More
ഐ.എസ്.എല്‍ പ്ലയര്‍ ഡ്രാഫ്റ്റ്; അറിയേണ്ടതെല്ലാം
അഷ്റഫ് തൈവളപ്പ്
കൊച്ചി: രാജ്യത്തെ ഫുട്ബോള്‍ രംഗത്ത് വന്‍ മാറ്റങ്ങള്‍ക്ക് തുടക്കമിട്ട ഇന്ത്യന്‍ സൂപ്പര്‍ ലീഗ് (ഐ.എസ്.എല്‍) പുതിയ വഴിത്തിരിവിലാണ്. രണ്ടു പുതിയ ടീമുകളുടെ വരവോടെ അടിമുടി മാറ്റത്തിനൊരുങ്ങുന്ന ലീഗിന്റെ നാലാം പതിപ്പിനായുള്ള പ്ലയര്‍ ഡ്രാഫ്റ്റ് (താരങ്ങളുടെ തെരഞ്ഞെടുപ്പ്) നാളെ മുംബൈയിലെ സ്വകാര്യ ഹോട്ടലില്‍ നടക്കും. രാവിലെ 9.30ന് പ്ലയര്‍ ഡ്രാഫ്റ്റ് തുടങ്ങും.
ആകെ 15 റൗണ്ടുകളിലായി നടക്കുന്ന ഡ്രാഫ്റ്റില്‍ പങ്കെടുക്കുന്നത് 205 താരങ്ങള്‍, താരങ്ങളെ റാഞ്ചാന്‍ പത്തു ടീമുകള്‍. വൈകിട്ട് നാലോടെ ഓരോ ടീമിലും ഉള്‍പ്പെട്ട ഇന്ത്യന്‍ താരങ്ങളുടെ പൂര്‍ണ പട്ടിക അറിയാം. രണ്ട് അണ്ടര്‍-21 താരങ്ങള്‍ ഉള്‍പ്പെടെ ചുരുങ്ങിയത് 15 ഇന്ത്യന്‍ താരങ്ങളെങ്കിലും ഓരോ ടീമിലും ഉണ്ടായിരിക്കണം. 18 ഇന്ത്യന്‍ താരങ്ങളെ വരെ പരമാവധി ഒരു ടീമിന് തെരഞ്ഞെടുക്കാം. ഒരു വിദേശ താരമടക്കം മൂന്നു ഗോള്‍ കീപ്പര്‍മാരും ഓരോ ടീമിലും നിര്‍ബന്ധമായും വേണം. പതിവില്‍ നിന്ന് വ്യത്യസ്തമായി ഇത്തവണ ഒരു ടീമില്‍ പ്ലേയിങ് ഇലവനില്‍ അഞ്ചു വിദേശ താരങ്ങളെയേ ഉള്‍പ്പെടുത്താന്‍ പറ്റൂ. ഒരു സ്‌ക്വാഡില്‍ കുറഞ്ഞത് ഏഴു വിദേശ താരങ്ങള്‍, കൂടിയാല്‍ എട്ടു വിദേശ താരങ്ങള്‍ വരെയാവാം. അതുകൊണ്ടു തന്നെ 25 അംഗങ്ങളുള്ള സ്‌ക്വാഡില്‍ 18 ഇന്ത്യന്‍ താരങ്ങളെ വരെ ഇത്തവണ ഒരു ടീമിന് സ്വന്തമാക്കാം. ശരാശരി കണക്കെടുത്താല്‍ പത്തു ടീമുകളിലായി ചുരുങ്ങിയത് 150ന് മുകളില്‍ ഇന്ത്യന്‍ താരങ്ങള്‍ ഡ്രാഫ്റ്റ് വഴി ഐഎസ്എല്‍ ക്ലബുകളുടെ ഭാഗമാകും. കഴിഞ്ഞ വര്‍ഷം 120 ഓളം ഇന്ത്യന്‍ താരങ്ങള്‍ക്ക് മാത്രമാണ് ഐഎസ്എലില്‍ അവസരം ലഭിച്ചത്.
അനസും ലിങ്ദോയും കോടിപതികള്‍
കഴിഞ്ഞ സീസണുകളില്‍ ഡല്‍ഹിക്കായി ബൂട്ടുകെട്ടിയ മലയാളി താരം അനസ് എടത്തൊടികയും യൂജെന്‍സണ്‍ ലിങ്ദോയുമാണ് ഡ്രാഫ്റ്റിലെ കോടിപതികള്‍. ഇരുവര്‍ക്കും നിശ്ചയിച്ചിരിക്കുന്ന തുക 1.10 കോടി രൂപ. അനസിനെ കൂടാതെ മുഹമ്മദ് റാഫി, റിനോ ആന്റോ എന്നിവരടക്കം 11 മലയാളി താരങ്ങള്‍ കൂടി ഡ്രാഫ്റ്റിലുണ്ട്. ആകെയുള്ള 205 താരങ്ങളില്‍ 81 പേരും പ്രതിരോധ താരങ്ങളാണ്. 67 മധ്യനിര താരങ്ങള്‍, 26 സ്ട്രൈക്കര്‍മാര്‍, 31 ഗോള്‍കീപ്പര്‍മാര്‍.
ലീഗിന്റെ ആദ്യസീസണില്‍ താരലേലം നടന്നിരുന്നുവെങ്കിലും പുതിയ രണ്ടു ക്ലബുകളെ ഉള്‍പ്പെടുത്തി ഐഎസ്എല്‍ വിപുലീകരിക്കാനുള്ള തീരുമാനമാണ് ഇപ്പോള്‍ പ്ലയര്‍ ഡ്രാഫ്റ്റിനും ടീമുകളുടെ ഉടച്ചുവാര്‍ക്കലിനും വഴിയൊരുക്കിയത്. മുന്‍ വര്‍ഷങ്ങളില്‍ നിന്ന് വ്യത്യാസമായി ഐഎസ്എലിന് ഔദ്യോഗിക അംഗീകാരം ലഭിച്ചതിനാല്‍ രണ്ട് ലീഗുകളില്‍ (ഐ ലീഗ്, ഐ.എസ്.എല്‍)ഏതെങ്കിലും ഒരു ലീഗില്‍ മാത്രമേ ഇത്തവണ താരങ്ങള്‍ക്ക് ബൂട്ടുകെട്ടാന്‍ കഴിയുക. കഴിഞ്ഞ വര്‍ഷം വരെ വായ്പാ അടിസ്ഥാനത്തില്‍ രണ്ടു ലീഗുകളിലും താരങ്ങള്‍ക്ക് കളിക്കാമായിരുന്നു. ഇത്തരം കാര്യങ്ങളെല്ലാം ഉറപ്പു വരുത്തിയാണ് 205 താരങ്ങള്‍ ഐ.എസ്.എലുമായി കരാറായത്. ഡ്രാഫ്റ്റില്‍ ക്ലബുകള്‍ ലഭിക്കാത്തവര്‍ക്ക് പിന്നീട് ഓപ്പണ്‍ ട്രാന്‍സ്ഫര്‍ വഴി ഐ ലീഗ് ക്ലബുകളിലേക്ക് എത്താനുള്ള അവസരവുമുണ്ട്. ഇന്ത്യന്‍ താരങ്ങള്‍ക്ക് മാത്രമാണ് ലേലമുള്ളത്. വിദേശ താരങ്ങളെ ഓപ്പണ്‍ മാര്‍ക്കറ്റില്‍ നിന്ന് വാങ്ങണം.
ഗോള്‍ കീപ്പേഴ്സിന് കോളടിക്കും !
നാളെ നടക്കുന്ന പ്ലയര്‍ ഡ്രാഫ്റ്റ്സില്‍ കോളടിക്കുന്നത് ആര്‍ക്കായിരിക്കും, ഒരു സംശയവും വേണ്ട ഗോള്‍കീപ്പര്‍മാരായ താരങ്ങള്‍ക്ക് തന്നെയായിരിക്കും. 32 ഗോള്‍കീപ്പര്‍മാരാണ് ഡ്രാഫ്റ്റ് ലിസ്റ്റിലുള്ളത്. ഇത്തവണ പ്ലയിങ് ഇലവനില്‍ കളിക്കേണ്ട വിദേശ താരങ്ങളുടെ എണ്ണം ആറില്‍ നിന്ന് അഞ്ചായി കുറച്ചതിനാല്‍ മിക്ക ടീമുകളും ഇന്ത്യന്‍ താരങ്ങളെയാണ് ഗോള്‍ കീപ്പര്‍മാരായി തെരഞ്ഞെടുക്കാന്‍ സാധ്യതയുള്ളത്. ഇന്ത്യന്‍ ഗോള്‍കീപ്പര്‍മാരെയാണ് നോട്ടമിടുന്നതെന്ന് കേരള ബ്ലാസ്റ്റേഴ്സും ടാറ്റ ജംഷഡ്പൂര്‍ എഫ്.സിയും ഡല്‍ഹിയും ഇതിനകം വ്യക്തമാക്കിയിട്ടുണ്ട്. കഴിഞ്ഞ സീസണുകളില്‍ അവഗണിക്കപ്പെട്ട ഇന്ത്യന്‍ ഗോള്‍കീപ്പര്‍മാര്‍ക്ക് ഇത്തവണ സുവര്‍ണാവസരമാണ് ഐ.എസ്.എല്‍ തുറന്നിടുന്നത്. 25 അംഗ ടീമില്‍ മൂന്നു ഗോള്‍ കീപ്പര്‍മാര്‍ നിര്‍ബന്ധമായും വേണം, ഇതില്‍ ഒരാള്‍ വിദേശ താരമായിരിക്കണം. പത്തു ടീമുകളില്‍ ആറു ടീമുകളും ഇന്ത്യന്‍ ഗോള്‍കീപ്പര്‍മാരെ നിലനിര്‍ത്തിയിട്ടുണ്ട്. ഇതുവരെ ഒരു താരത്തെയും എടുക്കാത്ത ടാറ്റയും ഡല്‍ഹിയും ആദ്യ റൗണ്ടുകളില്‍ തന്നെ ഗോള്‍കീപ്പേഴ്സിനെ തെരഞ്ഞെടുക്കാനാണ് സാധ്യത. സുബ്രതാ പോളും ആല്‍ബിനോ ഗോമസുമാണ് ഗോള്‍കീപ്പര്‍മാരിലെ ഏറ്റവും വില കൂടിയ താരങ്ങള്‍.
പ്ലയര്‍ ഡ്രാഫ്റ്റ് എങ്ങനെ
താരലേലം പോലെയല്ല പ്ലയര്‍ ഡ്രാഫ്റ്റ്. ലേലം വിളി സംവിധാനം ഡ്രാഫ്റ്റ് സിസ്റ്റത്തില്‍ ഇല്ല. താരങ്ങളെ അവരുടെ മൂല്യമനുസരിച്ച് പൂള്‍ ആക്കി തിരിച്ച് ഒരു നിശ്ചിത വില ഒരോ പൂളിലെയും താരങ്ങള്‍ക്ക് നിര്‍ണയിച്ചു നല്‍കിയിട്ടുണ്ട്. ഓരോ ഡ്രാഫ്റ്റ് റൗണ്ട് വരുമ്പോഴും ഒരോ ടീമുകള്‍ ആ നിശ്ചിത വിലക്ക് അവര്‍ക്ക് വേണ്ട താരത്തെ സ്വന്തമാക്കുകയാണ് ചെയ്യുക. താരവും ഐ.എസ്.എല്‍ അധികൃതരും തമ്മില്‍ ചര്‍ച്ച ചെയ്ത് തീരുമാനിച്ച തുകയായതിനാല്‍ ഇതില്‍ മാറ്റം വരില്ല. പത്തു ടീമുകളില്‍ പുതിയ ക്ലബായ ടാറ്റക്കൊഴികെ ബാക്കി മുഴുവന്‍ ടീമുകള്‍ക്കും രണ്ടു സീനിയര്‍ താരങ്ങളെ നിലനിര്‍ത്താനുള്ള അവസരം ഐഎസ്എല്‍ നല്‍കിയിരുന്നു. സീനിയര്‍ താരങ്ങള്‍ക്ക് പുറമെ മൂന്ന് അണ്ടര്‍-21 താരങ്ങളേയും ക്ലബുകള്‍ക്ക് നിലനിര്‍ത്താമായിരുന്നു. ഡല്‍ഹി ഒഴിച്ചുള്ള മറ്റു ടീമുകളെല്ലാം ഈ അവസരം പ്രയോജനപ്പെടുത്തി. രണ്ട് സീനിയര്‍ താരങ്ങളെ നിലനിര്‍ത്തിയ ടീമുകള്‍ക്ക് ആദ്യ രണ്ട് റൗണ്ട് ഡ്രാഫ്റ്റില്‍ പങ്കെടുക്കാന്‍ കഴിയില്ല. അണ്ടര്‍ 21 താരങ്ങളായി നിലനിര്‍ത്തിയ താരങ്ങള്‍ ഇന്ത്യന്‍ ടീമിനു വേണ്ടി കളിച്ചിട്ടുണ്ടെങ്കില്‍ ഡ്രാഫ്റ്റില്‍ മറ്റൊരു റൗണ്ടും ടീമിന് നഷ്ടമാകും.
ആദ്യ അവസരം ടാറ്റക്ക്
ആകെ 15 റൗണ്ടുകളാണ് ഡ്രാഫ്റ്റിലുള്ളത്. ആദ്യ രണ്ടു റൗണ്ടുകളില്‍ ടാറ്റയും ഡല്‍ഹിയും പൂനെയും ഉണ്ടാകുമെങ്കിലും പുതിയ ടീം എന്ന പരിഗണന വച്ച് ആ രണ്ടു റൗണ്ടുകളിലേയും ആദ്യ താര വിളി ടാറ്റ ടീമിനാണ് ലഭിക്കുക. തുടര്‍ന്ന് ഡല്‍ഹിക്കും പൂനെക്കും അവസരം ലഭിക്കും. മൂന്നാം റൗണ്ട് മുതലാണ് കേരള ബ്ലാസ്റ്റേഴ്സ് ഉള്‍പ്പെടെയുള്ള ക്ലബുകള്‍ക്ക് ലേലത്തില്‍ പങ്കെടുക്കുന്നത്. ചെന്നൈയിന് എഫ്.സിക്ക് നാലാം റൗണ്ടില്‍ മാത്രമാണ് ഡ്രാഫ്റ്റില്‍ പങ്കെടുക്കാനാവുക. മൂന്നാം റൗണ്ട് മുതല്‍ ആര്‍ക്ക് ആദ്യം താരങ്ങളെ വിളിക്കാമെന്നത് നറുക്കെടുപ്പിലൂടെ തീരുമാനിക്കും.
താരങ്ങളെ മറിച്ചു വാങ്ങാന്‍ ഇന്‍സ്റ്റന്റ് ട്രേഡിങ്
ഒരു ക്ലബ്ബ് സ്വന്തമാക്കിയ കളിക്കാരനെ മറിച്ചു വാങ്ങാനുള്ള ഇന്‍സ്റ്റന്റ് ട്രേഡിങ് സിസ്റ്റം കഴിഞ്ഞ ഐഎസ്എല്‍ ഡ്രാഫ്റ്റില്‍ ഉണ്ടായിരുന്നു. ഇത്തവണയും അത് നില നിര്‍ത്തിയിട്ടുണ്ട്. ഡ്രാഫ്റ്റില്‍ ഒരു ടീം വിളിച്ച താരത്തെ മറ്റൊരു ടീമിന് ആവശ്യമുണ്ടെങ്കില്‍ 15 സെക്കന്റിനകം ബസറില്‍ വിരലമര്‍ത്തിയാല്‍ ആ ക്ലബ്ബിന് അവസരം ലഭിക്കും. ഇരുക്ലബ്ബുകളുമായി നിശ്ചിത സമയത്തിനകം ചര്‍ച്ച നടത്തി കളിക്കാരനെ വില്‍പന നടത്തും. മൂന്നാം റൗണ്ട് മുതല്‍ ഇതിന് അവസരമുണ്ട്. ഉദാഹരണത്തിന് കേരള ബ്ലാസ്റ്റേഴ്സിന് താല്‍പര്യമുണ്ടായിരുന്ന അനസ് എടത്തൊടികയെ ടാറ്റയോ പൂനെയോ സ്വന്തമാക്കിയാല്‍ 15 സെക്കന്റിനകം ഇന്‍സ്റ്റന്റ് ട്രേഡിങിനായി ബ്ലാസ്റ്റേഴ്സിന് ഒരു ഓഫര്‍ ടീമുകള്‍ക്ക് നല്‍കാനാവും. ഒരു മിനുറ്റിനുള്ളില്‍ ടീമുകള്‍ക്ക് ബ്ലാസ്റ്റേഴ്സിന്റെ ഓഫര്‍ അംഗീകരിക്കുകയോ നിരസിക്കുകയോ ചെയ്യാം. അംഗീകരിച്ചാല്‍ അനസിനെ കേരളത്തിന് കേരളം ഓഫര്‍ ചെയ്ത തുകക്ക് കിട്ടും പക്ഷേ പകരം അടുത്ത ഡ്രാഫ്റ്റ് റൗണ്ടില്‍ താരത്തെ വിളിക്കാനുള്ള കേരളത്തിന്റെ അവസരം ടാറ്റക്ക് നല്‍കേണ്ടി വരും. ഇന്‍സ്റ്റന്റ് ട്രേഡിങ് നടന്നാല്‍ താരത്തിന് നേരത്തെ നിര്‍ണയിച്ച വിലയിലും മാറ്റമുണ്ടാകും.
പ്ലയര്‍ ഡ്രാഫ്റ്റില്‍ പങ്കെടുക്കുന്ന
ടീമുകള്‍ നിലനിര്‍ത്തിയ താരങ്ങളുടെ പട്ടിക ഇങ്ങനെ
കേരള ബ്ലാസ്റ്റേഴ്സ്: സി.കെ വിനീത്, സന്ദേശ് ജിങ്കന്‍ (സീനിയര്‍), പ്രശാന്ത് മോഹന്‍ (അണ്ടര്‍-21), മൂന്നാം റൗണ്ട് മുതല്‍ താരങ്ങളെ വിളിക്കാം.
ബെംഗളൂരു എഫ്.സി: സുനില്‍ ഛേത്രി, ഉദാന്ത സിങ് (സീനിയര്‍) നിഷു കുമാര്‍, മാല്‍സ്വോംസാല (അണ്ടര്‍-21). മൂന്നാം റൗണ്ട് മുതല്‍ താരങ്ങളെ വിളിക്കാം
അത്ലറ്റിക്കോ കൊല്‍ക്കത്ത: ദേബ്ദിത് മജുംദാര്‍, പ്രബീര്‍ ദാസ് (സീനിയര്‍). മൂന്നാം റൗണ്ട് മുതല്‍ താരങ്ങളെ വിളിക്കാം
ചെന്നൈയിന് എഫ്.സി: ജെജെ ലാല്‍പെക്ലുവ, കരണ്‍ജിത് സിങ് (സീനിയര്‍). ജെറി ലാല്‍റിന്‍സുവാല, അനിരുദ്ധ് ഥാപ (അണ്ടര്‍-21). ജെറി ദേശീയ ടീമില്‍ കളിച്ചിട്ടുള്ളതിനാല്‍ നാലാം റൗണ്ടില്‍ മാത്രമേ ചെന്നൈയിന് പങ്കെടുക്കാനാവൂ.
ഡല്‍ഹി ഡൈനാമോസ്: ഒരു താരത്തെയും നില നിര്‍ത്തിയില്ല, ഡ്രാഫ്റ്റില്‍ ആദ്യ റൗണ്ടില്‍ താരങ്ങളെ വിളിക്കാം.
പൂനെ സിറ്റി: വിശാല്‍ കെയ്ത് (സീനിയര്‍), ആശിഖ് കുരുണിയന്‍ (അണ്ടര്‍-21). രണ്ടാം റൗണ്ടില്‍ താരങ്ങളെ വിളിക്കാം.
മുംബൈ സിറ്റി: അമ്രീന്ദര്‍ സിങ്, ഷെഹ്നാജ് സിങ് (സീനിയര്‍), രാകേഷ് ഓറം (അണ്ടര്‍-21). മൂന്നാം റൗണ്ട് മുതല്‍ താരങ്ങളെ എടുക്കാം.
എഫ്.സി ഗോവ: മന്ദര്‍റാവു ദേശായി, ലക്ഷ്മികാന്ത് കട്ടിമണി (സീനിയര്‍), മൂന്നാം റൗണ്ട് മുതല്‍ താരങ്ങളെ എടുക്കാം.
നോര്‍ത്ത് ഈസ്റ്റ് യുണൈറ്റഡ്: ടി.പി രഹനേഷ്, റൗളിങ്ഗ് ബോര്‍ജസ് (സീനിയര്‍). മൂന്നാം റൗണ്ട് മുതല്‍ താരങ്ങളെ എടുക്കാം.
ടാറ്റ ജംഷഡ്പൂര്‍: പുതിയ ടീം, ആദ്യ റൗണ്ടില്‍ ഡ്രാഫ്റ്റില്‍ താരങ്ങളെ എടുക്കാം.
ഡ്രാഫ്റ്റിലെ വിലയേറിയ പത്തു താരങ്ങള്‍
1) അനസ് എടത്തൊടിക-1.10 കോടി
2) യൂജെന്‍സണ്‍ ലിങ്ദോ-1.10 കോടി
3) സുബ്രതാ പോള്‍-87 ലക്ഷം
4) പ്രീതം കോട്ടാല്‍-75 ലക്ഷം
5) അരിന്ദം ഭട്ടാചാര്യ-73 ലക്ഷം
6) ബല്‍വന്ത് സിങ്-65 ലക്ഷം
7) റോബിന്‍ സിങ്-65 ലക്ഷം
8) റിനോ ആന്റോ-63 ലക്ഷം
8) ലെന്നി റോഡിഗ്രസ്-60 ലക്ഷം
10) നാരായണ്‍ ദാസ്-58 ലക്ഷം
10) പ്രണോയ് ഹാല്‍ഡെര്‍-58 ലക്ഷം
ഡ്രാഫ്റ്റിലെ മലയാളി താരങ്ങള്‍
1) അനസ് എടത്തൊടിക-1.10 കോടി
2) റിനോ ആന്റോ-വില-63 ലക്ഷം
3) മുഹമ്മദ് റാഫി-30 ലക്ഷം
4) സക്കീര്‍ മുണ്ടംപാറ-18 ലക്ഷം
5) ഡെന്‍സണ്‍ ദേവദാസ്-15 ലക്ഷം
6) ജസ്റ്റിന്‍ സ്റ്റീഫന്‍-14 ലക്ഷം
7) നിധിന്‍ ലാല്‍-12 ലക്ഷം
8) അബ്ദുല്‍ ഹഖ്-12 ലക്ഷം
9) ഷാഹിന്‍ ലാല്‍-8 ലക്ഷം
10) ഉബൈദ് ചോണോകടവത്ത്-6 ലക്ഷം
11) അക്ഷയ് ജോഷി-6 ലക്ഷം
12) അജിത് ശിവന്‍-6 ലക്ഷം
Health
സോനു സൂദും ആസ്റ്റര്‍ മെഡ്‌സിറ്റിയും കൈകോര്‍ത്തു; ഏഴു മാസം പ്രായമുള്ള കുഞ്ഞില്‍ കരള്‍ മാറ്റിവയ്ക്കല്‍ വിജയകരമായി പൂര്‍ത്തിയാക്കി
ആസ്റ്റര്‍ വോളന്റിയേഴ്‌സ്, ബോളിവുഡ് നടന്‍ സോനു സൂദുമായി സഹകരിച്ച്, കരള്‍ രോഗബാധിതരായ നിര്‍ധന കുടുംബങ്ങളിലെ കുട്ടികളുടെ ചികിത്സയ്ക്കു വേണ്ടി തുടങ്ങിയ ദി സെക്കന്റ് ചാന്‍സ് ഇനീഷ്യേറ്റീവ് പദ്ധതിയിലെ ആദ്യത്തെ കരള്‍ മാറ്റിവയ്ക്കല്‍ ശസ്ത്രക്രിയ ആസ്റ്റര്‍ മെഡ്‌സിറ്റിയില്‍ വിജയകരമായി പൂര്‍ത്തിയാക്കി.
കൊച്ചി: ആസ്റ്റര്‍ വോളന്റിയേഴ്‌സ്, ബോളിവുഡ് നടന്‍ സോനു സൂദുമായി സഹകരിച്ച്, കരള്‍ രോഗബാധിതരായ നിര്‍ധന കുടുംബങ്ങളിലെ കുട്ടികളുടെ ചികിത്സയ്ക്കു വേണ്ടി തുടങ്ങിയ ദി സെക്കന്റ് ചാന്‍സ് ഇനീഷ്യേറ്റീവ് പദ്ധതിയിലെ ആദ്യത്തെ കരള്‍ മാറ്റിവയ്ക്കല്‍ ശസ്ത്രക്രിയ ആസ്റ്റര്‍ മെഡ്‌സിറ്റിയില്‍ വിജയകരമായി പൂര്‍ത്തിയാക്കി. മുഹമ്മദ് സഫാന്‍ അലി എന്ന ഏഴുമാസം പ്രായമുള്ള കുഞ്ഞിന്റെ കരളാണ് മാറ്റിവച്ചത്. കൊച്ചി ആസ്റ്റര്‍ മെഡ്‌സിറ്റി ആശുപത്രിയില്‍ നടന്ന ശസ്ത്രക്രിയയില്‍ കുട്ടിയുടെ അമ്മ തന്നെയായിരുന്നു കരള്‍ ദാതാവ്.
നാല് മാസം പ്രായമുള്ളപ്പോഴാണ് സഫാന്‍ അലിയെ ആസ്റ്റര്‍ മെഡ്‌സിറ്റിയിലേക്ക് കൊണ്ടുവരുന്നത്. പിത്തരസം കുഴലുകള്‍ അഥവാ, കരളിനെ കുടലുമായി ബന്ധിപ്പിക്കുന്ന ട്യൂബ് വികസിക്കാത്ത അപൂര്‍വ രോഗാവസ്ഥയായ ബിലിയറി അട്രേസിയയാണ് കുഞ്ഞിനെന്ന് രോഗനിര്‍ണയത്തിലൂടെ കണ്ടെത്തി. മഞ്ഞപ്പിത്തത്തിനും കണ്ണുകളുടെ മഞ്ഞനിറത്തിനും കാരണമാകുന്ന രോഗം ക്രമേണ കരളിന്റെ പ്രവര്‍ത്തനത്തെ തകരാറിലാക്കുകയാണ് ചെയ്യുക. തെലങ്കാന സ്വദേശികളായ കുടുംബം ജന്മനാടായ കരിംനഗറിലെ ആശുപത്രിയില്‍ വച്ച് നടത്തിയ ശസ്ത്രക്രിയ പരാജയപ്പെട്ടിരുന്നു. ഇത് മഞ്ഞപ്പിത്തത്തിന്റേയും സിറോസിസ് ബാധയുടേയും മൂര്‍ച്ച കൂട്ടി. ഇതോടെ കരള്‍ മാറ്റിവയ്ക്കുകയെല്ലാതെ വേറെ വഴിയില്ലെന്നായി. കുഞ്ഞിന്റെ രോഗവിവരം അറിഞ്ഞ സോനു സൂദിന്റെ സഹായത്തോടെയാണ് കുടുംബം കൊച്ചിയിലെ ആസ്റ്റര്‍ മെഡ്‌സിറ്റിയിലേക്ക് എത്തുന്നതും കഴിഞ്ഞ ദിവസം ശസ്ത്രക്രിയ വിജയകരമായി പൂര്‍ത്തിയാക്കിയതും.
സഫാന്‍ ആസ്റ്റര്‍ മെഡ്‌സിറ്റിയിലെത്തുമ്പോള്‍ മഞ്ഞപ്പിത്തം, പോഷകാഹാരക്കുറവ്, വളര്‍ച്ചക്കുറവ് തുടങ്ങിയ ആരോഗ്യപ്രശ്‌നങ്ങള്‍ കാര്യമായി അലട്ടിയിരുന്നതായി ആസ്റ്റര്‍ മെഡ്‌സിറ്റി ലീഡ് സീനിയര്‍ കണ്‍സള്‍ട്ടന്റ് ഡോ. മാത്യു ജേക്കബ് പറഞ്ഞു. കുഞ്ഞിന്റെ രോഗസ്ഥിതിയെ കുറിച്ചും, അടിയന്തരമായി ശസ്ത്രക്രിയ വേണമെന്നും കുടുംബത്തെ അറിയിച്ചു. കുട്ടിയുടെ പ്രായവും അവികസിത ശരീരഘടനയുള്‍പ്പടെ വലിയ വെല്ലുവിളിയായിരുന്നു എങ്കിലും തടസ്സങ്ങളില്ലാതെ ശസ്ത്രക്രിയ പൂര്‍ത്തിയാക്കാനായി. കുഞ്ഞ് വളരെ വേഗം സുഖം പ്രാപിച്ചു വരുന്നതായും മഞ്ഞപ്പിത്തം ഉള്‍പ്പടെയുള്ള ആരോഗ്യപ്രശ്‌നങ്ങള്‍ നീങ്ങിയതായും ഡോ. മാത്യു ജേക്കബ് വ്യക്തമാക്കി.
ഹെപ്പറ്റോളജിസ്റ്റ് വിഭാഗം സീനിയര്‍ കണ്‍സള്‍ട്ടന്റ് ഡോ. ചാള്‍സ് പനക്കല്‍, പീഡിയാട്രിക് ഗ്യാസ്‌ട്രോ എന്‍ട്രോളജി വിഭാഗത്തിലെ ഡോ. ഗീത മമ്മയില്‍, കണ്‍സള്‍ട്ടന്റ് സര്‍ജന്‍ ഡോ. സുധീര്‍ മുഹമ്മദ് എം, ഡോ. ബിജു ചന്ദ്രന്‍ എന്നിവരുള്‍പ്പെട്ട വിദഗ്ധ സംഘമാണ് ശസ്ത്രക്രിയക്ക് നേതൃത്വം നല്‍കിയത്.സഫാനെ പോലെ വളരെ ചെറിയ പ്രായമുള്ള കുഞ്ഞിനെ ജീവിതത്തിലേക്ക് മടക്കി കൊണ്ടുവരാനായതില്‍ അതിയായ സന്തോഷമുണ്ടെന്ന് ആസ്റ്റര്‍ ഡിഎം ഹെല്‍ത്ത് കെയര്‍ സ്ഥാപക ചെയര്‍മാനും മാനേജിംഗ് ഡയറക്ടറുമായ ഡോ. ആസാദ് മൂപ്പന്‍ പറഞ്ഞു. കരള്‍ മാറ്റിവയ്ക്കല്‍ ഏറെ ചിലവേറിയതും രാജ്യത്ത് ചുരുക്കം ചില ആശുപത്രികളില്‍ മാത്രം സൗകര്യവുമുള്ള ചികിത്സ രീതിയാണ്. ആസ്റ്റര്‍ മെഡ്‌സിറ്റിയിലെ ഇന്റഗ്രേറ്റഡ് ലിവര്‍ ട്രാന്‍സ്പ്ലാന്റ് ടീം രാജ്യത്തെ തന്നെ ഏറ്റവും മികച്ച പീഡിയാട്രിക് കരള്‍ മാറ്റിവയ്ക്കല്‍ വിഭാഗമാണ്. മെഡ്‌സിറ്റിയിലെ കരള്‍ മാറ്റിവയ്ക്കല്‍ ശസ്ത്രക്രിയക്ക് മറ്റിടങ്ങളേക്കാള്‍ ചിലവ് കുറവാണെങ്കിലും, പല രക്ഷിതാക്കള്‍ക്കും അത് താങ്ങാനാവുന്നതിലും അപ്പുറമാണ്. സോനു സൂദിനെ പോലെ ജീവകാരുണ്യ പ്രവര്‍ത്തനങ്ങളില്‍ ഏറെ തല്‍പരനായ താരത്തോടടൊപ്പം പദ്ധതിയില്‍ സഹകരിക്കാനായതിലും, നിരാലംബരായ നിരവധി കുടുംബങ്ങള്‍ക്ക് പ്രതീക്ഷയാകാനായതിലും ആസ്റ്ററിന് വലിയ സന്തോഷമുണ്ടെന്നും ആസാദ് മൂപ്പന്‍ വ്യക്തമാക്കി.
സാമ്പത്തികമായി പിന്നോക്കം നില്‍ക്കുന്ന 50 കുടുംബങ്ങളിലെ കുട്ടികള്‍ക്കാണ് ദി സെക്കന്റ് ചാന്‍സ് ഇനീഷ്യേറ്റീവിന്റെ ഭാഗമായി ചികിത്സ സഹായം ലഭിക്കുക. മെയ് മാസത്തില്‍ പദ്ധതിയുടെ പ്രഖ്യാപനം വന്നതിന് പിന്നാലെ അര്‍ഹരായ നിരവധി പേരാണ് ചികിത്സ സഹായം ആവശ്യപ്പെട്ട് മുന്നോട്ട് വന്നത്. മെഡിക്കല്‍ രംഗത്ത് രാജ്യം വലിയ പുരോഗതി കൈവരിച്ചിട്ടുണ്ടെങ്കിലും സഫാന്‍ അലിയെയും കുടുംബത്തെയും പോലുള്ളവര്‍ക്ക് ഉയര്‍ന്ന ചിലവ് കാരണം അതിന്റെ പ്രയോജനം ഇപ്പോഴും അകലെയാണെന്ന് സോനു സൂദ് പറഞ്ഞു. സെക്കന്‍ഡ് ചാന്‍സ് ഇനീഷ്യേറ്റീവിലൂടെ കൂടുതല്‍ കുട്ടികള്‍ക്ക് പുതിയ ജീവിതം സമ്മാനിക്കാനാവുമെന്നാണ് പ്രതീക്ഷയെന്നും അദ്ദേഹം കൂട്ടിച്ചേര്‍ത്തു.
അവയവം മാറ്റിവയ്ക്കല്‍ ശസ്ത്രക്രിയകള്‍ക്കായി അത്യാധുനിക സൗകര്യങ്ങളോട് കൂടിയ മള്‍ട്ടി-ഓര്‍ഗന്‍ ട്രാന്‍സ്പ്ലാന്റ് സെന്ററിന് ആസ്റ്റര്‍ ഹോസ്പിറ്റല്‍സ് രൂപം നല്‍കിയിരുന്നു. കരള്‍, വൃക്ക, ഹൃദയം, ശ്വാസകോശം, കോര്‍ണിയ, മജ്ജ തുടങ്ങി വിവിധ മാറ്റിവയ്ക്കല്‍ ശസ്ത്രക്രിയകള്‍ നടത്തുന്നതില്‍ ഏറെ വൈദഗ്ധ്യമുള്ള സര്‍ജന്‍മാരുടെ സംഘമാണ് ഈ കേന്ദ്രത്തെ നയിക്കുന്നത്. ദക്ഷിണേന്ത്യയിലെ തന്നെ ഏറ്റവും വലിയ പീഡിയാട്രിക് കരള്‍ മാറ്റിവയ്ക്കല്‍ വിഭാഗവും ഇവിടെയുണ്ട്. കുട്ടികളിലെ കരള്‍ രോഗ സംബന്ധമായി സമഗ്രമായ പരിചരണം ലക്ഷ്യമിട്ടുള്ളതാണ് ഇത്. മികച്ച കരള്‍ രോഗ വിദഗ്ധര്‍, കരള്‍ ശസ്ത്രക്രിയാ വിദഗ്ധര്‍, പരിശീലനം ലഭിച്ച കോര്‍ഡിനേറ്റര്‍മാര്‍, കൗണ്‍സിലര്‍മാര്‍ എന്നിവര്‍ക്ക് പുറമേ ക്രിട്ടിക്കല്‍ കെയര്‍ സ്പെഷ്യലിസ്റ്റുകള്‍, അനസ്തെറ്റിസ്റ്റുകള്‍, ഇന്റര്‍വെന്‍ഷണല്‍ റേഡിയോളജിസ്റ്റുകള്‍, ഫിസിയോതെറാപ്പിസ്റ്റുകള്‍ എന്നിവരും മികച്ച ഒരു നഴ്സിങ്ങ് ടീമും ഈ മള്‍ട്ടി-ഓര്‍ഗന്‍ ട്രാന്‍സ്പ്ലാന്റ് കേന്ദ്രത്തിലുണ്ട്. അഞ്ഞൂറിലധികം കരള്‍ മാറ്റിവയ്ക്കല്‍ ശസ്ത്രക്രിയകള്‍ ഇതിനോടകം വിജകരമായി ഇവിടെ പൂര്‍ത്തിയാക്കി കഴിഞ്ഞു.
Health
ഓള്‍ ഇന്ത്യ ക്രിട്ടിക്കല്‍ കെയര്‍ ഹോസ്പിറ്റല്‍ സര്‍വ്വേയില്‍ ആസ്റ്റര്‍ ഹോസ്പിറ്റലുകള്‍ക്ക് മികച്ച നേട്ടം
ആതുര സേവന രംഗത്ത് രാജ്യത്തെ മികച്ച ആശുപത്രികളെ തിരഞ്ഞെടുക്കുന്ന ഓള്‍ ഇന്ത്യ ക്രിട്ടിക്കല്‍ കെയര്‍ സര്‍വ്വേ 2022ല്‍ ആസ്റ്റര്‍ ഹോസ്പിറ്റലുകള്‍ക്ക് നേട്ടം.
ആതുര സേവന രംഗത്ത് രാജ്യത്തെ മികച്ച ആശുപത്രികളെ തിരഞ്ഞെടുക്കുന്ന ഓള്‍ ഇന്ത്യ ക്രിട്ടിക്കല്‍ കെയര്‍ സര്‍വ്വേ 2022ല്‍ ആസ്റ്റര്‍ ഹോസ്പിറ്റലുകള്‍ക്ക് നേട്ടം. കേരളത്തില്‍ നിന്നുള്ള ഏറ്റവും മികച്ച മള്‍ട്ടി സ്പെഷ്യലിറ്റി ഹോസ്പിറ്റലായി ആസ്റ്റര്‍ മെഡ്‌സിറ്റി കൊച്ചി തിരഞ്ഞെടുക്കപ്പെട്ടു.
കാര്‍ഡിയോളജി, യൂറോളജി, ഗ്യാസ്‌ട്രോഎന്‍ട്രോളജി&ഹീപ്പറ്റോളജി, ഓന്‍കോളജി, നെഫ്‌റോളജി, ന്യൂറോസയന്‍സസ്, എമര്‍ജന്‍സി ആന്‍ഡ് ട്രോമ, പീടിയാട്രിക്‌സ്, ഒബ്‌സ്റ്റെട്രിക്‌സ് ആന്‍ഡ് ഗൈനക്കോളജി എന്നീ വിഭാഗങ്ങളില്‍ ആസ്റ്റര്‍ മെഡ്‌സിറ്റി കൊച്ചി, ആസ്റ്റര്‍ മിംസ് കോഴിക്കോട് എന്നിവ ദേശീയ തലത്തില്‍ ഉയര്‍ന്ന റാങ്കുകള്‍ കരസ്ഥമാക്കി.
ആരോഗ്യ പരിചരണത്തിന് ഡോക്ടര്‍മാരുടെ സേവനം ഫലപ്രദമാവണമെങ്കില്‍ ചികിത്സാ അനുബന്ധമേഖലകളില്‍ പ്രാവീണ്യമുള്ള വിദഗ്ധരുടെ പിന്തുണ അനിവാര്യമാണെന്നതില്‍ തര്‍ക്കമില്ലല്ലോ? ചികിസ്തയുമായി ബന്ധപ്പെട്ട മേഖലകളിലെല്ലാം ഇടപെടല്‍ നടത്താന്‍ പരിശീലനം ലഭിച്ച പാരാമെഡിക്കല്‍ അല്ലെങ്കില്‍ അലൈഡ് മെഡിക്കല്‍ പ്രൊഫെഷനലുകള്‍ ആരോഗ്യ മേഖലയുടെ നട്ടെല്ലാണ്. ലോകത്തിന്റെ വിവിധ ഭാഗങ്ങളില്‍ മലയാളി വിദഗ്ധര്‍ നിസ്തുലമായ സംഭാവനകളാണ് ഈ രംഗത്തര്‍പ്പിച്ചുകൊണ്ടിരിക്കുന്നത്.
പാരാമെഡിക്കല്‍ മേഖലയിലെ പഠനാവസരങ്ങള്‍ മനസിലാക്കി യുക്തമായ കോഴ്‌സുകള്‍ തിരഞ്ഞെടുക്കാന്‍ ശ്രമിക്കുക എന്നതേറെ പ്രധാനമാണ്. പ്ലസ്ടു സയന്‍സ് ഗ്രൂപ് എടുത്ത് പഠിച്ചവര്‍ക്കാണ് പാരാമെഡിക്കല്‍ കോഴ്‌സുകള്‍ക് ചേരാനുള്ള യോഗ്യതയുള്ളത്. ബിരുദ, ഡിപ്ലോമ പ്രോഗ്രാമുകളാണ് നിലവിലുള്ളതെങ്കിലും ബിരുദ പ്രോഗ്രാമുകള്‍ പഠിക്കാനവസരം ലഭിക്കുമെങ്കിലത് കൂടുതല്‍ മികവുറ്റ അവസരങ്ങളിലെത്തിക്കുമെന്നോര്‍ക്കുക.
ഫാര്‍മസി ബിരുദ പ്രോഗ്രാമായ ബി.ഫാം ഒഴികെയുള്ള കോഴ്‌സുകളിലേക്കുള്ള അഡ്മിഷന്‍ നടക്കുന്നത് പ്ലസ്ടു മാര്‍ക്കിന്റെയടിസ്ഥാനത്തിലാണ്. ബി.ഫാം കോഴ്‌സ് പ്രവേശനം കേരള എന്‍ട്രന്‍സ് കമ്മീഷണര്‍ നടത്തിയ എന്‍ട്രന്‍സ് വഴിയായിരിക്കും. മറ്റു പാരാമെഡിക്കല്‍ ബിരുദ കോഴ്‌സുകളുടെ പ്രവേശനം നടത്തുന്നത് കേരള സര്‍ക്കാറിന്റെ നിയന്ത്രണത്തിലുള്ള ലാല്‍ ബഹദൂര്‍ ശാസ്ത്രി സെന്റര്‍ ഫോര്‍ സയന്‍സ് ആന്‍ഡ് ടെക്‌നോളജിയാണ്. പ്രവേശന പരീക്ഷയില്ലെങ്കിലും പ്ലസ്ടുവിന് മികച്ച മാര്‍ക്ക് നേടിയവര്‍ക്കാണ് താല്‍പര്യപ്പെട്ട കോഴ്‌സ് മികച്ച സ്ഥാപനത്തില്‍ പഠിക്കാനവസരമുണ്ടാവുക.
ബിരുദ കോഴ്‌സുകളില്‍ പ്രവേശനത്തിനുള്ള അറിയിപ്പ് ഉടനുണ്ടാവുമെന്നും ആവശ്യമായ സര്‍ട്ടിഫിക്കറ്റുകള്‍ തയാറാക്കി വെക്കണമെന്നും എല്‍ബിഎസ് അറിയിച്ചിട്ടുണ്ട്. എല്ലാ കോഴ്‌സുകള്‍ക്കും ഒരേ തരത്തിലുള്ള തൊഴില്‍ സാധ്യതകളല്ല നിലവിലുള്ളതെന്ന് തിരിച്ചറിഞ്ഞ് അവരവരുടെ അഭിരുചിയും തിരഞ്ഞെടുക്കാനുദ്ദേശിക്കുന്ന കോഴ്‌സിന്റെ തൊഴില്‍ മേഖലയും സാധ്യതയും മനസിലാക്കി വിവേകപൂര്‍ണമായ തീരുമാനമെടുക്കാന്‍ ശ്രദ്ധിക്കണം. സ്വന്തമായി പ്രാക്ടീസ് ചെയ്യാന്‍ സാധ്യതകളുള്ള കോഴ്‌സുകളും ഹോസ്പിറ്റലുകളുമായി മാത്രം ബന്ധപ്പെട്ട് പ്രവര്‍ത്തിക്കാന്‍ അവസരമൊരുക്കുന്ന മേഖലകളും വെവ്വേറെയായിത്തന്നെ കാണണം.ബി.എസ്.സി നഴ്‌സിംഗ് കോഴ്‌സുകള്‍ക്കൊപ്പം പ്രവേശനം നടത്തുന്ന പാരാമെഡിക്കല്‍ ബിരുദ കോഴ്‌സുകളെക്കുറിച്ചല്‍പം വിശദീകരിക്കാം.
ബി.എസ്.സി മെഡിക്കല്‍
ലാബ് ടെക്‌നോളജി
മെഡിക്കല്‍ സാമ്പിളുകള്‍ ശേഖരിക്കാനും ഉചിതമായ പരിശോധനകള്‍ നടത്താനും ലഭ്യമായ ഫലങ്ങള്‍ വിശകലനം ചെയ്യാന്‍ ഡോക്ടറെ സഹായിക്കുകയും ചെയ്യുന്നതുമായി ബന്ധപ്പെട്ടതാണീ കോഴ്‌സ്. രക്തമടക്കമുള്ള സാമ്പിളുകളിലെ സൂക്ഷ്മ ജീവികളുടെ സാന്നിധ്യം, രാസവിശകലനം, വിവിധ ഘടകങ്ങളുടെ അളവ് എന്നിവ സംബന്ധിച്ച് വിശലകലനം നടത്തുന്നത് രോഗനിര്‍ണയത്തിലേറെ സഹായകരമായിരിക്കും. പഠനത്തിന്റെ ഭാഗമായി ഹെമറ്റോളജി, ഹിസ്‌റ്റോ പത്തോളജി, മൈക്രോബയോളജി, ബയോകെമിസ്ട്രി എന്നിവയിലവഗാഹം നേടാനാവസരമുണ്ടാവും. യോഗ്യതയോടൊപ്പം വൈഭവവും പ്രയോഗികാനുഭവവും നേടി സ്വതന്ത്ര ലാബുകളും ആശുപതികളുമായി ബന്ധപ്പെട്ട് ടെക്‌നൊളജിസ്റ്റ്, സൂപ്പര്‍വൈസര്‍, മാനേജര്‍, അനലിസ്റ്റ് എന്നീ തസ്തികളില്‍ ജോലിക്ക് ശ്രമിക്കാം.
ബി.എസ്.സി മെഡിക്കല്‍ റേഡിയോളജിക്കല്‍
ടെക്‌നോളജി
എക്‌സ്‌റേ, എം.ആര്‍.ഐ, സി.ടി സ്‌കാന്‍ അടക്കമുള്ള ഇമേജിങ് നടപടിക്രമങ്ങള്‍ ഉപയോഗപ്പെടുത്തി രോഗനിര്‍ണയം നടത്താന്‍ ഡോക്ടറെ സഹായിക്കുന്ന പ്രൊഫഷനലുകളാണ് റേഡിയോളജിക്കല്‍ ടെക്‌നൊളജിസ്റ്റുകള്‍. കാര്‍ഡിയോ വാസ്‌കുലാര്‍ ഇന്റര്‍വെന്‍ഷണല്‍ റേഡിയോഗ്രാഫര്‍, മാമോഗ്രാഫി തുടങ്ങിയ മേഖലകളില്‍ സ്‌പെഷ്യലൈസ് ചെയ്യാനവസരമുണ്ട്. അനാട്ടമി, ഫിസിയോളജി, അറ്റോമിക്‌സ് ആന്‍ഡ് ന്യുക്ലിയാര്‍ ഫിസിക്‌സ്, റേഡിയേഷന്‍ ഫിസിക്‌സ്, റേഡിയോതെറാപ്പി ഇമേജിങ് ടെക്‌നിക്‌സ്, അടിസ്ഥാന ഇലക്ട്രോണിക്‌സ് തുടങ്ങിയവ പഠിക്കാനുണ്ടാവും.
ബി.എസ്.സി പെര്‍ഫ്യൂഷന്‍, ബാച്ചിലര്‍ ഓഫ്
കാര്‍ഡിയോ വാസ്‌കുലാര്‍ ടെക്‌നോളജി
ഹൃദയം, ശ്വാസകോശം തുടങ്ങിയവയുടെ അസുഖങ്ങളുമായി ബന്ധപ്പെട്ടു ശസ്ത്രക്രിയകള്‍ നടക്കുന്ന വേളയില്‍ ഈ അവയവങ്ങളുടെ പ്രവര്‍ത്തനം നടത്തുന്നതിന് വേണ്ടി സ്ഥാപിക്കുന്ന യന്ത്രങ്ങളുടെ പ്രവര്‍ത്തനത്തെ നിയന്ത്രിക്കുന്ന പ്രൊഫഷനലുകളാണ് ക്ലിനിക്കല്‍ പെര്‍ഫ്യൂഷനിസ്റ്റുകള്‍. ഓപ്പണ്‍ ഹാര്‍ട്ട് ശസ്ത്രക്രിയ പോലെയുള്ള സങ്കീര്‍ണ പ്രവര്‍ത്തനങ്ങള്‍ നടത്തുമ്പോള്‍ പെര്‍ഫ്യൂഷനിസ്റ്റുകളുടെ ഉത്തരവാദിത്തം കാര്യമായുണ്ടാവും. ഹൃദയം, രക്തധമനികള്‍ എന്നിവയുമായി ബന്ധപ്പെട്ട രോഗങ്ങളുടെ നിര്‍ണയവും ചികിത്‌സയും നടത്താന്‍ ഡോക്ടറെ സഹായിക്കുന്ന പ്രൊഫഷനലുകളാണ് കാര്‍ഡിയോ വാസ്‌കുലാര്‍ ടെക്‌നൊളജിസ്റ്റുകള്‍. ഇന്‍വേസീവ് കാര്‍ഡിയോ വാസ്‌കുലാര്‍ ടെസ്റ്റിംഗ് പോലെയുള്ള ചികിത്സാ നടപടികള്‍ക്ക് കാര്‍ഡിയോ വാസ്‌ക്കുലാര്‍ ടെക്‌നൊളജിസ്റ്റുകളുടെ സേവനം ആവശ്യമായി വരും.
സാമാന്യം വലിയ ആശുപത്രികളുമായി ബന്ധപ്പെട്ടാണ് ഈ രണ്ട് പ്രൊഫഷനലുകള്‍ക്കവസരമുള്ളത്. തൊഴില്‍രീതിയുടെ സവിശേഷത കൊണ്ടും പുത്തന്‍ സാങ്കേതികവിദ്യയുടെ സ്വാധീനമുണ്ടാവാവനിടയുള്ളതുകൊണ്ടും ഈ കോഴ്‌സുകള്‍ക്ക് വിപുലമായ സാധ്യതകള്‍ കണക്കാക്കുക പ്രയാസകരമാണ്.
-
Video Stories8 years agoകൊടിഞ്ഞിയില് കൊല്ലപ്പെട്ട ഫൈസലിന്റ കഫീല് അബ്ദുല്ല അല്മുഹാവിസിന്റെ വാക്കുകള് വൈറലാവുന്നു
-
Culture8 years agoഅനസ്തേഷ്യയില്ലാത്ത ശസ്ത്രക്രിയയില്‍ ഖുര്ആന് ഉരുവിട്ട് കുഞ്ഞ്; വാര്ത്ത വായിക്കുമ്പോള് വിതുമ്പിക്കരഞ്ഞ് അവതാരകന്
-
More8 years agoഭോപ്പാല് വിവാദ ഏറ്റുമുട്ടല്; കൂടുതല്‍ തെളിവുകളോടെ മൂന്നാമത്തെ വീഡിയോ പുറത്ത്
-
More8 years ago‘മകളെ കൊണ്ട് കള്ളം പറയിച്ചു’ ദിലീപ്-കാവ്യ വിവാഹത്തില് മഞ്ജുവിന്റെ പ്രതികരണം
-
Culture8 years agoവഴിയോര കച്ചവടങ്ങളിലെ ബിരിയാണിയില് പൂച്ച മാംസം
-
Culture5 years agoവീട്ടമ്മയുടെ നഗ്നദൃശ്യങ്ങള് ഭര്ത്താവിന് വാട്സ് ആപ്പില്; പ്രതിയെ കണ്ട് ഞെട്ടി പൊലീസും വീട്ടുകാരും
-
Culture8 years ago‘സോനു നിഗം പ്രിയങ്കയില് നിന്നു പഠിക്കണം; ബാങ്കുവിളിയെക്കുറിച്ചുള്ള അധിക്ഷേപത്തിന് ശേഷം പ്രിയങ്കയുടെ ബാങ്കുവിളി പരാമര്ശം വൈറല്
-
Culture8 years agoഅണികളില് നിന്ന് ‘മുര്ദാബാദ് വിളി’; അസ്വസ്ഥനായി മോദി – മാധ്യമങ്ങള് കണ്ടില്ലെന്ന് നടിച്ച വീഡിയോ