക്കുന്ന ആരും ആര്ഷഭാരത പാരമ്പര്യത്തെയാണ് ഉയര്ത്തിപ്പിടിക്കുന്നത്. മാധ്യമപ്രവര്ത്തകോട്, വിശേഷിച്ച് സര്ക്കാരിനെതിരെ പ്രതികരിക്കുന്നവരോട് ബി.ജെ.പി ഭരണകൂടങ്ങള് പൊലീസിനെ ഉപയോഗിച്ച് ചെയ്തുകൂട്ടുന്നതെന്തെല്ലാമാണെന്നതിന് മികച്ച തെളിവാണ് സുബൈറിന്റെ അറസ്റ്റും തുടര്ന്നുള്ള സംഭവങ്ങളും. എന്നാല് ഇതിന് നേര്വിപരീതമായിരുന്നു രാഹുല്ഗാന്ധിക്കെതിരായി വ്യാജ വീഡിയോ സംപ്രേഷണംചെയ്തതിന് ‘ടൈംസ് നൗ’ ടി.വി അവതാരകന് രോഹിത് രഞ്ജന് അനുകൂലമായ ബി.ജെ.പി സര്ക്കാരിന്റെ നീക്കം. രാഹുല്ഗാന്ധി രാജസ്ഥാനില് ടെയ്ലറെ കൊലപ്പെടുത്തിയ യുവാക്കളെ കുട്ടികളല്ലേ എന്നു വിളിച്ചെന്ന വ്യാജ പ്രചാരണം നടത്തിയതിന് കോണ്ഗ്രസ് ഭരിക്കുന്ന ഛത്തീസ്ഗഡ് സര്ക്കാരിന്റെ പൊലീസ് രോഹിത്തിനെ അറസ്റ്റ്ചെയ്യാനെത്തിയപ്പോള് മറ്റൊരു കേസ് ചുമത്തി അറസ്റ്റില്നിന്ന് രക്ഷിച്ചെടുക്കുകയായിരുന്നു ഡല്ഹി പൊലീസ്. പഴയ ഹിന്ദിസിനിമയിലെ ഒരു ഡയലോഗ് പങ്കുവെച്ചായിരുന്നു സുബൈറിന്റെ നാലരവര്ഷം മുമ്പത്തെ ട്വീറ്റ്. വിദ്വേഷ പ്രചാരകരോട് വിട്ടുവീഴ്ചയില്ലെന്നാണ് 33 കാരനായ സുബൈറിന്റെ സുധീര പ്രഖ്യാപനം.
സോഫ്്റ്റ്വെയര് എഞ്ചിനീയറായി 10 വര്ഷത്തോളം നോക്കിയയില് പ്രവര്ത്തിച്ചശേഷമാണ് സമൂഹമാധ്യമങ്ങളിലെ കള്ളക്കഥകളെ പൊളിച്ചടുക്കാനുറച്ച്് പ്രതീക്സിന്ഹയുമായിചേര്ന്ന് 2017ല് 28-ാംവയസ്സില് സുബൈര് ‘ആള്ട്ട് ന്യൂസ്’ (ബദല് വാര്ത്ത) എന്ന പേരില് സമൂഹമാധ്യമ പോര്ട്ടല് ആരംഭിക്കുന്നത്. നിമിഷങ്ങളെന്നോണം വ്യാജ വാര്ത്തകള് പടച്ചുവിടുന്ന നുണ ഫാക്ടറികളുടെ ഓശാരത്തില് അധികാരത്തിലെത്തുന്ന ഭരണകൂടങ്ങള്ക്കാണ് ആള്ട്ട്ന്യൂസ് പ്രധാനമായും വെല്ലുവിളിയുയര്ത്തിയത്. സുബൈറിന്റെ ഫാക്ട്ചെക് വാര്ത്തകള് ലോകത്തെ ഉന്നതമാധ്യമങ്ങള്വരെ എടുത്തുകൊടുക്കാനാരംഭിച്ചു. പ്രവാചകനെതിരെ ബി.ജെ.പി വക്താവ് നൂപുര്ശര്മ നടത്തിയ വിവാദ പ്രസ്താവത്തിന്റെ വീഡിയോ അതേപടി ആള്ട്ട്ന്യൂസ് പ്രസിദ്ധപ്പെടുത്തിയതാണ് സത്യത്തില് സുബൈറിനെ നോട്ടമിട്ടിരുന്ന ബി.ജെ.പി നേതാക്കളെ പെട്ടെന്ന് പൊലീസിനെ വിട്ട് അറസ്റ്റുചെയ്യാന് നിര്ബന്ധിച്ചത്. എന്നാല് ഇതാണ് കാരണമെന്ന് പറയാതെ നാലര വര്ഷം മുമ്പത്തെ കാര്യമാണ് പറഞ്ഞതെന്നുമാത്രം. വിവാഹേതര ബന്ധമുണ്ടെന്നതിന് ഭാര്യയെ ഭര്ത്താവ് മര്ദിക്കുന്നതിന്റെ ദൃശ്യം കാട്ടി അത് ‘ലൗ ജിഹാദാ’ണെന്ന് പ്രചരിപ്പിക്കുന്നവരെപോലുള്ളവരെയും സുബൈര് തുറന്നുകാട്ടി. മേയില് ജ്ഞാന്വ്യാപി പള്ളി വിവാദത്തിലും തീവ്ര ഹിന്ദുത്വവാദികള്ക്കെതിരെ സുബൈര് നിരവധി പോസ്റ്റുകളിട്ടിരുന്നു. ദേശീയ മാധ്യമങ്ങളിലെ അവതാരകരുടെ തനിനിറം തുറന്നുകാട്ടുകയും സുബൈറിന്റെ പ്രധാന ജോലിയായിരുന്നു. സുബൈറിന്റെ വരുമാനം ലാഭം പ്രതീക്ഷിക്കാതെ സംഭാവനയിലൂടെ പ്രവര്ത്തിക്കുന്ന ആള്ട്ട്ന്യൂസില്നിന്ന് കിട്ടുന്ന തുച്ഛമായ വേതനമാണ്. സ്ഥാപനത്തിന്റെ ഉടമകളായ പ്രാവ്ദ മീഡിയ ഫൗണ്ടേഷന്റെ ഡയറക്ടര്മാരിലൊരാളാണിപ്പോള്. ബെംഗളൂരുവില് ജനിച്ച സുബൈറിന്റെ സ്കൂള്-കോളജ് വിദ്യാഭ്യാസവും അവിടെയായിരുന്നു.
columns
ജനാധിപത്യ പോരാട്ടങ്ങളുടെ വിജയം- പി.എം.എ സലാം
വഖഫ് നിയമനം പി.എസ്.സിക്ക് വിടാനുള്ള നീക്കത്തില്നിന്ന് സര്ക്കാര് പിന്മാറിയത് മുസ്ലിംലീഗ് നടത്തിവന്ന നിരന്തര പോരാട്ടങ്ങളുടെ വിജയമാണ്. രാജ്യത്തെവിടെയും ഇല്ലാത്ത നിയമമാണ് വഖഫ് ബോര്ഡിന്റെ കാര്യത്തില് ഇടത് സര്ക്കാര് സ്വീകരിച്ചത്. നിയമസഭയില് ഇതുമായി ബന്ധപ്പെട്ട ബില് അവതരിപ്പിച്ചത് മുതല് മുസ്ലിംലീഗ് വിശ്രമരഹിതമായി സമരമുഖത്തായിരുന്നു. നിയമസഭയുടെ അകത്തും പുറത്തും പാര്ട്ടി പോരാട്ടം ശക്തമാക്കി. 2021 ഡിസംബര് 9ന് കോഴിക്കോട് കടപ്പുറത്ത് വഖഫ് സംരക്ഷണ മഹാറാലി സംഘടിപ്പിച്ചു. പതിനായിരങ്ങള് അണിനിരന്ന റാലിക്ക് ശേഷം മുസ്ലിംലീഗിന് ചെയ്യാന് പറ്റുന്നത് അവര് ചെയ്യട്ടെ. മുസ്ലിംലീഗിനെ ആര് ഗൗനിക്കുന്നു? എന്നാണ് മുഖ്യമന്ത്രി പറഞ്ഞത്. അതേ മുഖ്യമന്ത്രിയുടെ നാവ് കൊണ്ടുതന്നെ തീരുമാനം പുനഃപരിശോധിക്കുമെന്ന് പറയിപ്പിച്ചതാണ് മുസ്ലിംലീഗിന്റെ രാഷ്ട്രീയ വിജയം.
വഖഫ് നിയമനം പി.എസ്.സിക്ക് വിടാനുള്ള നീക്കത്തില്നിന്ന് സര്ക്കാര് പിന്മാറിയത് മുസ്ലിംലീഗ് നടത്തിവന്ന നിരന്തര പോരാട്ടങ്ങളുടെ വിജയമാണ്. രാജ്യത്തെവിടെയും ഇല്ലാത്ത നിയമമാണ് വഖഫ് ബോര്ഡിന്റെ കാര്യത്തില് ഇടത് സര്ക്കാര് സ്വീകരിച്ചത്. നിയമസഭയില് ഇതുമായി ബന്ധപ്പെട്ട ബില് അവതരിപ്പിച്ചത് മുതല് മുസ്ലിംലീഗ് വിശ്രമരഹിതമായി സമരമുഖത്തായിരുന്നു. നിയമസഭയുടെ അകത്തും പുറത്തും പാര്ട്ടി പോരാട്ടം ശക്തമാക്കി. 2021 ഡിസംബര് 9ന് കോഴിക്കോട് കടപ്പുറത്ത് വഖഫ് സംരക്ഷണ മഹാറാലി സംഘടിപ്പിച്ചു. പതിനായിരങ്ങള് അണിനിരന്ന റാലിക്ക് ശേഷം മുസ്ലിംലീഗിന് ചെയ്യാന് പറ്റുന്നത് അവര് ചെയ്യട്ടെ. മുസ്ലിംലീഗിനെ ആര് ഗൗനിക്കുന്നു? എന്നാണ് മുഖ്യമന്ത്രി പറഞ്ഞത്. അതേ മുഖ്യമന്ത്രിയുടെ നാവ് കൊണ്ടുതന്നെ തീരുമാനം പുനഃപരിശോധിക്കുമെന്ന് പറയിപ്പിച്ചതാണ് മുസ്ലിംലീഗിന്റെ രാഷ്ട്രീയ വിജയം.
വഖഫ് സംരക്ഷണ റാലിക്ക് ശേഷം വളരെ മോശമായ ഭിന്നിപ്പിക്കല് രാഷ്ട്രീയമാണ് സി.പി.എം പയറ്റിയത്. കേരളത്തിലെ മുസ്ലിംകളുടെ അട്ടിപ്പേറവകാശം മുസ് ലിംലീഗിനില്ലെന്ന് പറഞ്ഞ് മുസ്ലിംലീഗിനെയും മതസംഘടനകളെയും ഭിന്നിപ്പിക്കാനുള്ള ശ്രമമാണ് മുഖ്യമന്ത്രി നടത്തിയത്. മുസ്ലിംലീഗ് സംസ്ഥാന പ്രസിഡന്റ് പാണക്കാട് സയ്യിദ് സാദിഖലി ശിഹാബ് തങ്ങളുടെ നേതൃത്വത്തില് പ്രവര്ത്തിക്കുന്ന കേരളത്തിലെ എല്ലാ മത സംഘടനകളും അംഗങ്ങളായ മുസ്ലിം കോ ഓര്ഡിനേഷന് കമ്മിറ്റി വഖഫ് നിയമന വിഷയത്തില് പലതവണ മുഖ്യമന്ത്രിയെ കണ്ടിരുന്നു. മുസ്ലിം സംഘടനകള് ഒറ്റക്കെട്ടായാണ് ഈ ആവശ്യത്തിനുവേണ്ടി നിലകൊണ്ടത്. എന്നാല് അതിനെയൊന്നും സര്ക്കാര് ഗൗനിച്ചില്ല. മതസംഘടനകള്ക്കിടയില് ഭിന്നതയുണ്ടാക്കാന് ശ്രമിച്ചതോടൊപ്പം തീരുമാനത്തില്നിന്ന് പിന്നോട്ടില്ലെന്ന മട്ടിലാണ് നിയമസഭയില് മന്ത്രിമാര് പോലും സംസാരിച്ചത്.
എന്നാല് ഒരു ഘട്ടത്തിലും സമരത്തില്നിന്ന് പിന്തിരിയാന് മുസ്ലിംലീഗ് തയ്യാറായില്ല. കേന്ദ്ര വഖഫ് ആക്ടിന് വിരുദ്ധമായി കേരളത്തില് മാത്രം വിവേചനത്തിന്റെ ഈ നിയമം അനുവദിക്കില്ലെന്ന് മുസ്ലിംലീഗ് അസന്നിഗ്ധമായി വ്യക്തമാക്കി. വഖഫ് നിയമനങ്ങള് പി.എസ്.സിക്ക് വിടുന്നതിനെ ന്യായീകരിച്ച്കൊണ്ട് സി.പി.എം നേതാക്കളും സൈബര് സഖാക്കളും ധാരാളം എഴുതി. പലപ്പോഴും അനാവശ്യമായി മുസ് ലിം ലീഗിനെ പ്രതിക്കൂട്ടില് നിര്ത്താനും ഇവര് ശ്രമിച്ചു. വഖഫ് ബോര്ഡില് യു.ഡി.എഫ് അമുസ്ലിം നിയമനം നടത്തിയിട്ടുണ്ടെന്ന പച്ചക്കള്ളം അടിച്ചിറക്കി. പി.എസ്.സിക്ക് വിടാനുള്ള തീരുമാനം വഖഫ് ബോര്ഡ് ഏകകണ്ഠമായി സ്വീകരിച്ചതാണെന്ന് മുഖ്യമന്ത്രി പോലും നുണ പറഞ്ഞു. കേരളത്തിലെ വന്ദ്യവയോധികരായ മതസംഘടനാ നേതാക്കള് പലപ്പോഴായി മുഖ്യമന്ത്രിയെ കണ്ടെങ്കിലും ഉറപ്പ് നല്കുകയല്ലാതെ ഒന്നും നടന്നില്ല. ഈ നിയമസഭാ സമ്മേളനത്തില് തന്നെ മുസ്ലിംലീഗ് അംഗങ്ങള് വഖഫ് നിയമന തീരുമാനം പിന്വലിക്കാന് പലതവണ ആവശ്യപ്പെട്ടു. ഒടുവില് ഗത്യന്തരമില്ലാതെയാണ് ഇപ്പോള് തീരുമാനം പുനഃപരിശോധിക്കുമെന്ന് മുഖ്യമന്ത്രി പ്രസ്താവിച്ചിരിക്കുന്നത്. മുസ്ലിംലീഗിന്റെ പാര്ലമെന്ററി പാര്ട്ടി ലീഡറും പ്രതിപക്ഷ ഉപനേതാവുമായ പി.കെ കുഞ്ഞാലിക്കുട്ടിയുടെ സബ്മിഷന് മറുപടിയായാണ് മുഖ്യമന്ത്രി ഇക്കാര്യം ഉറപ്പ് നല്കിയത്.
ഈ നിയമസഭാ സമ്മേളനത്തില് തന്നെ വഖഫ് ഭേദഗതി നിയമം പിന്വലിക്കണമെന്ന് ആവശ്യപ്പെട്ട് ഏറ്റവുമൊടുവില് കഴിഞ്ഞ ജൂണ് 28ന് സെക്രട്ടേറിയറ്റിന് മുന്നില് സംസ്ഥാന കമ്മിറ്റി ധര്ണ സംഘടിപ്പിച്ചു. മതസംഘടനാ നേതാക്കളോട് പച്ചക്കള്ളം പറഞ്ഞ് രക്ഷപ്പെടാനാണ് മുഖ്യമന്ത്രിയും കൂട്ടരും പലപ്പോഴായി ശ്രമിച്ചത്. 2016 ല് തന്നെ എല്ലാ മുസ്ലിം മത സംഘടനകളും മുസ്ലിം കോ ഓര്ഡിനേഷന് കമ്മിറ്റിയുടെ കീഴില് ഒന്നിച്ച് ഗവര്ണറെ പോയി കാണുകയും സര്ക്കാര് നീക്കത്തിനെതിരെ ശബ്ദമുയര്ത്തുകയും ചെയ്തിരുന്നു. കോ ഓര്ഡിനേഷന് കമ്മിറ്റി സെക്രട്ടറിയേറ്റിന് മുന്നില് സമരവും നടത്തി. മുഖ്യമന്ത്രിക്കും നിവേദനം നല്കി. നിയമസഭക്ക് അകത്ത് മുസ്ലിംലീഗിന്റെയും പ്രതിപക്ഷത്തിന്റെയും ശക്തമായ പ്രതിഷേധം ഉണ്ടായി. ബില്ല് വരുന്ന സമയത്തും പാസ്സാക്കുന്ന സമയത്തും ശക്തമായ ഭാഷയില് തന്നെ പ്രതിപക്ഷം എതിര്പ്പറിയിച്ചിരുന്നു. ഇതെല്ലാം നിയമസഭാ രേഖയിലുള്ളതാണ്. എന്നാല് അതെല്ലാം മറന്നുകൊണ്ടാണ് മുഖ്യമന്ത്രി കള്ളം പറഞ്ഞത്.
നിയമസഭ പാസ്സാക്കിയ നിയമം ആയതുകൊണ്ട് നിയസമഭയില് തന്നെ അവതരിപ്പിച്ച് തിരുത്തണമെന്നാണ് മുസ്ലിം ലീഗ് ആവശ്യപ്പെട്ടത്. കോഴിക്കോട്ട് നടന്നത് സമരപ്രഖ്യാപനം മാത്രമായിരുന്നു. പിന്നീട് നിരന്തര സമരങ്ങളുടെ ദിവസങ്ങളായിരുന്നു. പ്രതിസന്ധികള് ഏറെയുണ്ടായിട്ടും നിയമം പിന്വലിക്കും വരെ മുസ്ലിം ലീഗ് സമര രംഗത്ത് ഉറച്ചുനിന്നു. കഴിഞ്ഞ മാര്ച്ച് മാസത്തില് തിരുവനന്തപുരത്ത് മുസ്ലിംലീഗ് പ്രതിഷേധ സംഗമം സംഘടിപ്പിച്ചു. സര്ക്കാര് പിന്മാറും വരെ സമരം തുടരുമെന്ന് ഈ പരിപാടിയില് നിയമസഭാ പാര്ട്ടി ലീഡര് പി.കെ കുഞ്ഞാലിക്കുട്ടി പ്രഖ്യാപിച്ചു. കോഴിക്കോട് നടത്തിയ വഖഫ് സംരക്ഷണ റാലിക്ക് ശേഷം രണ്ടാം ഘട്ടമായി പഞ്ചായത്ത്, മുനിസിപ്പല്, മേഖലാ കേന്ദ്രങ്ങളില് സമര സംഗമങ്ങള് സംഘടിപ്പിച്ചു. തിരുവനന്തപുരത്ത് നടന്ന പ്രതിഷേധ പരിപാടികളായിരുന്നു സമരത്തിന്റെ മൂന്നാം ഘട്ടം.
ഇടക്കാലത്ത് കോവിഡ് വ്യാപകമായപ്പോള് കോവിഡ് പ്രോട്ടോക്കോള് പാലിച്ചുകൊണ്ട് വഖഫ് സംരക്ഷണ പ്രക്ഷോഭം തുടര്ന്നു. മുസ്ലിംലീഗിന്റെ വഖഫ് സംരക്ഷണ പ്രക്ഷോഭത്തില് സഹികെട്ട സര്ക്കാര് കോവിഡ് പ്രോട്ടോക്കോള് ലംഘിച്ചുവെന്ന കുറ്റം ചുമത്തി പ്രാദേശികമായി കേസുകളെടുത്തു. കോഴിക്കോട് നടന്ന മഹാറാലിക്ക് ശേഷം പതിനായിരം പേര്ക്കെതിരെ കേസെടുത്തായിരുന്നു പ്രതികാര നടപടി. വഖഫ് സംരക്ഷണ പ്രക്ഷോഭങ്ങളുടെ തുടര്ച്ചയായി മുസ്ലിം ലീഗ് കലക്ടറേറ്റ് മാര്ച്ചുകളും സംഘടിപ്പിച്ചു.
-
Video Stories8 years ago
കൊടിഞ്ഞിയില് കൊല്ലപ്പെട്ട ഫൈസലിന്റ കഫീല് അബ്ദുല്ല അല്മുഹാവിസിന്റെ വാക്കുകള് വൈറലാവുന്നു
-
Culture8 years ago
അനസ്തേഷ്യയില്ലാത്ത ശസ്ത്രക്രിയയില് ഖുര്ആന് ഉരുവിട്ട് കുഞ്ഞ്; വാര്ത്ത വായിക്കുമ്പോള് വിതുമ്പിക്കരഞ്ഞ് അവതാരകന്
-
More8 years ago
ഭോപ്പാല് വിവാദ ഏറ്റുമുട്ടല്; കൂടുതല് തെളിവുകളോടെ മൂന്നാമത്തെ വീഡിയോ പുറത്ത്
-
More8 years ago
‘മകളെ കൊണ്ട് കള്ളം പറയിച്ചു’ ദിലീപ്-കാവ്യ വിവാഹത്തില് മഞ്ജുവിന്റെ പ്രതികരണം
-
Culture8 years ago
വഴിയോര കച്ചവടങ്ങളിലെ ബിരിയാണിയില് പൂച്ച മാംസം
-
Culture5 years ago
വീട്ടമ്മയുടെ നഗ്നദൃശ്യങ്ങള് ഭര്ത്താവിന് വാട്സ് ആപ്പില്; പ്രതിയെ കണ്ട് ഞെട്ടി പൊലീസും വീട്ടുകാരും
-
Culture7 years ago
‘സോനു നിഗം പ്രിയങ്കയില് നിന്നു പഠിക്കണം; ബാങ്കുവിളിയെക്കുറിച്ചുള്ള അധിക്ഷേപത്തിന് ശേഷം പ്രിയങ്കയുടെ ബാങ്കുവിളി പരാമര്ശം വൈറല്
-
Culture7 years ago
അണികളില് നിന്ന് ‘മുര്ദാബാദ് വിളി’; അസ്വസ്ഥനായി മോദി – മാധ്യമങ്ങള് കണ്ടില്ലെന്ന് നടിച്ച വീഡിയോ