Article
ഫാസിസത്തിന്റെ വീഴ്ചയും മാധ്യമ സ്വാതന്ത്ര്യത്തിന്റെ ഉയര്ച്ചയും
അറിയാനുള്ള അവകാശം അന്വേഷണാത്മക പത്രപ്രവര്ത്തകനം ബദല് മാധ്യമ സാധ്യതകള് എന്നിവ സജീവമായ കാലത്താണ് മാധ്യമ സ്വാതന്ത്ര്യത്തിന് ചരമ കുറിപ്പെഴുതാന് ഫാസിസ്റ്റ്
ഭരണകൂടം ശ്രമിക്കുന്നത്. സത്യത്തിന്റെ മുഖത്തിന് ക്ഷതമേല്പ്പിക്കുന്നതിന് ശ്രമിച്ച മദമിളകിയ രാജ്യസ്നേഹം പ്രകടിപ്പിച്ചവരുടെ കാപട്യങ്ങളെയാണ് കോടതി ഇപ്പോള് തോല്പിച്ചിരിക്കുന്നത്. ഫാസിസ്റ്റ് വിശ്വരൂപത്തിന്റെ മുഖംമൂടി പിച്ചിച്ചീന്തിയ ദുവെ വിധി വാക്കുകള്കൊണ്ട് നിര്വചിക്കാന് കഴിയാത്തവിധം പ്രബലവും അപാരവുമാണ്.
അഡ്വ. പി.വി സൈനുദ്ദീന്
രാജ്യത്തിന്റെ ഭരണസംവിധാനത്തിന്റെ നാലാം തൂണായാണ് മാധ്യമങ്ങളെ നിരീക്ഷിക്കാറുള്ളത്. ജനാധിപത്യവും മതേതരത്വവും പൗരാവകാശങ്ങളും സംരക്ഷിക്കുന്നതിന് മാധ്യമങ്ങള് വഹിച്ച പങ്ക് സംഭവബഹുലമാണ്. മോദിക്കാല ഇന്ത്യയില് മാധ്യമ സ്വാതന്ത്ര്യവും അഭിപ്രായസ്വാതന്ത്ര്യവും അപകടപ്പെടുന്ന വിധത്തില് നിയമ വിരുദ്ധ നടപടികള് ഫാസിസ്റ്റ് ഭരണകൂടത്തില്നിന്ന് ഉണ്ടാവുകയാണ്. സ്വതന്ത്രവും നിര്ഭയവുമായ പത്രപ്രവര്ത്തനത്തിന്റെ ശവസംസ്കാരം ദാഹിക്കുന്ന ഭരണകൂടം ഫാസിസത്തിന്റെ മാസ്ക് ധരിച്ച ഭയാനകമായ ചിത്രമാണ് ഇപ്പോള് ദൃശ്യമായികൊണ്ടിരിക്കുന്നത്. ജനാധിപത്യത്തില് സ്വേച്ഛാധിപത്യം ബലമായി പ്രവേശിക്കുന്ന സന്ദര്ഭത്തിലാണ് ധീരമായി കോടതി ഇടപെടേണ്ട സാഹചര്യങ്ങളേറെ ഇന്ത്യയില് ഉണ്ടായിക്കൊണ്ടിരിക്കുന്നത്.
ഹിമാചല്പ്രദേശിലെ മുതിര്ന്ന മാധ്യമ പ്രവര്ത്തകന് വിനോദ് ദുവക്കെതിരെ ഷിംലയിലെ കുമാര്സെന് പൊലീസ്സ്റ്റേഷനില് രാജ്യദ്രോഹക്കുറ്റം ചുമത്തി രജിസ്റ്റര്ചെയ്ത കേസ് സുപ്രീംകോടതി ദുര്ബലപ്പെടുത്തിയതാണ് മാധ്യമസ്വാതന്ത്ര്യം ശ്രദ്ധേയമായ ചര്ച്ചാവിഷയമായത്. തന്റെ യൂട്യൂബ് ചാനലിലെ ദൃശ്യമാധ്യമ പരിപാടിയില് കോവിഡ് കാലത്തെ ലോക്ഡൗണ് നടപടികളെയും മറ്റും വിമര്ശിച്ചതിനാണ് 2008 ലെ പത്മശ്രീ ജേതാവായ വിനോദ് ദുവെയുടെ പേരില് ബി.ജെ.പി നേതാവ് അജിത്ത് ശ്യാം നല്കിയ പരാതിയില് പൊലീസ് കേസെടുത്തത്. കോവിഡ് പരിശോധനക്ക് രാജ്യത്ത് ആവശ്യമായ പി.പി.ഇ കിറ്റുള്പ്പെടെയുള്ള സാധനങ്ങളില്ലാത്തതും കോര്പറേറ്റ് താല്പര്യങ്ങള്ക്കനുസൃതമായി വെന്റിലേറ്ററുകളും സാനിറ്റൈസറും രാജ്യത്തുനിന്ന് കയറ്റുമതിചെയ്തതും ദുവെയുടെ വിമര്ശനത്തിന് വിധേയമായിരുന്നു. ഇന്ത്യന് ശിക്ഷാനിയമത്തിലെ വകുപ്പ് 124 അ (രാജ്യദ്രോഹം) 268 (പൊതു ശല്യം ഉണ്ടാക്കല്) 501 (അപകീര്ത്തികരമായ ഉള്ളടക്കം പ്രസിദ്ധീകരണം) എന്നിവ ചേര്ത്താണ് പൊലീസ് കേസെടുത്തിരുന്നത്. യാദൃച്ഛികമെന്നോണം ദുവെയും ഭാര്യ ചിന്നയും കോവിഡ് ബാധിച്ച് ചികിത്സയിലുമാണ്.
പുല്വാമയിലെയും പത്താന്കോട്ടിലെയും ഭീകരാക്രമണങ്ങളും തുടര്ന്നുള്ള മരണങ്ങളും നരേന്ദ്രമോദി വോട്ടിനുവേണ്ടി ദുരുപയോഗം ചെയ്യുന്നുവെന്ന് ദുവെ ആരോപിച്ചിരുന്നു. ജനങ്ങളെ പരിഭ്രാന്തരാക്കുന്നതാണ് ഇത്തരം വാര്ത്തകളെന്നും പ്രധാനമന്ത്രിക്കും സര്ക്കാരിനെതിരെയുമുള്ള കലാപ ആഹ്വാനമാണെന്നുമായിരുന്നു പൊലീസ് ഭാഷ്യം. സോളിസിറ്റര് തുഷാര് മേത്തയാവട്ടെ ദുവെക്കെതിരെയുള്ള നിയമനടപടികള് തുടരണമെന്ന് കോടതിയില് ആവശ്യപ്പെടുകയുമുണ്ടായി. ഡല്ഹിയില് പൗരത്വ പ്രക്ഷോഭകരെ ലക്ഷ്യംവെച്ച് സംഘ്പരിവാര് നടത്തിയ കലാപങ്ങള്ക്കെതിരെ ദുവെ നടത്തിയ വിമര്ശനങ്ങള്ക്കെതിരായും പൊലീസ് കേസെടുത്തിരുന്നു.
ക്രമസമാധാനപ്രശ്നമുണ്ടാക്കാനുള്ള ലക്ഷ്യമോ കലാപത്തിനുള്ള ആഹ്വാനമോ ദുവെയുടെ പരാമര്ശങ്ങളില് കാണാനില്ലെന്നായിരുന്നു ജസ്റ്റിസ് യു.യു ലളിത്, വിനീത് സരണ് എന്നിവരടങ്ങുന്ന അവധിക്കാല ബെഞ്ചിന്റെ വിധി. സര്ക്കാര് നടപടികളിലെ പോരായ്മകള് ചൂണ്ടിക്കാണിച്ച് കാര്യക്ഷമമായ പരിഹാരം കാണാന് നടത്തിയ ക്രിയാത്മക പരാമര്ശങ്ങള് അനുവദനീയമായ പരിധിക്കുള്ളിലായതുകൊണ്ട് രാജ്യദ്രോഹകുറ്റമാവില്ലെന്നായിരുന്നു കോടതിയുടെ നിരീക്ഷണം. മാധ്യമ പ്രവര്ത്തകരുടെ അവകാശമുപയോഗിച്ച് ആശങ്കാജനകമായ സാഹചര്യം ചൂണ്ടികാണിക്കുന്നത് നിയമപരമായി തെറ്റില്ലെന്ന് കോടതി വിലയിരുത്തി. ആക്രമണത്തിന് പ്രേരകമാകാത്തവിധത്തിലും പൊതുക്രമസമാധാനം തകര്ക്കാത്ത വിധത്തിലും മാധ്യമപ്രവര്ത്തകര് പ്രധാനമന്ത്രിയെയും ഭരണകൂടത്തെയും നയപരമായി വിമര്ശിക്കുന്നത് രാജ്യദ്രോഹകുറ്റമല്ലെന്ന ആറു പതിറ്റാണ്ടുമുമ്പിലെ കേദാര്നാഥ് സിങ് കേസിലെ സുപ്രിംകോടതി ചീഫ് ജസ്റ്റിസായ ഭുവനേശ്വര് ഉള്കൊള്ളുന്ന ബെഞ്ചിലെ മാധ്യമ പ്രവര്ത്തകരുടെ സംരക്ഷണ കവചമായ വിധി കോടതി പ്രത്യേക പരാമര്ശവിധേയമാക്കുകയും ചെയ്തു. 10 വര്ഷമെങ്കിലും പ്രവര്ത്തന പരിചയമുള്ള മാധ്യമ പ്രവര്ത്തകര്ക്കെതിരെയുള്ള രാജ്യദ്രോഹക്കുറ്റത്തിന് ഹൈക്കോടതി ജഡ്ജി അധ്യക്ഷനായ സമിതിയുടെ അനുമതി വേണമെന്ന ദുവെയുടെ ആവശ്യം കോടതി പരിഗണിച്ചില്ല. നിയമനിര്മ്മാണ സഭകളുടെ അധികാരപരിധിയില്പെട്ടതാണ് പ്രസ്തുത വിഷയമെന്ന് കോടതി ഓര്മ്മപ്പെടുത്തി. ഹരി ഭൂമി കമ്യൂണിക്കേഷന്റെ 2019 ലെ കേസിലും പരമോന്നത നീതിപീഠം മാധ്യമ നൈതികതയുടെ അന്തസത്ത വിലയിരുത്തുകയുണ്ടായി.
ആന്ധ്രയിലെ നിയമസഭാംഗം നടത്തിയ പരാമര്ശങ്ങള് പ്രക്ഷേപണം ചെയ്ത ടി.വി 5, എ.ബി. എന് ആന്ദ്ര ജ്യോതി എന്നീ ചാനലുകള്ക്കെതിരെ രാജ്യദ്രോഹക്കുറ്റം ചുമത്തിയതും സുപ്രീം കോടതി കഴിഞ്ഞാഴ്ച സ്റ്റേ ചെയ്തിരുന്നു. രാജ്യദ്രോഹം കുറ്റകരമാണെന്ന ഇന്ത്യന് ശിക്ഷാനിയമത്തിന്റെ വ്യവസ്ഥിതിയുടെ അധികാര പരിധി മാധ്യമ സ്വാതന്ത്ര്യത്തിന്റെ പേരില് പുനര് നിശ്ചയിക്കേണ്ട സമയമായി എന്ന സുപ്രീംകോടതി ജസ്റ്റിസ് ഡി.വൈ ചന്ദ്രചൂഡിന്റെ ബെഞ്ചിന്റെ വിധി ഫാസിസ്റ്റ് നിലപാടുള്ള ഭരണകൂടത്തിന് നീതിയുടെ മഷി ഉപയോഗിച്ചുകൊണ്ടുള്ള കനത്ത താക്കീതായിരുന്നു. മരിച്ചവരുടെ മൃതശരീരങ്ങള് നദിയിലേക്ക് വലിച്ചെറിയുന്നത് പ്രദര്ശിപ്പിച്ച ചാനലുകള്ക്ക് നേരെയും രാജ്യദ്രോഹകുറ്റം ചുമത്തുമോ എന്ന കോടതിയുടെ ചോദ്യം സര്ക്കാറിനെ പരിഹാസരൂപേണ ശകാരിക്കുന്നതിന് തുല്യമായിരുന്നു. വാക്സിന് വിഷയത്തില് പൗരന്മാരുടെ അവകാശത്തിന്മേല് ഭരണകൂടം തെറ്റായ തീരുമാനമെടുത്താല് നോക്കിനില്ക്കില്ല, ഇടപെടേണ്ടിവരുമെന്ന കോടതിയുടെ മുന്നറിയിപ്പും മോദി സര്ക്കാറിനുള്ള തിരിച്ചടിയായി.
മാധ്യമ വിമര്ശനം രാജ്യദ്രോഹകുറ്റമല്ലായെന്ന സുപ്രീംകോടതി വിധി ആഹ്ലാദകരമാണെന്ന് എഡിറ്റേഴ്സ് ഗില്ഡ് ഉള്പ്പെടെയുള്ള മാധ്യമ സംഘടനകള് അഭിപ്രായപ്പെട്ടിരിക്കുകയാണ്. ലേഖനങ്ങളുടെയും ഫേസ്ബുക്ക് പോസ്റ്റിന്റെയും പേരില് മാധ്യമ പ്രവര്ത്തകരുടെ പേരില് രാജ്യത്ത് രജിസ്റ്റര് ചെയ്യപ്പെട്ട രാജ്യദ്രോഹ കേസുകള് പിന്വലിക്കണമെന്ന് ആവശ്യം ഉയര്ന്ന്വന്നിരിക്കുകയാണ്. കര്ഷക പ്രക്ഷോഭത്തെ അനുകൂലിച്ചതിന്റെ പേരില് ഇന്ത്യന് വിമന്സ് പ്രസ ്കോര് സ്ഥാപക നേതാവ് മൃണാള് പാണ്ഡെക്കെതിരെ രാജ്യദ്രോഹക്കുറ്റം ചുമത്തിയിരുന്നു. രാജ്യദ്രോഹ കുറ്റം ചാര്ത്തി ജയിലിലായ കേരള പത്രപ്രവര്ത്തക യൂണിയന് അംഗം സിദ്ദിഖ് കാപ്പന് മോചനം കാത്ത് ഇപ്പോഴും ജയിലിലാണ്. ഗൊരക്നാഥ് ക്ഷേത്ര പരിസരത്തുനിന്ന് മുസ്ലിം കുടുംബങ്ങളെ അന്യായമായി ഒഴിപ്പിക്കാന് ശ്രമിക്കുന്ന ഭരണകൂടത്തെ വിമര്ശിച്ച സ്വതന്ത്ര മാധ്യമ പ്രവര്ത്തകര്ക്ക് നേരെയും ഡെമോക്ലസിന്റെ വാള് പോലെ രാജ്യദ്രോഹക്കുറ്റം തലക്കുമുകളില് നില്ക്കുകയാണ്. രാജ്യത്തിന്റെ സര്വ നിയമങ്ങളെയും നോക്കുകുത്തിയാക്കുന്ന കേന്ദ്ര ഭരണകൂടം ഫെഡറല് നിയമ സംഹിതക്ക് പരിക്കേല്പ്പിക്കുന്ന വിധത്തിലാണ് ബംഗാള് ചീഫ് സെക്രട്ടറി ആലാപന് ബന്തോപാദ്യക്കെതിരെ ദുരന്തനിവാരണ നിയമപ്രകാരം കേസെടുക്കാനും ആലോചിച്ചിട്ടുള്ളത്.
അറിയാനുള്ള അവകാശം, അന്വേഷണാത്മക പത്രപ്രവര്ത്തനം, ബദല് മാധ്യമ സാധ്യതകള് എന്നിവ സജീവമായ കാലത്താണ് മാധ്യമ സ്വാതന്ത്ര്യത്തിന് ചരമ കുറിപ്പെഴുതാന് ഫാസിസ്റ്റ് ഭരണകൂടം ശ്രമിക്കുന്നത്. സത്യത്തിന്റെ മുഖത്തിന് ക്ഷതമേല്പ്പിക്കുന്നതിന് ശ്രമിച്ച മദമിളകിയ രാജ്യസ്നേഹം പ്രകടിപ്പിച്ചവരുടെ കാപട്യങ്ങളെയാണ് കോടതി ഇപ്പോള് തോല്പിച്ചിരിക്കുന്നത്. ഫാസിസ്റ്റ് വിശ്വരൂപത്തിന്റെ മുഖംമൂടി പിച്ചിച്ചീന്തിയ ദുവെ വിധി വാക്കുകള്കൊണ്ട് നിര്വചിക്കാന് കഴിയാത്തവിധം പ്രബലവും അപാരവുമാണ്.
‘ന്യൂസ്’ ഇല്ലാത്ത ന്യൂസ് പേപ്പറും ഉറങ്ങുന്ന കാവല്ക്കാരനും ഫാസിസ്റ്റ് അഹങ്കാരത്തിന് പരിചരണവും ശുശ്രൂഷകളും നല്കുന്ന ബിസിനസ് മാഗ്നറ്റുകളെയും ആഗ്രഹിക്കുന്ന അധികാരി വര്ഗത്തോട് പരമോന്നത നീതിപീഠത്തിന്റെ ചോദിക്കാത്ത ലളിതമായ ചോദ്യം ‘രാജ്യദ്രോഹക്കുറ്റത്തിന്റെ പോക്ക് എങ്ങോട്ട് എന്നുള്ളതാണ്’. മാധ്യമ സ്വാതന്ത്ര്യത്തിന് ദീര്ഘായുസ്സ് നല്കുന്നതും മാധ്യമ പ്രവര്ത്തനം വിപ്ലവകരമായ സാമൂഹിക ദൗത്യമാണെന്ന് ബോധ്യപ്പെടുത്തുന്നതുമാണ് ദുവെ വിധി. കലഹിക്കുന്ന കാഴ്ച്ചപാടുമായി പരിപാവനമായ മാധ്യമ സ്വാതന്ത്ര്യത്തിന്റെ ധന്യത കാത്തുസൂക്ഷിക്കാന് മാധ്യമ ലോകം നിതാന്ത ജാഗ്രത പുലര്ത്തണമെന്ന് നീതിപീഠങ്ങള് ഓര്മ്മപ്പെടുത്തുകയാണിവിടെ. നിയമ ഭീകരതയുടെ മുമ്പില് തോല്പ്പിക്കാനാവാത്ത മാധ്യമ പോരാളിയായി വിനോദ് ദുവെ മാധ്യമ ചരിത്രത്തില് എക്കാലവും സ്മരിക്കപ്പെടുന്നതാണ്.
Article
അമരത്ത് അലങ്കാരമായിരുന്നു-പ്രഫ. കെ. ആലിക്കുട്ടി മുസ്ലിയാര്
ഭൗതിക ലോകത്ത് നിന്ന് വിടപറഞ്ഞാലും ഈ നാട്ടിലെ ലക്ഷോപലക്ഷം ജനങ്ങളുടെ മനസ്സില് സ്നേഹത്തിന്റെയും വാത്സല്യത്തിന്റെയും നീതിയുടെയും പ്രതീകമായി ബഹുമാനപ്പെട്ട തങ്ങള് എന്നും ഓര്മിക്കപ്പെടും.
പ്രഫ. കെ. ആലിക്കുട്ടി മുസ്ലിയാര് (ജനറല് സെക്രട്ടറി, സമസ്ത കേരള ജംഇയ്യത്തുല് ഉലമാ)
ആത്മീയ കേരളത്തിന്റെ അനിഷേധ്യ അമരക്കാരന് പാണക്കാട് സയ്യിദ് ഹൈദരലി ശിഹാബ് തങ്ങള് നമ്മെ വിട്ടുപിരിഞ്ഞു. അറിവും ആത്മീയ ഉല്ക്കര്ഷവും കൊണ്ട് സമുദായ നേതൃനിരയില് ജ്വലിച്ചുനിന്ന നക്ഷത്രമാണ് കണ്ണടച്ചത്. ആറു പതിറ്റാണ്ടിലേറെ കാലമായി കേരളത്തിലെ ദീനീ രംഗത്തും നമ്മുടെ മഹത്തായ സ്ഥാപനങ്ങളുടെ നേതൃനിരയിലും സാമൂഹിക രാഷ്ട്രീയ രംഗത്തും എല്ലാവരും ആദരിക്കപ്പെടുന്ന, അംഗീകരിക്കപ്പെടുന്ന വ്യക്തിത്വമായും നേതൃത്വമായും ശോഭിക്കാന് അല്ലാഹു പ്രത്യേകം തൗഫീഖ് നല്കിയ സയ്യിദാണ് നമ്മളോട് വിട പറഞ്ഞിരിക്കുന്നത്. വന്ദ്യരായ തങ്ങളുടെ വേര്പാട് ഉമ്മത്തിന് തീരാനഷ്ടമാണ്. അത്രമേല് മഹത്വമേറിയ സേവനങ്ങളാണ് മഹാനായ തങ്ങള് പതിറ്റാണ്ടുകളായി കേരളത്തില് നിര്വഹിച്ചുകൊണ്ടിരിക്കുന്നത്.
വ്യക്തിപരമായി നീണ്ട പതിറ്റാണ്ടുകളുടെ ബന്ധം സയ്യിദ് ഹൈദരലി ശിഹാബ് തങ്ങളുമായി എനിക്കുണ്ട്. നിരവധി സ്ഥാപനങ്ങളിലും സംഘടനാ നേതൃത്വങ്ങളിലും തങ്ങളോട് കൂടെ സേവനം ചെയ്യാന് ഭാഗ്യം ലഭിച്ചിട്ടുണ്ട്. ജാമിഅ നൂരിയ്യ അറബിയ്യയുടെ സ്ഥാപിത കാലം മുതല്ക്കുതന്നെ പാണക്കാട് കുടുംബം ഈ സ്ഥാപനവുമായി അഭേദ്യമായ ബന്ധം പുലര്ത്തിയിരുന്നു. മഹാനായ പി.എം.എസ്.എ പൂക്കോയ തങ്ങള് ഈ സ്ഥാപനത്തിന്റെ എല്ലാമെല്ലാം ആയിരുന്നു. തുടര്ന്ന് മുഹമ്മദലി ശിഹാബ് തങ്ങളും ജാമിഅയെ അളവറ്റ് സ്നേഹിക്കുകയും പരിപാലിക്കുകയും ചെയ്യുന്നതില് നേതൃപരമായ പങ്കുവഹിച്ചിരുന്നു. ജാമിഅ സ്ഥാപിച്ച കാലഘട്ടത്തില് തന്നെയാണ് സയ്യിദ് ഉമറലി ശിഹാബ് തങ്ങള് ജാമിഅയില് ഉപരിപഠനത്തിനായി ചേര്ന്നത്.
ഉമറലി ശിഹാബ് തങ്ങള് ജാമിഅയില് നിന്ന് ബിരുദമെടുത്ത പുറത്തിറങ്ങി അധികം താമസിയാതെതന്നെ പ്രിയപ്പെട്ട ഹൈദരലി ശിഹാബ് തങ്ങളും ജാമിഅയിലെ ഒരു വിദ്യാര്ഥിയായി പ്രവേശനം നേടിയിരുന്നു. ജാമിഅയുടെ ആ സുവര്ണ കാലഘട്ടത്തില് ശൈഖുന ശംസുല് ഉലമയുടെയും കോട്ടുമല ഉസ്താദിന്റെയും മറ്റു പ്രഗല്ഭരായ നമ്മുടെ ഉലമാക്കളുടെയും ശിഷ്യത്വം സ്വീകരിക്കാന് ബഹുമാനപ്പെട്ട തങ്ങള്ക്ക് സൗഭാഗ്യം ലഭിച്ചുവെന്നുമാത്രമല്ല വിദ്യാര്ഥിയായിരിക്കെ തന്നെ മഹാന്മാരായ ഉസ്താദുമാരുടെ ആദരവ് നേടാനും തങ്ങള്ക്ക് തൗഫീഖുണ്ടായി. ശംസുല് ഉലമ (ന: മ ) പല വേദികളിലും സയ്യിദ് ഹൈദരലി ശിഹാബ് തങ്ങളെ കൊണ്ട് ദുആ ചെയ്യിപ്പിച്ചിരുന്നു. ഒരു പതിറ്റാണ്ടിലധികമായി ജാമിഅ നൂരിയ്യ അറബിയ്യയുടെ പ്രസിഡന്റ് പദവിയിലിരുന്ന് ജാമിഅക്ക് നേതൃത്വം നല്കിയ മഹാനവര്കളുടെ കരങ്ങളില് നിന്ന് നൂറുകണക്കിന് ഫൈസിമാരാണ് സനദ് സ്വീകരിച്ച് പ്രബോധന വീഥിയില് സഞ്ചരിക്കുന്നത്. അതുപോലെ സുന്നി യുവജന സംഘത്തിന്റെ പ്രസിഡന്റായി തങ്ങള് സേവനം ചെയ്തു കൊണ്ടിരിക്കെ തങ്ങളോടൊപ്പം ജനറല് സെക്രട്ടറിയായി ധാരാളം വര്ഷം സേവനം ചെയ്യാനുള്ള സൗഭാഗ്യവുമുണ്ടായി. സ്ഥാപനങ്ങളുടെയും സംഘടനയുടെയും അധ്യക്ഷ പദവികള് കേവലമായി അലങ്കരിക്കുക എന്നതായിരുന്നില്ല തങ്ങളുടെ രീതി, ഓരോ കാര്യങ്ങളിലും സൂക്ഷ്മമായി ഇടപെടുകയും യോഗങ്ങളിലും നയപരമായ തീരുമാനങ്ങളിലും കൃത്യമായി നിലപാടെടുക്കുകയും ഒരുതരത്തിലുമുള്ള വിട്ടുവീഴ്ചകള്ക്ക് തയ്യാറാകാതെ സജീവമായി കാര്യങ്ങളുമായി ബന്ധപ്പെടുകയും ചെയ്തിരുന്ന ശൈലിയാണ് തങ്ങള്ക്ക് ഉണ്ടായിരുന്നത്. അതുകൊണ്ടുതന്നെ യോഗങ്ങളിലും മറ്റും തങ്ങളുടെ തീരുമാനമാണ് അന്തിമമായി പരിഗണിക്കപ്പെടുക. അത് എല്ലാവര്ക്കും സ്വീകാര്യമായ നീതിയുക്തമായ തീരുമാനം ആയിരിക്കും.ഭൗതിക ലോകത്ത് നിന്ന് വിടപറഞ്ഞാലും ഈ നാട്ടിലെ ലക്ഷോപലക്ഷം ജനങ്ങളുടെ മനസ്സില് സ്നേഹത്തിന്റെയും വാത്സല്യത്തിന്റെയും നീതിയുടെയും പ്രതീകമായി ബഹുമാനപ്പെട്ട തങ്ങള് എന്നും ഓര്മിക്കപ്പെടും. അല്ലാഹു അവിടുത്തെ പദവി ഉയര്ത്തി കൊടുക്കട്ടെ. ജന്നാത്തുല് ഫിര്ദൗസില് ഒരുമിച്ചു കൂടാന് അല്ലാഹു തൗഫീഖ് നല്കട്ടെ… ആമീന്.
Article
ബാപ്പാന്റെ ആറ്റപ്പൂ-പാണക്കാട് സയ്യിദ് സാദിഖലി ശിഹാബ് തങ്ങള്
സുബ്ഹിക്ക് ശേഷം തന്നെ ആളുകളുമായുള്ള ഇടപഴകലിലൂടെയാണ് അദ്ദേഹത്തിന്റെ ദിവസം തുടങ്ങുന്നത്. പാതിരാവോളം ജനങ്ങളോടൊപ്പം നിന്ന രീതിയാണ് അദ്ദേഹത്തിന് ഉണ്ടായിരുന്നത്. മരണം വരെ അത് തുടരുകയും ചെയ്തു.
സയ്യിദ് മുഹമ്മദലി ശിഹാബ് തങ്ങളുടെ മരണത്തില് പകച്ചുനിന്നപ്പോള് ആശ്വാസമായിരുന്നത് ഹൈദരലി ശിഹാബ് തങ്ങളായിരുന്നു. ഇപ്പോള് ആ അത്താണിയും നഷ്ടപ്പെട്ടിരിക്കുകയാണ്. സയ്യിദ് ഹൈദരലി ശിഹാബ് തങ്ങളെക്കുറിച്ച് ചെറുപ്പം തൊട്ടുള്ള ഓര്മ്മകളാണുള്ളത്.
1975 ലാണ് ബാപ്പ പി.എം.എസ്.എ പൂക്കോയ തങ്ങള് മരിക്കുന്നത്. അതിന് ഒരു വര്ഷം മുമ്പാണ് അദ്ദേഹത്തിന് സുഖമില്ലാതാവുന്നതും ചികിത്സയില് പ്രവേശിക്കുന്നതും. ഹൈദരലി ശിഹാബ് തങ്ങള് അപ്പോള് പഠനം പൂര്ത്തിയാക്കി വന്ന സമയമാണ്. ആ സമയത്ത് പിതാവിനെ ശുശ്രൂഷിക്കുന്നതില് ഹൈദരലി തങ്ങളായിരുന്നു ശ്രദ്ധ പുലര്ത്തിയിരുന്നത്. ശിഹാബ് തങ്ങളും ഉമറലി ശിഹാബ് തങ്ങളുമൊക്കെ മറ്റ് തിരക്കുകളിലായിരുന്ന സമയത്ത് പിതാവിന്റെ കാര്യങ്ങളെല്ലാം ശ്രദ്ധിച്ചിരുന്നത് ഹൈദരലി തങ്ങളായിരുന്നു.
കൃത്യസമയത്ത് മരുന്നുകളൊക്കെ എടുത്തുകൊടുക്കുന്നതിലും ഭക്ഷണം കൊടുക്കുന്ന കാര്യങ്ങളുമെല്ലാം ശ്രദ്ധിച്ചിരുന്നത് ഹൈദരലി തങ്ങളായിരുന്നു. ബാപ്പയെ ബോംബെയിലേക്ക് ചികിത്സക്ക് കൊണ്ടുപോയ സന്ദര്ഭത്തില് അന്ന് ഹൈദരലി തങ്ങളും ചാക്കീരി അഹമ്മദ് കുട്ടിയും ബാപ്പയുടെ സന്തത സഹചാരി പാണക്കാട് അഹമ്മദാജിയും മറ്റുമായിരുന്നു കൂടെ പോയിരുന്നത്. അന്ന്, ബാപ്പാന്റെ ആഗ്രഹപ്രകാരമാണ് ഹൈദരലി തങ്ങള് കൂടെ പോയിരുന്നത്. ടാറ്റ ആശുപത്രിയിലെ ചികിത്സക്ക് ശേഷം തിരിച്ച് വീട്ടില് വിശ്രമിക്കുമ്പോഴും പുറത്തൊന്നും പോകാതെ ഹൈദരലി തങ്ങള് ബാപ്പാന്റെ കൂടെത്തന്നെ ഉണ്ടായിരുന്നു. ബാപ്പാക്കും ഹൈദരലി തങ്ങളെ വലിയ ഇഷ്ടമായിരുന്നു. ഞാനും അനിയന് അബ്ബാസലിയും ജനിക്കുന്നതിനുമുമ്പ് വലിയ ഇടവേളയുണ്ടായിരുന്നു. അപ്പോള് ഹൈദരലി തങ്ങളായിരുന്നു ഇളയ മകന്. ആ നിലക്കും ബാപ്പാക്ക് വലിയ സ്നേഹമായിരുന്നു. ആറ്റപ്പൂ എന്നാണ് ബാപ്പ ഹൈദരലി തങ്ങളെ വിളിച്ചിരുന്നത്. ഹൈദരലി തങ്ങള്ക്ക് അങ്ങോട്ടും ബാപ്പാനെ വലിയ ഇഷ്ടവും ബഹുമാനവുമൊക്കെയായിരുന്നു.
ഹൈദരലി തങ്ങളുടെ സ്കൂള് വിദ്യാഭ്യാസത്തിന്റെ കാര്യത്തിലും മദ്രസ പഠനത്തിന്റെ കാര്യത്തിലും ബാപ്പാക്ക് പ്രത്യേക ശ്രദ്ധയായിരുന്നുവെന്ന് പിന്നീട് പറഞ്ഞുകേട്ടിട്ടുണ്ട്. പൊന്നാനി മഊനത്തുല് ഇസ്്ലാം അറബി കോളജിലാണ് ആദ്യകാലത്തെ വിദ്യാഭ്യാസം. സ്കൂള് വിദ്യാഭ്യാസം കോഴിക്കോട് എം.എം ഹൈസ്കൂളിലായിരുന്നു. ഉമറലി തങ്ങളും ശിഹാബ് തങ്ങളുമൊക്കെ എം.എം ഹൈസ്കൂളില് തന്നെയായിരുന്നു പഠിച്ചിരുന്നത്. ബാപ്പാന്റെ സഹോദരിയെ വിവാഹം ചെയ്തയച്ചിരുന്നത് കോഴിക്കോട്ടേക്കായിരുന്നു. കോഴിക്കോട് ഇടിയങ്ങരയിലെ ശൈഖ് പള്ളിയുടെ അടുത്തായിരുന്നു അമ്മായി താമസിച്ചിരുന്നത്. ഹൈദരലി തങ്ങളും ശിഹാബ് തങ്ങളും ഉമറലി തങ്ങളുമെല്ലാം അവിടെ താമസിച്ചാണ് പഠിച്ചത്. നാട്ടില് നല്ല സ്കൂള് വിദ്യാഭ്യാസം ഇല്ലാത്ത കാലമായിരുന്നു. മക്കള്ക്ക് നല്ല വിദ്യാഭ്യാസം ലഭിക്കണമെന്ന ഉദ്ദേശത്തിലായിരുന്നു ബാപ്പ ഇവരെ കോഴിക്കോട്ടേക്കയച്ചത്. കോഴിക്കോടുമായി ഹൃദയ ബന്ധമാണുള്ളത്. ധാരാളം കുടുംബ ബന്ധമുണ്ട് കോഴിക്കോട്ട്. മുന് ഖാസി സയ്യിദ് ശിഹാബുദ്ദീന് ഇമ്പിച്ചിക്കോയ തങ്ങള് അടുത്ത ബന്ധുവാണ്. സ്കൂള് വിദ്യാഭ്യാസത്തിനുശേഷം ഹൈദരലി തങ്ങള് പൊന്നാനിയിലെത്തി മഊനത്തില്നിന്ന് ബിരുദമെടുത്തു. പീന്നീട് പട്ടിക്കാട് ജാമിഅ നൂരിയ അറബി കോളജില് നിന്ന് ഫൈസി ബിരുദവും കരസ്ഥമാക്കി. പിതാവിന്റെ മരണശേഷം ശിഹാബ് തങ്ങള് രംഗത്തേക്ക് വന്നു. മലപ്പുറം ജില്ലാ നേതൃ പദവി ഏറ്റെടുത്തുകൊണ്ടാണ് ഹൈദരലി തങ്ങള് രാഷ്ട്രീയത്തിലേക്ക് കടന്നുവരുന്നത്. അതിനു മുമ്പു തന്നെ യോഗങ്ങളിലും മറ്റും സംബന്ധിക്കാറുണ്ടായിരുന്നു. സമസ്തയുടെ യോഗങ്ങളിലും സജീവമായിരുന്നു.
സംസ്ഥാന പ്രസിഡന്റ് എന്ന നിലയില് എസ്.എസ്.എഫിനെ കെട്ടിപ്പടുക്കുന്നതില് ഹൈദരലി തങ്ങള് സജീവ പങ്ക് വഹിച്ചിട്ടുണ്ട്. എസ്.കെ.എസ്.എസ്.എഫിന് മുമ്പുണ്ടായിരുന്ന സമസ്തയുടെ കീഴ് ഘടകമായിരുന്നു എസ്.എസ്.എഫ്. ഹൈദരലി ശിഹാബ് തങ്ങളായിരുന്നു അതിന്റെ പ്രഥമ പ്രസിഡന്റ്. ആ കാലത്ത് സുന്നി വിദ്യാര്ത്ഥി പ്രസ്ഥാനത്തെ കെട്ടിപ്പടുക്കുന്നതില് ഹൈദരലി തങ്ങള് വലിയ പങ്ക് വഹിച്ചിട്ടുണ്ട്. പട്ടിക്കാട് ജാമിഅ നൂരിയ കേന്ദ്രമായായിരുന്നു അന്നത്തെ പ്രവര്ത്തനങ്ങള്. രാഷ്ട്രീയത്തിലേക്ക് വരുന്നതിനുമുമ്പ് എസ്.കെ.എസ്.എസ്.എഫില് പ്രവര്ത്തിച്ച പരിചയമുണ്ട്. സംഘാടനം, സംഘടനാ പ്രവര്ത്തനം
എന്നിവയിലൊക്കെ നല്ല പരിചയ സമ്പത്ത് നേടിയെടുക്കാന് ഇതിലൂടെ സാധിച്ചു. സമസ്തയിലുണ്ടായ പിളര്പ്പിനെ തുടര്ന്ന് എസ്.എസ്.എഫില് നിന്ന് രാജിവെക്കുകയാണുണ്ടായത്. പിന്നീടാണ് എസ്.കെ.എസ്.എസ്.എഫ് രൂപീകരിക്കപ്പെടുന്നത്. ശിഹാബ് തങ്ങള് സംസ്ഥാന പ്രസിഡന്റായപ്പോള് മലപ്പുറം ജില്ലാ മുസ്്ലിം ലീഗിന്റെ അമരത്തേക്ക് ഹൈദരലി തങ്ങളെയാണ് തിരഞ്ഞെടുക്കപ്പെട്ടത്. രണ്ട് പതിറ്റാണ്ടിലേറെ ജില്ലാ മുസ്്ലിം ലീഗിന്റെ നേതൃത്വം അലങ്കരിക്കാന് അദ്ദേഹത്തിനായിട്ടുണ്ട്. ശിഹാബ് തങ്ങളുടെ മരണം വരെ പദവിയില് തുടര്ന്നു. മലപ്പുറം ജില്ലാ മുസ്്ലിംലീഗ് പ്രസിഡന്റ് എന്ന നിലയില് നല്ല പ്രവര്ത്തനം കാഴ്ചവെക്കാന് അദ്ദേഹത്തിനായിട്ടുണ്ട്. കെ.പി.എ മജീദായിരുന്നു അന്ന് ജനറല് സെക്രട്ടറി. മലപ്പുറം ജില്ലാ മുസ്്ലിം ലീഗ് ഓഫീസ് കെട്ടിടം നവീകരിച്ചായിരുന്നു തുടക്കം കുറിച്ചത്.
ശിഹാബ് തങ്ങളുടെ മരണത്തെതുടര്ന്ന് സംസ്ഥാന മുസ്്ലിംലീഗിന്റെ നേതൃപദവി അദ്ദേഹമെറ്റെടുത്തു. അതോടൊപ്പം നിരവധി മഹല്ലുകളുടെ തലപ്പത്തിരിക്കാനും അദ്ദേഹത്തിന് സാധിച്ചു. പിതാവിന്റെ കാലം മുതല് തുടര്ന്നുപോരുന്ന ഖാളി സ്ഥാനമാണ് ശിഹാബ് തങ്ങളുടെ മരണ ശേഷം ഹൈദരലി തങ്ങള് ഏറ്റെടുത്തത്. ആയിരക്കണക്കിന് മഹല്ലുകളുടെ ഖാളി സ്ഥാനം ഇപ്പോള് അലങ്കരിക്കുന്നുണ്ട്.
ആത്മീയവും രാഷ്ട്രീയവുമായുള്ള നേതൃത്വമാണ് പാണക്കാട് കുടുംബത്തില്നിന്ന് ജനങ്ങള് പ്രതീക്ഷിക്കുന്നത്. ശിഹാബ് തങ്ങളില്നിന്ന് ഹൈദരലി തങ്ങളില് എത്തിയപ്പോള് അതിന് മാറ്റമൊന്നും ഉണ്ടായില്ല. ആത്മീയ നേതാവും രാഷ്ട്രീയ നേതാവും എന്ന നിലയില് തന്നെയാണ് ഹൈദരലി തങ്ങളും അറിയപ്പെട്ടത്. ജനങ്ങളും ആ നിലക്കുതന്നെയാണ് അദ്ദേഹത്തെ കണ്ടിരുന്നത്. മുസ്്ലിംലീഗ് പ്രസിഡന്റ് എന്ന നിലയില് പ്രവര്ത്തിക്കുമ്പോള് തന്നെയും സമസ്തയിലും സജീവമായിരുന്നു. സമസ്ത കേരള ജംഇയ്യത്തുല് ഉലമ വൈസ് പ്രസിഡന്റും സമസ്ത മുശാവറ അംഗവുമായിരുന്നു. മുസ്്ലിംലീഗിനെയും സമസ്തയേയും യോജിച്ചുകൊണ്ടുപോകുന്നതില് നിര്ണായക പങ്കാണ് വഹിച്ചത്. സമസ്തയുടെ ബഹുമുഖ പണ്ഡിതന്മാരായ ഇ.കെ അബൂബക്കര് മുസ്്ല്യാരെ പോലുള്ളവര് അദ്ദേഹത്തിന്റെ ഗുരുവര്യന്മാരായിരുന്നു. കുമരംപുത്തുരിലെ മുഹമ്മദ് മുസ്ലിയാരായിരുന്നു പൊന്നാനിലെ പഠന കാലത്തെ പ്രധാന ഗുരുനാഥന്. സമസ്തയുടെ വലിയ സ്ഥാപനമായ പട്ടിക്കാട് ജാമിഅ നൂരിയ പ്രസിഡന്റ് പദവിയും ഹൈദരലി തങ്ങളിലേക്ക് എത്തുകയായിരുന്നു. സമസ്തയുടെ കീഴിലുള്ള അനവധി സ്ഥാപനങ്ങളുടെ പ്രസിഡന്റാണ്.
വിദ്യാഭ്യാസം, സാമൂഹികം, സംസ്കാരികം തുടങ്ങി എല്ലാ മേഖലകളിലും തന്റേതായ വ്യക്തിത്വം ഉയര്ത്തിപ്പിടിച്ച് ജീവിച്ച അദ്ദേഹത്തിന്റെ നിറഞ്ഞ ജീവിതത്തെ കാണാനാവുന്നത്. സുബ്ഹിക്ക് ശേഷം തന്നെ ആളുകളുമായുള്ള ഇടപഴകലിലൂടെയാണ് അദ്ദേഹത്തിന്റെ ദിവസം തുടങ്ങുന്നത്. പാതിരാവോളം ജനങ്ങളോടൊപ്പം നിന്ന രീതിയാണ് അദ്ദേഹത്തിന് ഉണ്ടായിരുന്നത്. മരണം വരെ അത് തുടരുകയും ചെയ്തു. കഴിഞ്ഞ റമസാന് മാസത്തിന് ശേഷമാണ് രോഗാതുരനായി മാറിയത്. ഇടക്കിടെ വരുന്ന പനിയായിരുന്നു തുടക്കത്തിലെ അനുഭവപ്പെട്ടത്. ജീവന് തരുന്നവന് മരണത്തെയും തരുന്നുണ്ടല്ലൊ. ഹൈദരലി തങ്ങളും ആ വിധിക്ക് കീഴടങ്ങിയിരിക്കുകയാണ്. അല്ലാഹു മഗ്ഫിറത്തും മര്ഹമത്തും നല്കട്ടെ.
Article
പ്രവാചകനും പ്രബോധന വിജയത്തിന്റെ രഹസ്യവും
വിശ്വാസം, സ്വഭാവം, സമീപനങ്ങള്, കടമകള്, കടപ്പാടുകള്, ബന്ധങ്ങള്, ബാധ്യതകള് തുടങ്ങി ഇസ്ലാം ഉദ്ഘോഷിക്കുന്ന എല്ലാ കാര്യങ്ങളുടെയും അടിത്തറ സ്നേഹമാണ്. സ്നേഹത്തിന്റെ രൂപത്തിലാണ് ഇസ്ലാം മനസ്സുകളിലേക്കും ബന്ധങ്ങളിലേക്കും വീടുകളിലേക്കും
കുടുംബങ്ങളിലേക്കും അയല്പക്കങ്ങളിലേക്കും അന്യ മതസ്ഥരിലേക്കും ജന്തുജാലങ്ങളിലേക്കും പ്രകൃതിയിലേക്കു പോലും ഇറങ്ങിയത്. ആശയങ്ങള് മനുഷ്യമനസ്സുകളില് പകര്ന്ന്കൊടുത്ത് അതിനെ ജീവിതത്തിന്റെ അടിസ്ഥാന വിചാരമാക്കി പരിവര്ത്തിപ്പിച്ചെടുത്തതോടെയാണ് കൂട്ടംകൂട്ടമായി ഒഴുകിയെത്തി നിറയുന്ന ഒരു സംഹിതയായി ഇസ്ലാം മാറിയത്.
ടി.എച്ച് ദാരിമി
മത സംഹിത എന്ന നിലക്ക് ലോകത്തെ അല്ഭുതപ്പെടുത്തുന്ന വളര്ച്ചയാണ് ഇസ്ലാം അടയാളപ്പെടുത്തിയിട്ടുള്ളത് എന്നത് ഒരു വാദമല്ല, വസ്തുതയാണ്. ഇക്കാര്യത്തില് മറ്റു മതങ്ങളൊന്നും ഇസ്ലാമോളം വിജയിച്ചതായി കാണുന്നില്ല. നബി തിരുമേനി വരുന്നതിനു പത്തു നൂറ്റാണ്ട്മുമ്പ് ബി.സി ആറാം നൂറ്റാണ്ടില് വന്ന രണ്ട് മതസംഹിതകളെ നാം ഭാരതീയര്ക്കറിയാം. ബുദ്ധ മതവും ജൈനമതവും. ഇനി പ്രത്യയശാസ്ത്രങ്ങള്ക്കാവട്ടെ കൊമ്പു കുലുക്കിയും മോഹന സ്വപ്നങ്ങള് വാരിയെറിഞ്ഞും കഴിഞ്ഞ നൂറ്റാണ്ടില് വന്ന കമ്യൂണിസം ഉദാഹരണമായി ഉണ്ട്. ഇതൊക്കെ അതിന്റെ ആചാര്യന്മാര് നന്നായി പ്രബോധനം ചെയ്തെങ്കിലും ഇസ്ലാമിനോളം വളര്ച്ച ഇതുവരെ അടയാളപ്പെടുത്തിയിട്ടില്ല. ഞെട്ടിക്കുന്ന വളര്ച്ചയാണ് ഇസ്ലാമിന്റേത്. ഇപ്പോള് ലോക ജനസംഖ്യയുടെ 24.1 ശതമാനം പേര് മുസ്ലിംകളാണ്. അഥവാ നാലു പേരെയെടുത്താല് അതിലൊന്ന് മുസ്ലിമാണ്. ഇത്രയും വലിയ വളര്ച്ചയുടെ തുടക്കമറിയാന് അംറ് ബിന് അബസ(റ) എന്ന സ്വഹാബി തുടക്കത്തില് നബിയോട് ചോദിക്കുന്ന ഒരു ചോദ്യം ഓര്ത്താല് മതി. ഈ മതത്തില് താങ്കളോടൊപ്പം ആരൊക്കെയുണ്ട് എന്ന ചോദ്യത്തിന് നബി(സ) പറഞ്ഞു. ഒരു സ്വതന്ത്രനും ഒരു അടിമയുംമാത്രം എന്ന്. അവിടെ നിന്നാണ് ഈ വളര്ച്ചയുടെ ഗ്രാഫ് തുടങ്ങുന്നത്.
ഏറ്റവും അവസാനത്തെ സ്ഥിതിവിവരക്കണക്കുകള് അനുസരിച്ച് ഐക്യരാഷ്ട്ര സഭ അംഗീകരിച്ച 193 രാജ്യങ്ങളില് 51 എണ്ണം മുസ്ലിംകളാണ് ഭരിക്കുന്നത്. അഫ്ഗാനിസ്ഥാന് മുതല് യമന് വരെ അവരുടെ മണ്ണ് നീണ്ടുകിടക്കുന്നു. ബാക്കിയുള്ളതില് പത്തോളം രാജ്യങ്ങളില് മുസ്ലിംകള് 50 ശതമാനത്തിലധികം വരും. അറേബ്യക്ക് ചുറ്റും ഏതാനും രാജ്യങ്ങളാണ് അവരുടെ മണ്ണെന്ന് കരുതിയവര്ക്ക് തെറ്റി. ഏഷ്യയുടെ 31 ശതമാനം, മധ്യേഷ്യയുടെ 89 ശതമാനം എന്നിങ്ങനെ ഏഷ്യ കടന്ന് ഉത്തരാഫ്രിക്ക വരെ അവരുടെ 91 ശതമാനം അധിവസിക്കുന്നു. യൂറോപ്പിലാകട്ടെ ആറ് ശതമാനമാണ് അവരുടെ സാന്നിധ്യം. അമേരിക്കന് ഐക്യനാടുകളില് പോലും അവര് ദശാംശം കടന്ന് ഒന്നിനു മുകളിലെത്തിയിരിക്കുന്നു.
ലബനാനിലേതിനേക്കാളും മുസ്ലിംകള് ഇപ്പോള് ജര്മ്മനിയിലുണ്ടെന്നാണ്. അപ്രകാരം തന്നെ സിറിയയിലുള്ളതിനേക്കാള് അധികം കമ്യൂണിസ്റ്റ് ചൈനയിലും. ഏറ്റവും അധികം മുസ്ലിംകള് ഉള്ളത് ഇന്തോനേഷ്യയിലാണെങ്കില് തൊട്ടുപിന്നില് ഇന്ത്യയാണ്. ആരെയും ഞെട്ടിക്കുന്ന ഈ കണക്കുകള്ക്കൊപ്പം ചില പ്രവചനങ്ങള് കൂടിയുണ്ട്. അവ ഈ വളര്ച്ച സ്ഥിരപ്രതിഭാസമായി നില്ക്കുകയും വളരുകയും ചെയ്യുന്നു എന്നാണ്. ഉദാഹരണമായി വാഷിംഗ്ടണിലെ പ്യൂ റിസര്ച്ച് ഇന്സ്റ്റിറ്യൂട്ടിലെ മിഖായില് ലിപ്കയുടെയും കോണ്ട്രാഡ് ഹാക്കെറ്റിന്റെയും സൂക്ഷ്മമായ പഠനം എടുക്കാം. 2017 ലായിരുന്നു ഇവരുടെ പഠനം. 2050 ല് ഇസ്ലാം ജനസംഖ്യയുടെ കാര്യത്തില് ഇപ്പോള് 31.5 ശതമാനം വരുന്ന ക്രിസ്ത്യാനിറ്റിക്ക് ഒപ്പമെത്തും എന്നവര് തെളിയിക്കുന്നു. മാത്രമല്ല, 2070 ല് മുസ്ലിംകള് ക്രിസ്ത്യാനികളെ മറികടക്കും എന്നും ലോകത്തെ ഏറ്റവും വലിയ മതമായി തീരുമെന്നും അവര് പറയുന്നു. വെറുതെ പറയുകയല്ല. തെളിവുകള് ഉണ്ട്. ഇനി ഈ വളര്ച്ച തന്നെ കേവല കാനേഷുമാരിയിലേതല്ല. സാമ്പത്തിക രംഗത്ത് അവരുടെ ജി.ഡി.പി 5.7 ട്രില്യണ് (2016) ആണ്. മാത്രമല്ല എണ്ണ സമ്പന്ന രാജ്യങ്ങളാണ് അവരുടേത്. എണ്ണ കയറ്റുമതി ചെയ്യുന്ന രാജ്യങ്ങളുടെ കൂട്ടായ്മയായ ഒപെകിലെ 13 രാജ്യങ്ങളില് 8 രാജ്യങ്ങള് അവരുടെ അധികാരത്തിലാണ്.
ഇത്രയും വലിയ വളര്ച്ചയിലേക്ക് അവര് നീങ്ങിയത് നിരന്തര വൈതരണികള് പിന്നിട്ടാണ്. നാടുവിട്ട് മറ്റൊരിടത്ത് കൂടുകൂട്ടിയാലും അതിനനുവദിക്കില്ല എന്ന് ആക്രോശിച്ച ബദര് മുതല് മുസ്ലിമാണെങ്കില് അതിര്ത്തി കടന്നെത്തിയവരെ പൊറുപ്പിക്കില്ല എന്നു പറയുന്ന മോദിസം വരെ. കുരിശു യുദ്ധങ്ങള് മുതല് ഒന്നാം ലോക യുദ്ധം വരെ. താടിയുള്ളവന് വിമാനത്തില് വരെ കുത്തു കണ്ണ് കാണേണ്ടിവരുന്നു. അവര് അപരിഷ്കൃതരാണ് എന്നതു മുതല് കള്ള് വിളമ്പി മതത്തില് ചേര്ക്കുന്നവരാണ് എന്നതുവരെ ആക്ഷേപങ്ങള് കേള്ക്കേണ്ടിവരുന്നു. ഇതിനെല്ലാം ഇടയില് അവര് നിരവധി സാമ്രാജ്യങ്ങള് തന്നെ സ്ഥാപിച്ചു. റാഷിദീ, അമവീ, അബ്ബാസീ, ഫാത്വിമീ, സല്ജൂഖി, ഉസ്മാനീ ഖിലാഫത്തുകള്. കേവല ജനസംഖ്യാരാഷ്ട്രീയ വളര്ച്ചകള് മാത്രമല്ല വൈജ്ഞാനിക വളര്ച്ചകളും അവര് നേടി. അല്ജിബ്രയും ക്യാമറയും ഗ്ലോബുമെല്ലാം ഉണ്ടാക്കിക്കൊടുത്തവരും അല് ജാബിറിനെയും അവിസന്നയെയും റാസിയെയും ഗസ്സാലിയെയുമെല്ലാം അവര് ലോകത്തിനു സമ്മാനിക്കുകയും ചെയ്തു.
ഇതൊക്കെയുണ്ടായിട്ടെന്താ എന്ന ചോദ്യമുണ്ട് എന്ന് സമ്മതിക്കുന്നു. അതു വേറെ ചര്ച്ചയാണ്. ഇവിടെ ഇവ്വിധം ഒരു പ്രബോധനം വിജയിച്ചതിനുപിന്നിലെ രഹസ്യമാണ് ചികയുന്നത്. അത് കേവല പ്രബോധനമായിരിക്കാന് വഴിയില്ല. ആണെങ്കില് മറ്റു മതങ്ങളും പ്രത്യയശാസ്ത്രങ്ങളും എന്തുകൊണ്ട് ഇത്ര വിജയിച്ചില്ല എന്ന ചോദ്യം ഉയരും. അത് പ്രബോധനത്തിന്റെ വേറിട്ട രസതന്ത്രം തന്നെയാണ്. അതാണ് നാം പഠിക്കേണ്ടത്. അത് പഠിക്കുമ്പോള് മുഹമ്മദ് നബി (സ) എങ്ങനെ ലോകത്തിന്റെ ജേതാവായി എന്നു കണ്ടെത്താം. അത് ചുരുക്കത്തില് ഇപ്രകാരമാണ്. ഒന്നാമതായി നബി(സ) പരമമായ സത്യത്തെ സ്വാംശീകരിച്ചു എന്നതാണ്. സത്യം നബി (സ)യുടെ ജീവിതത്തിന്റെ ഉണ്മ തന്നെയായിരുന്നു. സത്യസന്ധത ഓരോരുത്തരുടെയും വെറും അര്ഥമില്ലാത്ത അവകാശവാദങ്ങളായി മാറിയിരുന്ന ഒരു കാലത്ത് ഈ പ്രവാചകന്റെ സത്യത്തോടുള്ള അഭിവാജ്ഞ ആദ്യം അംഗീകരിച്ചത് ശത്രുക്കളായ ഇരുട്ടിന്റെ ശക്തികള് തന്നെയായിരുന്നു. അതുകൊണ്ടായിരുന്നുവല്ലോ അവര് ആ വ്യക്തിത്വത്തെ അല്അമീന് എന്നു വിളിച്ചത്. പില്ക്കാലത്ത് റോമിലെ ഹിരാക്ലിയസ് ചക്രവര്ത്തി ഈ പ്രവാചകനെ നിരൂപണം ചെയ്യാന് അബൂസുഫ്യാനിലൂടെ ചോദ്യങ്ങളില് തൂങ്ങിപ്പിടിച്ച് ആഴ്ന്നിറങ്ങാന് ശ്രമിക്കുമ്പോള് അദ്ദേഹം ചോദിക്കുന്നുണ്ട്. നിങ്ങള് അദ്ദേഹം കളവു പറയും എന്ന് സന്ദേഹിക്കുന്നുണ്ടോ?. അതിന് അപ്പോള് ശത്രുവായിരുന്ന അബൂസുഫ്യാന് ഒന്നാലോചിക്കുക പോലും ചെയ്യാതെ ഇല്ല എന്ന് മറുപടി നല്കുന്നുണ്ട്. അടുത്ത ചോദ്യം അദ്ദേഹം ചതിക്കുമോ എന്നായിരുന്നു. അതിനും ഇല്ല എന്നായിരുന്നു അബൂസുഫ്യാന്റെ മറുപടി. അപ്പോള് ശത്രു പക്ഷത്തായിരുന്ന ഒരാള് ഇങ്ങനെ സാക്ഷ്യപ്പെടുത്തുമ്പോള് പിന്നെ നബി സത്യത്തെ അവര് ചേര്ത്തുപിടിച്ചതിന് മറ്റു തെളിവുകള് തെരയേണ്ടിവരില്ല.
തന്റെ ജീവിതംകൊണ്ട് സ്വാംശീകരിച്ചെടുത്ത ഇതേ സത്യത്തെ മറ്റുള്ളവര്ക്ക് സ്നേഹത്തോടെ കൈമാറുകയായിരുന്നു രണ്ടാമത്തെ ചുവട്. സ്നേഹം ഒരു വികാരമാണ്. രണ്ടെണ്ണത്തിനിടയിലേ അതു രൂപപ്പെടൂ. ഏകപക്ഷീയമായ സ്നേഹം വെറുമൊരു ബലപ്രയോഗമായിരിക്കും. അതിനാല് കൊടുക്കുന്നവനും വാങ്ങുന്നവനും സ്വാശീകരിക്കുന്നവനും കൈമാറുന്നവനുമെല്ലാം ഈ മധുരം ഉണ്ടായിരിക്കണം. എവിടെയെങ്കിലും ഒരിടത്ത് അതു മുറിഞ്ഞുപോയാല് അവിടന്നങ്ങോട്ട് മധുരമാണെങ്കിലും സ്നേഹം കയ്പ്പായിരിക്കും. ഈ അര്ഥങ്ങളെല്ലാം സമ്മേളിച്ച സ്നേഹമാണ് നബി(സ) സ്വീകരിച്ചതും അവലംബിച്ചതും പഠിപ്പിച്ചതുമെല്ലാം. അതിനാല് നബി തിരുമേനി(സ) പ്രപഞ്ചത്തിലുള്ള തന്റെ ദൗത്യം നിര്വഹിക്കാന് ഉപയോഗപ്പെടുത്തിയ ഒറ്റമൂലി ഈ സ്നേഹമായിരുന്നു എന്ന് ഒറ്റവാക്കില് പറയാം. സ്നേഹത്തിന്റെ സ്പര്ശമില്ലാത്ത ഒന്നും ആ ജീവിതത്തിലുണ്ടായിരുന്നില്ല. സ്നേഹം എന്ന വ്യാഖ്യാനത്തിന്റെ പരിധിയില് വരാത്ത ഒന്നും ഉണ്ടായിരുന്നേയില്ല.
വിശ്വാസം, സ്വഭാവം, സമീപനങ്ങള്, കടമകള്, കടപ്പാടുകള്, ബന്ധങ്ങള്, ബാധ്യതകള് തുടങ്ങി ഇസ്ലാം ഉദ്ഘോഷിക്കുന്ന എല്ലാ കാര്യങ്ങളുടെയും അടിത്തറ സ്നേഹമാണ്. സ്നേഹത്തിന്റെ രൂപത്തിലാണ് ഇസ്ലാം മനസ്സുകളിലേക്കും ബന്ധങ്ങളിലേക്കും വീടുകളിലേക്കും കുടുംബങ്ങളിലേക്കും അയല്പക്കങ്ങളിലേക്കും അന്യ മതസ്ഥരിലേക്കും ജന്തുജാലങ്ങളിലേക്കും പ്രകൃതിയിലേക്കുപോലും ഇറങ്ങിയത്. സത്യം, സ്നേഹം എന്നീ മഹദ് ഗുണങ്ങളെയെല്ലാം ഒരു സദ് വിചാരമായി പരിവര്ത്തിപ്പിച്ചെടുത്ത് അത് മൊത്തം മാനുഷ്യകത്തിന്റെ സ്വഭാവമാക്കി പരിവര്ത്തിപ്പിച്ചെടുത്തിടത്ത് നബി(സ) യുടെ ദൗത്യം മൂന്നാം ഘടത്തിലെത്തി വിജയം അയാളപ്പെടുത്തുന്നു. ഇതാണ് ആ പ്രബോധന രഹസ്യത്തിന്റെ മൂന്നാം രഹസ്യം. അറിവ്, ഓര്മ്മ തുടങ്ങിയവ സദാ പിന്തുടരുന്ന ഒരു തിരിച്ചറിവായി മാറുമ്പോള് അത് വിചാരമായി മാറുന്നു. ഇസ്ലാം ഈ വിചാരങ്ങളുടെ സമാഹാരമാണ്. ആശയങ്ങള് മനുഷ്യമനസ്സുകളില് പകര്ന്ന്കൊടുത്ത് അതിനെ ജീവിതത്തിന്റെ അടിസ്ഥാന വിചാരമാക്കി പരിവര്ത്തിപ്പിച്ചെടുത്തതോടെയാണ് കൂട്ടം കൂട്ടമായി ഒഴുകിയെത്തി നിറയുന്ന ഒരു സംഹിതയായി ഇസ്ലാം മാറിയത്.
-
Video Stories8 years ago
കൊടിഞ്ഞിയില് കൊല്ലപ്പെട്ട ഫൈസലിന്റ കഫീല് അബ്ദുല്ല അല്മുഹാവിസിന്റെ വാക്കുകള് വൈറലാവുന്നു
-
Culture8 years ago
അനസ്തേഷ്യയില്ലാത്ത ശസ്ത്രക്രിയയില് ഖുര്ആന് ഉരുവിട്ട് കുഞ്ഞ്; വാര്ത്ത വായിക്കുമ്പോള് വിതുമ്പിക്കരഞ്ഞ് അവതാരകന്
-
More8 years ago
ഭോപ്പാല് വിവാദ ഏറ്റുമുട്ടല്; കൂടുതല് തെളിവുകളോടെ മൂന്നാമത്തെ വീഡിയോ പുറത്ത്
-
More8 years ago
‘മകളെ കൊണ്ട് കള്ളം പറയിച്ചു’ ദിലീപ്-കാവ്യ വിവാഹത്തില് മഞ്ജുവിന്റെ പ്രതികരണം
-
Culture8 years ago
വഴിയോര കച്ചവടങ്ങളിലെ ബിരിയാണിയില് പൂച്ച മാംസം
-
Culture5 years ago
വീട്ടമ്മയുടെ നഗ്നദൃശ്യങ്ങള് ഭര്ത്താവിന് വാട്സ് ആപ്പില്; പ്രതിയെ കണ്ട് ഞെട്ടി പൊലീസും വീട്ടുകാരും
-
Culture7 years ago
‘സോനു നിഗം പ്രിയങ്കയില് നിന്നു പഠിക്കണം; ബാങ്കുവിളിയെക്കുറിച്ചുള്ള അധിക്ഷേപത്തിന് ശേഷം പ്രിയങ്കയുടെ ബാങ്കുവിളി പരാമര്ശം വൈറല്
-
Culture8 years ago
അണികളില് നിന്ന് ‘മുര്ദാബാദ് വിളി’; അസ്വസ്ഥനായി മോദി – മാധ്യമങ്ങള് കണ്ടില്ലെന്ന് നടിച്ച വീഡിയോ