Connect with us

Sports

ആധികാരികം കേരളം ബംഗാളിനെയും കശക്കി

Published

on

 

കൊല്‍ക്കത്ത: ഇരു ഗോള്‍മുഖത്തും അവസരങ്ങളുടെ വേലിയേറ്റം. ഗോള്‍ക്കീപ്പര്‍മാര്‍ നിരന്തരം പരീക്ഷിക്കപ്പെട്ടു. നിശ്ചിത സമയത്തിന്റെ അവസാന മിനുട്ടില്‍ മാത്രം പന്ത് വലയില്‍ കയറി. ആ പന്തിനെ പിന്തുടര്‍ന്നത് ജിതിനായിരുന്നു. വലത് പാര്‍ശ്വത്തിലൂടെ ഓടിക്കയറിയ ജിതിന്‍ പെനാല്‍ട്ടി ബോക്‌സിന് സമാന്തരമായി താഴ്ന്ന ക്രോസ് നല്‍കുമ്പോള്‍ ഇടത് പാര്‍ശ്വത്തിലൂടെ കെ.പി രാഹുല്‍ അതേ വേഗതയില്‍ ഓടി വരുന്നുണ്ടായിരുന്നു. ഒരു സില്‍ക്കി ടച്ച്-പന്ത് വലയില്‍ കയറിയപ്പോള്‍ മോഹന്‍ ബഗാന്‍ മൈതാനത്തുണ്ടായിരുന്ന ബംഗാളികള്‍ നിശബ്ദരായിരുന്നു. ആ സുന്ദര ഗോള്‍ വിജയത്തില്‍ ബംഗാളിനെ തോല്‍പ്പിച്ച് അപരാജിത റെക്കോര്‍ഡുമായി കേരളം സന്തോഷ് ട്രോഫി ദേശീയ ഫുട്‌ബോള്‍ ചാമ്പ്യന്‍ഷിപ്പില്‍ ഗ്രൂപ്പ് എയില്‍ ഒന്നാമന്മാരായി. രണ്ട് ടീമുകളും നേരത്തെ തന്നെ സെമി ടിക്കറ്റ് ഉറപ്പാക്കിയതിനാല്‍ മല്‍സരത്തിന്റെ പ്രസക്തി ഗ്രൂപ്പ് ചാമ്പ്യന്മാരെ നിര്‍ണയിക്കുന്നതില്‍ മാത്രമായിരുന്നു. ഗ്രൂപ്പിലെ രണ്ട് പ്രബലര്‍ തമ്മിലുള്ള അങ്കം പ്രതീക്ഷിക്കപ്പെട്ടത് പോലെ ആവേശകരമായിരുന്നു. പന്ത് കൈവശം വെക്കുന്നതിലും അവസരങ്ങള്‍ മെനയുന്നതിലും ആദ്യ പകുതിയില്‍ ബംഗാളായിരുന്നു മുന്നില്‍. എന്നാല്‍ രണ്ടാം പകുതിയില്‍ കേരളം ഒപ്പത്തിനൊപ്പം നിന്നു.
ആറാം മിനുട്ടില്‍ ആദ്യാവസരം ബംഗാളിനായിരുന്നു. കേരളാ പെനാല്‍ട്ടി ബോക്‌സില്‍ കയറിയ അറ്റാക്കിംഗ് മിഡ്ഫീല്‍ഡര്‍ സന്ദീപ് ഭട്ടാചാര്യ തൊടുത്ത ഷോട്ട് പക്ഷേ പുറത്തേക്കായിരുന്നു. കേരളത്തിന്റെ ആദ്യ അപകടകരമായ നീക്കം പതിമൂന്നാം മിനുട്ടിലായിരുന്നു. ആക്രമിച്ച് കളിച്ച ജിതിന പെനാല്‍ട്ടി ബോക്‌സിന് പുറത്ത് ഫൗള്‍ ചെയ്തതിന് ലഭിച്ച ഫ്രി കിക്ക് പക്ഷേ ലിജോക്ക് ലക്ഷ്യത്തിലെത്തിക്കാനായില്ല. മുപ്പത്തിമൂന്നാം മിനുട്ടില്‍ ബംഗാള്‍ ഗോളിന് അരികിലെത്തി.സന്ദീപ് തുടക്കമിട്ട നീക്കത്തില്‍ ബിദ്യാസാഗര്‍ സിംഗ് പെനാല്‍ട്ടി ബോക്‌സ് വരെ കയറിയെത്തി സുജയ് ദത്തക്ക് പന്ത് കൈമാറി. ഗോള്‍ക്കീപ്പര്‍ മാത്രം മുന്നില്‍ നില്‍ക്കെ സുജയ് ദത്തക്ക് പിഴച്ചു. ഇടവേളക്ക് തൊട്ട് മുമ്പ് ബംഗാള്‍ മറ്റൊരു സുവര്‍ണാവസരം കൂടി പാഴാക്കി. സന്ദീപ് തുടക്കമിട്ട നീക്കത്തില്‍ നിന്നും പന്ത് വാങ്ങിയ സൗരവ് ദാസ്ഗുപ്ത മാര്‍ക്ക് ചെയ്യപ്പെടാതെ നില്‍ക്കുകയായിരുന്ന രാജോണ്‍ ബര്‍മന് പന്ത് കൈമാറുമ്പോള്‍ കേരളാ ഗോള്‍ക്കീപ്പര്‍ അജ്മല്‍ സ്ഥാനം തെറ്റി നില്‍ക്കുകയായിരുന്നു. പക്ഷേ രാജോണിന്റെ ഷോട്ട് ദുര്‍ബലമായിരുന്നു.
രണ്ടാം പകുതിയിലെ ആദ്യ സുവര്‍ണാവസരം കേരളത്തിനായിരുന്നു. ബംഗാള്‍ ഗോള്‍ക്കീപ്പര്‍ രണജിത് മജുംദാര്‍ മാത്രം മുന്നില്‍ നില്‍ക്കെ ജിതിന്റെ ഷോട്ട് പുറത്ത് പോയി. വലത് വിംഗില്‍ നിന്നും ജിതിന്‍ നല്‍കിയ ക്രോസ് സ്വീകരിക്കുന്നതില്‍ അഫ്ദാല്‍ പരാജയപ്പെട്ടതോടെ മറ്റൊരവസരവും കേരളത്തിന് നഷ്ടമായി. എണ്‍പത്തിയൊന്നാം മിനുട്ടില്‍ ബംഗാള്‍ മധ്യനിരക്കാരന്‍ ബിദ്യാസാഗര്‍ സിംഗ് കേരളത്തിന്റെ മൂന്ന് ഡിഫന്‍ഡര്‍മാരെ പിറകിലാക്കി പെനാല്‍ട്ടി ബോക്‌സില്‍ കയറി നല്‍കിയ പാസ് സ്വീകരിക്കാന്‍ ബംഗാളിന്റെ മറ്റ് താരങ്ങളാരുമുണ്ടായിരുന്നില്ല. മല്‍സരം സമനിലയില്‍ അവസാനിക്കുമെന്ന ഘട്ടത്തിലാണ് രാഹുല്‍ അരങ്ങ് തകര്‍ത്ത് ഗോള്‍ നേടിയത്. നാല് മല്‍സരങ്ങളില്‍ നിന്ന് 12 പോയിന്റ്് നേടിയ കേരളം ഗ്രൂപ്പില്‍ ഒന്നാമന്മാരായപ്പോല്‍ അത്രയും മല്‍സരങ്ങളില്‍ നിന്നായി ഒമ്പത് പോയിന്റാണ് ബംഗാള്‍ സമ്പാദ്യം.
ഗ്രൂപ്പിലെ അപ്രസക്തമായ മറ്റൊരു മല്‍സരത്തില്‍ മഹാരാഷ്ട്ര 7-2 ന് മണിപ്പൂരിനെ തരിപ്പണമാക്കി. ഹാട്രിക് നേടിയ രണ്‍ജിത് സിംഗായിരുന്നു മണിപ്പൂരിന്റെ ഹീറോ. സാഹില്‍ ഭക്‌റെ, നിഖില്‍ പ്രഭു, കിരണ്‍ പന്‍ഡാരെ, നാഖിര്‍ അന്‍സാരി എന്നിവര്‍ മറ്റ് ഗോളുകള്‍ നേടി.

News

ലണ്ടനിലെത്തി മഞ്ഞപ്പട

26ന് ആരംഭിക്കുന്ന നെക്സ്റ്റ് ജെന്‍ കപ്പ് ടൂര്‍ണമെന്റിനുള്ള കേരള ബ്ലാസ്റ്റേഴ്‌സ് ടീം ലണ്ടനിലെത്തി.

Published

on

കൊച്ചി: 26ന് ആരംഭിക്കുന്ന നെക്സ്റ്റ് ജെന്‍ കപ്പ് ടൂര്‍ണമെന്റിനുള്ള കേരള ബ്ലാസ്റ്റേഴ്‌സ് ടീം ലണ്ടനിലെത്തി. ഗോവയില്‍ നടന്ന റിലയന്‍സ് ഫൗണ്ടേഷന്‍ ഡെവലപ്‌മെന്റ് ലീഗില്‍ റണ്ണേഴ്‌സ് അപ്പായാണ് ബ്ലാസ്‌റ്റേഴ്‌സ് നെക്സ്റ്റ് ജെന്‍ കപ്പിന് യോഗ്യത നേടിയത്. പ്രമുഖ പ്രീമിയര്‍ ലീഗ് ക്ലബ്ബുകളുടെ യൂത്ത് ടീമുകളെയാണ് ബ്ലാസ്‌റ്റേഴ്‌സ് നേരിടുന്നത്. ബെംഗളൂരു എഫ്‌സി, റിലയന്‍സ് ഫൗണ്ടേഷന്‍ യങ് ചാമ്പ്‌സ് എന്നീ ടീമുകളും ഇന്ത്യയില്‍ നിന്ന് മത്സരത്തിനുണ്ട്.

നിലവിലെ ചാമ്പ്യന്‍മാരായ ചെല്‍സി എഫ്‌സി, മാഞ്ചസ്റ്റര്‍ യുണൈറ്റഡ്, സതാംപ്ടണ്‍ എഫ്‌സി എന്നിവയാണ് ഇംഗ്ലീഷ് ടീമുകള്‍. അണ്ടര്‍ 21 താരങ്ങളാണ് ബ്ലാസ്‌റ്റേഴ്‌സിനായി ബൂട്ടണിയുന്നത്. രണ്ട് അണ്ടര്‍ 23 താരങ്ങളും ടീമിലുണ്ട്. പ്രീമിയര്‍ ലീഗും ഇന്ത്യന്‍ സൂപ്പര്‍ലീഗും തമ്മിലുള്ള സഹകരണത്തിന്റെ ഭാഗമായാണ് നെക്സ്റ്റ് ജെന്‍ കപ്പ് സംഘടിപ്പിക്കുന്നത്. ബ്ലാസ്റ്റേഴ്‌സ് ടീം: സച്ചിന്‍ സുരേഷ്, മുഹമ്മദ് മുര്‍ഷിദ്, മുഹീത് ഷബീര്‍ ഖാന്‍, മുഹമ്മദ് ബാസിത്, ഹോര്‍മിപാം റൂയിവാ, ബിജോയ് വി, തേജസ് കൃഷ്ണ, മര്‍വാന്‍ ഹുസൈന്‍, ഷെറിന്‍ സലാറി, അരിത്ര ദാസ്, മുഹമ്മദ് ജാസിം, ജീക്‌സണ്‍ സിങ്, ആയുഷ് അധികാരി, ഗിവ്‌സണ്‍ സിങ്, മുഹമ്മദ് അസര്‍, മുഹമ്മദ് അജ്‌സല്‍, മുഹമ്മദ് അയ്‌മെന്‍, നിഹാല്‍ സുധീഷ്. തോമക് ഷ്വാസാണ് മുഖ്യ പരിശീലകന്‍. ടി.ജി പുരുഷോത്തമന്‍ സഹപരിശീലകന്‍.

Continue Reading

News

ഇന്ത്യക്കിന്ന് രണ്ടാം ഏകദിനം; ജയിച്ചാല്‍ പരമ്പര

ആദ്യ ഏകദിനത്തില്‍ കേവലം നാല് റണ്‍സിന് ഭാഗ്യത്തിന് രക്ഷപ്പെട്ട ഇന്ത്യക്കിന്ന് രണ്ടാം ഏകദിനം.

Published

on

പോര്‍ട്ട് ഓഫ് സ്‌പെയിന്‍: ആദ്യ ഏകദിനത്തില്‍ കേവലം നാല് റണ്‍സിന് ഭാഗ്യത്തിന് രക്ഷപ്പെട്ട ഇന്ത്യക്കിന്ന് രണ്ടാം ഏകദിനം. രാത്രി ഏഴിന് ആരംഭിക്കുന്ന മല്‍സരത്തില്‍ ജയിച്ചാല്‍ ശിഖര്‍ ധവാന്റെ സംഘത്തിന് പരമ്പര സ്വന്തമാക്കാം. പക്ഷേ ആദ്യ മല്‍സരത്തില്‍ തന്നെ വിന്‍ഡീസ് ഇന്ത്യയെ ഞെട്ടിച്ച സാഹചര്യത്തില്‍ ധവാന്റെ സംഘത്തിന് മുന്‍ കരുതല്‍ നന്നായി വേണ്ടി വരും. ആദ്യ മല്‍സരത്തില്‍ വന്‍ സ്‌ക്കോര്‍ ഉയര്‍ത്തിയിരുന്നു ഇന്ത്യ. നായകന്‍ ധവാന്‍ സ്വന്തമാക്കിയ 97 റണ്‍സ്, സഹ ഓപ്പണര്‍ ശുഭ്മാന്‍ ഗില്‍, മൂന്നാമനായ ശ്രേയാംസ് അയ്യര്‍ എന്നിവരുടെ അര്‍ധ ശതകങ്ങള്‍ എന്നിവയെല്ലാം സഹായമായപ്പോള്‍ ഏഴ് വിക്കറ്റിന് 308 റണ്‍സ്.

പക്ഷേ മറുപടിയില്‍ വിന്‍ഡീസ് 305 ലെത്തി. ഓപ്പണര്‍ ഷായ് ഹോപ്പിനെ (7) മുഹമ്മദ് സിറാജ് പെട്ടെന്ന് പുറത്താക്കിയെങ്കിലും കൈല്‍ മേയേഴ്‌സ്, ഷംറോ ബ്രുക്‌സ് എന്നിവര്‍ തകര്‍ത്തടിച്ചു. അപാര ഫോമിലായിരുന്നു മേയേഴ്‌സ്. 10 ബൗണ്ടറികളും ഒരു സിക്‌സറും ഉള്‍പ്പെടെ ഗംഭീര ഇന്നിംഗ്‌സ്. ബ്രൂക്‌സാവട്ടെ കൂറ്റനടികള്‍ക്ക് നിന്നില്ല. പക്ഷേ ന്നായി പിന്തുണച്ചു. ഈ സഖ്യത്തെ ഷാര്‍ദുല്‍ ഠാക്കൂര്‍ പുറത്താക്കുമ്പോഴേക്കും നല്ല അടിത്തറ കിട്ടിയിരുന്നു ആതിഥേയര്‍ക്ക്. ബ്രൂക്‌സ് പുറത്തായ ശേഷമെത്തിയ ബ്രാന്‍ഡണ്‍ കിംഗും പൊരുതി നിന്നതോടെ ഇന്ത്യ വിറക്കാന്‍ തുടങ്ങി. ബൗളര്‍മാര്‍ തെറ്റുകള്‍ ആവര്‍ത്തിച്ചു. പന്തുകള്‍ അതിര്‍ത്തിയിലേക്ക് പായാന്‍ തുടങ്ങി. മേയേഴ്‌സിനെ സഞ്ജു സാംസണിന്റെ കരങ്ങളിലെത്തിച്ച് ഷാര്‍ദുല്‍ തന്നെയാണ് മല്‍സരത്തിലേക്ക് ടീമിനെ തിരികെ കൊണ്ടുവന്നത്. 189 റണ്‍സിലായിരുന്നു മേയേഴ്‌സിന്റെ മടക്കം. ഫോമിലുള്ള നായകന്‍ നിക്കോളാസ് പുരാനെ സിറാജ് രണ്ടാം വരവില്‍ മടക്കിയതോടെ ആവേശമായി. യൂസവേന്ദ്ര ചാഹല്‍ റോവ്മാന്‍ പവലിനെ (6) വേഗം മടക്കി. പക്ഷേ അപ്പോഴും വാലറ്റത്തില്‍ അഖില്‍ ഹുസൈന്‍ (32 നോട്ടൗട്ട്), റോമാരിയോ ഷെപ്പേര്‍ഡ് എന്നിവര്‍ അവസാനം വരെ പൊരുതി.

Continue Reading

News

കളി കാര്യവട്ടത്ത്; മല്‍സരം സെപ്തംബര്‍ 28ന്

ഓസ്‌ട്രേലിയയില്‍ ഒക്ടോബറില്‍ നടക്കാനിരിക്കുന്ന ടി-20 ലോകകപ്പ് മുന്‍നിര്‍ത്തി ഇന്ത്യന്‍ ക്രിക്കറ്റ് ടീം തിരുവനന്തപുരത്തേക്ക്.

Published

on

മുംബൈ: ഓസ്‌ട്രേലിയയില്‍ ഒക്ടോബറില്‍ നടക്കാനിരിക്കുന്ന ടി-20 ലോകകപ്പ് മുന്‍നിര്‍ത്തി ഇന്ത്യന്‍ ക്രിക്കറ്റ് ടീം തിരുവനന്തപുരത്തേക്ക്. ദക്ഷിണാഫ്രിക്കക്കെതിരായ ടി-20 പരമ്പരയിലെ ഒരു മല്‍സരം തിരുവനന്തപുരം കാര്യവട്ടം ഗ്രീന്‍ഫീല്‍ഡ് സ്റ്റേഡിയത്തിലായിരിക്കും.

സെപ്തംബര്‍ 28 നാണ് അങ്കം. ലോകകപ്പിന് മുമ്പ് ഓസ്‌ട്രേലിയന്‍ ടി-20 സംഘം ഇന്ത്യയിലെത്തുന്നുണ്ട്. മൊഹാലി (സെപ്തംബര്‍ 20,) നാഗ്പ്പൂര്‍ (സെപ്തംബര്‍ 23), ഹൈദരാബാദ് (സെപ്തംബര്‍ 25) എന്നിവിടങ്ങളലായിരിക്കും ഈ മല്‍സരങ്ങള്‍. ഇതിന് ശേഷമായിരിക്കും ദക്ഷിണാഫ്രിക്ക വരുന്നത്. ആദ്യ മല്‍സരം തിരുവനന്തപുരത്തും രണ്ടാംമല്‍സരം ഗോഹട്ടിയിലും (ഒക്ടോബര്‍ 01), മൂന്നാം മല്‍സരം ഇന്‍ഡോറിലുമായിരിക്കും (ഒക്ടോബര്‍ 3). ഈ പരമ്പരക്ക് ശേഷം മൂന്ന് മല്‍സര ഏകദിന പരമ്പരയിലും ദക്ഷിണാഫ്രിക്ക കളിക്കും. റാഞ്ചി (ഒക്ടോബര്‍ 6), ലക്‌നൗ (ഒക്ടോബര്‍ 9), ഡല്‍ഹി (ഒക്ടോബര്‍ 3) എന്നിവിടങ്ങളിലാണ് ഈ മല്‍സരം. കോവിഡ് കാലത്ത് കളിക്കാന്‍ കഴിയാതിരുന്ന പരമ്പരയാണ് ക്രിക്കറ്റ് ബോര്‍ഡ് ഇപ്പോള്‍ റീ ഷെഡ്യൂള്‍ ചെയ്തിരിക്കുന്നത്.

2019 ലാണ് അവസാനമായി തിരുവനന്തപുരത്ത് ഒരു രാജ്യാന്തര മല്‍സരം നടന്നത്. ഡിസംബര്‍ എട്ടിന് നടന്ന ആ മല്‍സരത്തില്‍ വിരാത് കോലിയുടെ ഇന്ത്യയെ വിന്‍ഡീസ് തറപറ്റിച്ചിരുന്നു.

Continue Reading

Trending

Copyright © 2017 Zox News Theme. Theme by MVP Themes, powered by WordPress.