യുഎഇ സുപ്രീം കൗണ്‍സില്‍ അംഗവും ഷാര്‍ജ ഭരണാധികാരിയുമായ ശൈഖ് ഡോ. സുല്‍ത്താന്‍ ബിന്‍ മുഹമ്മദ് അല്‍ഖാസിമിയുടെ രക്ഷാകര്‍തൃത്വത്തില്‍, ‘എന്റെ പുസ്തകത്തിനകത്ത് ഒരു ലോകം’ (എ വേള്‍ഡ് ഇന്‍സൈഡ് മൈ ബുക്) എന്ന പ്രമേയത്തില്‍ ഷാര്‍ജ എക്‌സ്‌പോ സെന്ററില്‍ നടന്നു വരുന്ന 36-ാമത് രാജ്യാന്തര പുസ്തക മേള ഇന്ന് സമാപിക്കും.
60 രാജ്യങ്ങളില്‍ നിന്നുള്ള 1,650 പ്രസാധനാലയങ്ങളാണ് ഇത്തവണ പുസ്തക മേളയില്‍ പങ്കെടുത്തത്. 11 ദിവസത്തെ പുസ്തകോല്‍സവത്തില്‍ 15 ലക്ഷത്തിലധികം ശീര്‍ഷകങ്ങളിലുള്ള ഗ്രന്ഥങ്ങളാണ് പ്രദര്‍ശിപ്പിച്ചത്. ഇക്കഴിഞ്ഞ വ്യാഴാഴ്ച വരെ സന്ദര്‍ശകരുടെ എണ്ണം 10 ലക്ഷം കവിഞ്ഞുവെന്നാണ് അനൗദ്യോഗിക വിവരം. പുസ്തക വില്‍പനയും മെച്ചപ്പെട്ട നിലയിലാണെന്നും ബന്ധപ്പെട്ട അധികൃതര്‍ പറഞ്ഞു. ഇതുസംബന്ധിച്ച ഔദ്യോഗിക വിവരങ്ങള്‍ ഉടന്‍ വെളിപ്പെടുത്തും.
14,625 ചതുരശ്ര മീറ്റര്‍ ചുറ്റളവില്‍ നടന്നു വരുന്ന മേളയില്‍ 48 രാജ്യങ്ങളില്‍ നിന്നുള്ള 393 അതിഥികള്‍ 2,600 പരിപാടികളില്‍ സംബന്ധിച്ചു കൊണ്ടിരിക്കുന്നു. 39 രാഷ്ട്രങ്ങളില്‍ നിന്നുള്ള 158 അതിഥികള്‍ പങ്കെടുത്ത 300 സാംസ്‌കാരിക പരിപാടികള്‍; 11 രാജ്യങ്ങളില്‍ നിന്നുള്ള 60 അതിഥികള്‍ സംബന്ധിച്ച 33 പരിപാടികള്‍ ഉള്‍പ്പെടുന്ന കള്‍ചറല്‍ കഫേ; 28 രാജ്യങ്ങളില്‍ നിന്നുള്ള 98 അതിഥികള്‍ സാന്നിധ്യമറിയിച്ച 267 പരിപാടികളുള്‍ക്കൊള്ളുന്ന ബൗദ്ധിക പ്രോഗ്രാം എന്നിവ ഇത്തവണ സംഘടിപ്പിച്ചു. കുട്ടികളുടേതായിരുന്നു ഇത്തവണത്തെ ഏറ്റവും ചെലവേറിയ പ്രേഗ്രാമുകളിലൊന്ന്. ബ്രിട്ടന്‍, കുവൈത്ത്, പോളണ്ട്, ജോര്‍ദാന്‍, ഓസ്‌ട്രേലിയ, മോള്‍ഡോവ, റഷ്യ, ഇന്ത്യ, ബഹ്‌റൈന്‍, ഐസ്‌ലാന്റ്, മംഗോളിയ, സിറിയ, ഇറ്റലി, യുക്രെയ്ന്‍ എന്നീ 20 രാജ്യങ്ങളില്‍ നിന്നുള്ള 44 അതിഥികളുള്‍ക്കൊള്ളുന്ന 1,632 ആക്ടിവിറ്റീസ് ഇതിലുള്‍പ്പെട്ടു.
ഇന്ത്യ, യുകെ, മൊറോക്കോ, സ്വീഡന്‍, തായ്‌ലാന്റ് എന്നീ ഒമ്പത് രാജ്യങ്ങളില്‍ നിന്നുള്ള 12 അതിഥികള്‍ 72 പരിപാടികള്‍ അവതരിപ്പിച്ചു. സോഷ്യല്‍ മീഡിയ സ്‌റ്റേഷനില്‍ 33 സാംസ്‌കാരിക-മാധ്യമ-സാമൂഹിക പ്രശ്‌നങ്ങള്‍ മുന്‍നിര്‍ത്തിയുള്ള ആക്ടിവിറ്റീസ് ആണ് നടന്നു വരുന്നത്. ഇക്കുറി ഒന്നാം നമ്പര്‍ ഹാളില്‍ ‘ഫ്യൂചര്‍ സോണ്‍’ എന്ന പവലിയന്‍ തയാറാക്കിയിരുന്നു. ഡിജിറ്റല്‍ പുസ്തകങ്ങളില്‍ വൈദഗ്ധ്യമുള്ള 10 മുന്‍നിര കമ്പനികള്‍ അവരുടെ അനുഭവങ്ങളെ കുറിച്ചും ഏറ്റവും പുതിയ പ്രസാധനങ്ങള്‍ സംബന്ധിച്ചും ഇവിടെ പ്രതികരിച്ചു.
ഈ വര്‍ഷം മേളയില്‍ ആദരിക്കപ്പെട്ട രാഷ്ട്രം ബ്രിട്ടനാണ്. ബ്രിട്ടീഷ് സംസ്‌കാരത്തെയും സാഹിത്യത്തെയും പ്രതിഫലിപ്പിക്കുന്ന ഒട്ടേറെ പരിപാടികള്‍ ഇതോടനുബന്ധിച്ച് ഒരുക്കി. ബൗദ്ധിക, കലാ മേഖലകളിലെ പ്രഗല്‍ഭര്‍ ഇവിടെ എത്തിച്ചേര്‍ന്നു. അറബ് സാംസ്‌കാരിക-സാഹിത്യ പ്രതിഭകളുടെ നീണ്ട നിര തന്നെ ഇക്കുറി മേളയില്‍ സാന്നിധ്യമറിയിക്കുകയുണ്ടായി.
ജ്ഞാനപീ0 ജേതാവ് എം.ടി വാസുദേവന്‍ നായര്‍, ഇന്ത്യന്‍ എഴുത്തുകാരനും നയതന്ത്ര വിദഗ്ധനുമായ വികാസ് സ്വരൂപ്, മാധ്യമ വ്യക്തിത്വങ്ങളായ രാജ്ദീപ് സര്‍ദേശായി, സാഗരിക ഘോഷ്, നടി ഹേമമാലിനി, ആശാ പരേഖ്, എം.കെ സ്റ്റാലിന്‍, ഖാലിദ് മുഹമ്മദ്, ആര്‍. മാധവന്‍, സാമ്പത്തിക ശാസ്ത്രജ്ഞന്‍ ജയറാം രമേശ്, സംവിധായകന്‍ രാകേഷ് ഓംപ്രകാശ് മെഹ്‌റ, ഡെറക് ഒബ്രയാന്‍, അമേരിക്കന്‍ ബാല സാഹിത്യകാരന്‍ പീറ്റര്‍ ലറാംഗിസ്, അമേരിക്കന്‍ എഴുത്തുകാരിയും നോവലിസ്റ്റുമായ വിക്‌ടോറിയ ക്രിസ്റ്റഫര്‍, ഫ്രഞ്ചില്‍ നിന്നും ജൂലിയന്‍ കൊളമ്യൂ, ഡോ. എം.കെ മുനീര്‍, സാറാ ജോസഫ്, സി. രാധാകൃഷ്ണന്‍, ഡോ. ജോര്‍ജ് ഓണക്കൂര്‍, ഇന്നസെന്റ്, ആഷിഖ് അബു, റിമ കല്ലിങ്കല്‍, ഭാഗ്യലക്ഷ്മി, അശോക് സൂത, ദേവ്ദത്ത് പട്‌നായക്, പ്രീതി ഷേണായ്, അനൂജ ചൗഹാന്‍, എം.എ ബേബി, കവികളായ ആലങ്കോട് ലീലാകൃഷ്ണന്‍, അനില്‍ പനച്ചൂരാന്‍, ഹാസ്യ താരം ടിനി ടോം, ഇംഗ്‌ളീഷ് എുത്തുകാരന്‍ മനു ജോസഫ്, തമിഴ് എഴുത്തുകാരന്‍ എസ്. രാമകൃഷ്ണന്‍ തുടങ്ങിയ നിരവധി പ്രമുഖര്‍ പുസ്തക മേളയില്‍ എത്തി. സംഗീത സംവിധായകന്‍ എം. ജയചന്ദ്രന്‍ സമാപന ദിനമായ ഇന്ന് മേളയില്‍ സംബന്ധിക്കും.
നൂറോളം പുതിയ ഇന്ത്യന്‍ പുസ്തകങ്ങളാണ് ഇത്തവണ മേളയില്‍ പ്രകാശനം ചെയ്യപ്പെട്ടത്. ഇതില്‍ വലിയ അളവ് മലയാള പുസ്തകങ്ങളായിരുന്നു. കഴിഞ്ഞ വര്‍ഷം 40ലധികം പുതിയ പുസ്തകങ്ങളാണുണ്ടായിരുന്നത്. 25 ശതമാനം വിലക്കിഴിവില്‍ പുസ്തകങ്ങള്‍ ഇവിടെ നിന്നും വാങ്ങാന്‍ അവസരമുണ്ടായിരുന്നു. ഓരോ വര്‍ഷവും പുതിയ രാജ്യങ്ങള്‍ മേളയിലേക്ക് കടന്നു വരാറുണ്ട്. ഈ വര്‍ഷം ദക്ഷിണ കൊറിയ, ബംഗ്‌ളാദേശ്, ഡെന്മാര്‍ക് എന്നിവയായിരുന്നു ആദ്യമായി മേളക്കെത്തിയത്.